Медалибгъу къалъэщащ

МЭЛЫЖЬЫХЬЫМ (апрелым) и 18 — 19 махуэхэм Санкт-Петербург къалэм щекIуэкIа, тхэквондо ITF зи фIэщыгъэцIэ, дунейпсо Кубок зэIухар къэлъэщыным хуэунэтIа спорт зэхьэзэхуэм Черкесск къалэм щыщ спортсменибгъум медаль зэхуэмыдэхэр къыщахьащ.

Апхуэдэу, спортсмениплIым – дыщэр, нэрыбгитхум – дыжьын медалыр зыIэрагъыхьащ. Япэ увыпIэмрэ дыщэ медалымрэ къэзылъэщахэр: Адэмокъуэ Рамил, ПIапIшу Арианэ, Дариенко Данил, Текеевэ Аишэ сымэщ. ЕтIуанэ хъуащ, дыжьын медалри къалъэщащ Хьэбэч Рианэ, Гаджиев Исмэхьил, Колесников Матвей, Хасановэ Лианэ, Хутэ Аслъэн сымэ. Мы спортсмен ныбжьыщIэхэм я гъэсакIуэр Хутэ Русланщ.

***

Щхьэихауэ и гугъу тщIынщ АДЭМОКЪУЭ Рамил цIыкIу. Ар Черкесск къалэм дэт етIуанэ курыт еджапIэм и ещанэ классым щоджэ. Тхэквондо спорт лIэужьыгъуэмкIэ зыздагъасэ секцэм иратауэ щытащ и ныбжьыр илъэситхум иту, илъэсиплI хъуа и къуэш Расим цIыкIуи къыщIыгъуу. ИкIи, мис, илъэситху хъуащи, темызашэу абыхэм тхэквондокIэ загъасэ.

И япэ спорт зэхьэзэхуэу 2023 гъэм зыхэтауэ щытам зи ныбжьыр илъэсихым ита Рамил япэ увыпIэр зыIэригъыхьат. Къапщтэмэ, апщыгъуэращ абы къыщыгурыIуар нэхъри нэхъыбэж спорт лъагапIэхэм лъэIэсыну зэрыхуейр. Апхуэдэуи и текIуэныгъэхэм къыхигъэхъуащ Домбай щекIуэкIа зэхьэзэхуэм япэ увыпIэр къыщилъэщкIэрэ. И къуэш Расим цIыкIу абдеж етIуанэ хъуат…

2024 гъэм ныбжьыщIэ Iэчлъэч цIыкIур Урысейм пашагъэр къыщыхьыным здыщIэбэна зэпеуэм, Самара къалэм щекIуэкIам хэ хуэри, и ныбжьыр илъэсиблым иту пщIэ лъагэ зиIэ апхуэдэ зэхьэзэхуэ иным япэ увыпIэр къыщилъэщын хузэфIэкIащ. КъыкIэлъыкIуа илъэсми, 2025 гъэм, Рамил хэтащ Урысейм пашагъэр къыщыхьыным здыщIэбэна зэпеуэм, икIи спортсмен зэчиифIэм ерыщу япэ увыпIэр зыIэригъыхьэри, тIэунейрэ Урысейм пашэныгъэр щиубыдащ.

Апхуэдэ ехъулIэныгъэ лъагэхэм къапэкIуащ Рамил Санкт-Петербург къалэм щекIуэкIа, тхэквондо ITF зи фIэщыгъэцIэ, дунейпсо Кубок зэIухар къэхьыным здыщIэбэна зэпеуэм хэхуэныр. ИщхьэкIэ къызэреттхэкIауэ, абдежми зи ныбжьыр илъэсипщIым ит ди лъэпкъэгъу спортсмен ныбжьыщIэр япэ увыпIэкIэ, дыщэ медалкIэ къыхэжаныкIащ. Рамили, и адэ-анэ Къэхъунрэ Оксанэри зэрыжаIэу, и гъэсакIуэ Хутэ Руслан къызэрыщыгугъыу, ныбжьыщIэр дяпэкIи къызэтеувыIэнукъым, ерыщу зигъэсэнущ, спорт лъагапIэщIэхэми хущIэкъунущ. ЗыщIэхъуэпсыр къыдэхъуну Рамил дыхуохъуахъуэ!

Зыгъэхьэзырар АБИДОКЪУЭ Люсанэщ