Зыужьыныгъэ яIэу

Черкесск къалэм и мэрием Къэрэшей-Черкесым и егъэджакӀуэхэм я шыщхьэӀу зэӀущӀэм и пленар зэӀущӀэ щекӀуэкӀащ. «2025-2026 гъэ еджэгъуэм егъэджэныгъэм и бэзым и лъэныкъуэ нэхъыщхьэхэр» зи унэтӀыныгъэ зэӀущӀэм хэтащ егъэджакӀуэхэр, гъэсакӀуэхэр, еджапӀэхэм я унафэщӀхэр, егъэджэныгъэ лэжьыгъэм и ветеранхэр, властым и къулыкъухэмрэ жылагъуэ зэгухьэныгъэхэмрэ я лӀыкӀуэхэр.

ЗэӀущӀэм хэтащ КъЧР-м и премьер — министр Аргун Мурат, Урысейм и Президентым и Полномочнэ лӀыкӀуэу СКФО-м щыӀэм и аппаратым и федеральнэ инспектор нэхъыщхьэ Мэкъуауэ Тимур, КъЧР-м и Правительствэм и тхьэмадэм и къуэдзэ Поляков Евгений, КъЧР-м егъэджэныгъэмрэ щӀэныгъэмрэкӀэ и министр Кравченко Иннэ, Черкесск къалэм и мэр Баскаев Алексей, нэгъуэщӀхэри.

Къызэхуэсахэм видеозэпыщӀэныгъэкӀэ закъыхуигъэзащ Урысей Федерацэм просвещенэмкӀэ и министр Кравцов Сергей. Ар къытепсэлъыхьащ егъэджэныгъэм и бэзым зегъэужьынымрэ абы дэӀэпыкъунымрэкӀэ япэ ирагъэщыну къалэнхэм.

Къэрэшей-Черкесым и Ӏэтащхьэ Темрезов Рэшид къыбгъэдэкӀыу зэӀущӀэм кърихьэлӀахэм захуигъэзащ Аргун Мурат. Ар псоми яхъуэхъуащ еджэгъуэ илъэсыщӀэр къызэрыщӀадзэмкӀэ икӀи къыхигъэщащ ӀэнатӀэм зэрызиужьыну стратегическэ унэтӀыныгъэхэр. Ар къытеувыӀащ нобэрей дунейм егъэджэныгъэм увыпӀэ щхьэхуэ зэрыщиубыдым.

— Егъэджэныгъэм и бэзым зегъэужьыныр Урысей Федерацэм и Президент Путин Владимир, Къэрэшей-Черкесым и Ӏэтащхьэ Темрезов Рэшид сымэ япэ ирагъэщ Ӏуэхугъуэхэм ящыщщ. Абы и гъэзэщӀэным ди щӀалэгъуалэм, ди республикэм, зэры-Урысейуэ я къэкӀуэнур елъытащ», — жиӀащ абы. Аргун Мурат и зыхуэгъэзэныгъэм къыщыхигъэщащ къэралым и егъэджэныгъэ бэзым япэ ирагъэщ Ӏуэхугъуэ нэхъыщхьэ зыбжанэ, Къэрэшей-ЧеркесымкӀи мыхьэнэшхуэ зиӀэхэр. Абыхэм ящыщщ УФ-м егъэджэныгъэм зэрызиужьыну Стратегиер 2036 гъэм нэс гъэзэщӀэныр, Хэкум и хъумакӀуэм и Илъэсымрэ ТекӀуэныгъэ Иным и Илъэс 80-мрэ хэкупсэ гъэсэныгъэр щӀэгъэкъуэныр, гъэмахуэ зыгъэпсэхугъуэм и Илъэсым ипкъ иту лэжьыгъэхэр адэкӀи пыщэныр.

КъинэмыщӀауэ, абы къыхигъэщащ республикэм еджапӀэхэр ухуэнымрэ зэгъэзэхуэжынымрэ, ахэр иджырей оборудованэкӀэ къызэгъэпэщынымрэ егъэджакӀуэхэм я щӀэныгъэм хэгъэхъуэнымрэ теухуауэ лэжьыгъэшхуэ зэрыщрагъэкӀуэкӀыр. — ДэркӀэ нэхъыщхьэр — ди сабийхэращ, абыхэм я зыужьыныгъэращ, я ехъулӀэныгъэращ, я насыпращ, — жиӀащ Аргун Мурат. АдэкӀи къыхигъэщащ республикэм и егъэджакӀуэхэр къыхуагъэува къалэнхэм зэрыпэлъэщынур и фӀэщ зэрыхъур икӀи яхъуэхъуащ узыншагъэ быдэ, къару мыухыж, шыӀэныгъэ яӀэу еджэгъуэ илъэсыщӀэр ирагъэкӀуэкӀыну. Абы егъэджакӀуэхэм яритащ КъЧР-м и Правительствэм и ЩӀыхь тхылъхэр. Еджэгъуэ илъэсыщӀэм къалэн нэхъыщхьэу яӀэхэмрэ ди къэралым и егъэджэныгъэ бэзым щӀэуэ къыхыхьахэмрэ ятеухуауэ доклад къищӀащ Кравченко Иннэ.

Абы къипщытэжащ ялэжьахэр икӀи игъэбелджылащ зыужьыныгъэ унэтӀыныгъэ нэхъыщхьэхэр. Дауэдапщэм ипкъ иту егъэджакӀуэхэм къэрал, ведомствэ нагъыщэхэр хуагъэфэщащ. КъинэмыщӀауэ, СВО-м хэтхэм я «Абилимпикс» чемпионатым щытекӀуа Быж Щэмил къилъэща нагъыщэр иратыжащ. АдэкӀэ псалъэ иратащ КъЧР-м егъэджэныгъэмрэ щӀэныгъэмрэкӀэ и министрым и къуэдзэхэм, абыхэм къыхагъэщащ еджапӀэм зэрызаужьыр.

ДЗЭМЫХЬ Маринэ