Куэш-Хьэблэ къуажэм дэт, Амирокъуэ Ибрэхьим и цIэр зезыхьэ курыт еджапIэм щекIуэкIащ «ЩIэныгъэм и япэ лъэбакъуэхэр» щIалэгъуалэ къэхутэныгъэмкIэ ХVIII район форумыр. Ар къызэрагъэпэщащ лъэпкъхэм я зэкъуэтыныгъэм и Илъэсым и жьауэм щIэту. Форумыр ирагъэкIуэкIащ «Эрудит» щIэныгъэ лицей жылагъуэмрэ лицейм и унафэщIым и къуэдзэ Сидакъ Тамарэ зи пашэ егъэджакIуэ гупымрэ.
Пшыхьым къеблэгъащ психологие щIэныгъэхэм я кандидат, доцент, КъЧРИПКРО-м гъэсэныгъэмкIэ, психологиемкIэ, инклюзивнэ егъэджэныгъэмкIэ и кафедрэм и доцент Темыр Ф., Хьэбэз муниципальнэ районым егъэджэныгъэмкIэ и Управленэм и лэжьакIуэхэу Хъупсырокъуэ А., Хъупсырокъуэ Т., Ажий А., Тутхэ Т., Куэш-Хьэблэ гимназиемрэ Хьэбэз дэт лицеймрэ я унафэщIхэу Сэкий Уэзиррэ КIытIэ Еленэрэ, къэхутакIуэ ныбжьыщIэхэм я унэтIакIуэхэр. Форумыр гуфIэгъуэ дауэдапщэм щIэту къызэIуахащ. Абдеж къыщагъэлъэгъуащ Хьэбэз районым сабий творчествэмкIэ и Купсэм и гъэсэн цIыкIухэм я лэжьыгъэхэр.
Утыкур ягъэбжьыфIащ «Синд» цIыхубэ ансамблым, Куэш-Хьэблэ гимназием и творческэ гупым, лицейм щеджэ Уэрзэлы Ислъам сымэ. Хъупсырокъуэ А. фIэхъускIэ хьэщIэхэм захуигъэза нэужь, форумым и лэжьыгъэм иублащ. Ар Iыхьэ-IыхьэкIэ гуэшауэ екIуэкIащ. Абдежхэм форумым хэтахэм я проект-къэхутэныгъэ лэжьыгъэхэр къыщагъэлъэгъуащ. «ЩIэныгъэм и япэ лъэбакъуэхэр» район форумыр ныбжьыщIэ зэчиифIэхэм я лэжьыгъэ зэмылIэужьыгъуэхэмкIэ гъэнщIауэ щытащ.
Дэтхэнэми къигъэлъэгъуащ щIэныгъэм зэрыхущIэкъур. Сыт хуэдэ лэжьыгъэри купщIафIэт, ахэр емызэшыжу щIэныгъэ къэлъыхъуэныгъэм елIалIэу зэрылэжьам и Iэужьт. НыбжьыщIэ цIыкIухэм я къэхутэныгъэхэм кърикIуахэр къаIуэтащ, щIэныгъэ зэрабгъэдэлъыр наIуэ зэращIым и мызакъуэу, жюрим хэтхэмрэ IэщIагъэлIхэмрэ я упщIэхэм жэуап зэрыратыфыр, я гупсысэхэр къызэраIуэтэфыр къагъэлъэгъуащ. Секцэ-зэIущIэхэм Iэмал къатащ естественно-щIэныгъэхэм къыщыщIэдзауэ гуманитар, социальнэ лъэныкъуэхэм щыщIэкIыжу IэнатIэ зэмылIэужьыгъуэхэр къызэщIэзыубыдэ темэ куэдым нэхъ куууэ хэплъэну. КъэхутакIуэ ныбжьыщIэхэм утыку кърахьащ унэтIакIуэхэм я нэIэм щIэту ягъэхьэзыра проектхэр.
Абыхэм я дэIэпыкъуныгъэхэмрэ я чэнджэщхэмрэ я фIыгъэкIэ еджакIуэхэм, гугъуехьхэр къызэранэкIри, ехъулIэныгъэ зыIэрагъыхьащ. НыбжьыщIэхэм я лэжьыгъэм деж гулъытэ нэхъыбэу щыхуащIащ зыщалъхуа хэку цIыкIум и тхыдэмрэ нобэ зэманым жылагъуэр зыпэщIэхуэ лъэпощхьэпо нэхъыщхьэхэмрэ. Дэтхэнэми къигъэлъэгъуащ ди къэкIуэнымкIэ жэуаплыгъэ зэрихьыр зэрызыхищIэр икIи щIэныгъэмрэ щэнхабзэмрэ загъэужьыным хэлъхьэныгъэ зэрыхуащIыным зэрыхуэхьэзырыр.
Форумым хэтахэр Хьэбэз муниципальнэ районым егъэджэныгъэмкIэ и Управленэм и ЩIыхь тхылъкIэ къыхагъэщащ. «ЩIэныгъэм и япэ лъэбакъуэхэр» форумыр иджыри зэ щыхьэт техъуащ щIэныгъэр ипэкIэ зыгъэкIуэтэн щIэблэ зэрыщыIэм. Ар цIыкIухэр я гупсысэхэмрэ я IуэхуеплъыкIэхэмрэ здызэхъуэжыну, я акъылэгъухэр къыздалъыхъуэну утыку лъэщ хъуащ.
Зыгъэхьэзырар ЕЗАУЭ Маринэщ
Больше на Черкес хэку
Подпишитесь, чтобы получать последние записи по электронной почте.
