«Лучший учитель родного языка и родной литературы» Урысейпсо зэхьэзэхуэм и финалым Къэрэшей-Черкесым щыщ егъэджакIуэхэр пхыкIащ. Апхуэдэу, Урысейм щыпсэу лъэпкъхэм я анэдэлъхубзэхэм я Махуэм ипэ къихуэу Липецк къалэм щекIуэкIащ «Анэдэлъхубзэмрэ литературэмрэкIэ егъэджакIуэ нэхъыфI» V Урысейпсо зэхьэзэхуэм и финалыр.
Зэпеуэм къыхыхьащ къэралым и хэгъуэгу 87-м къабгъэдэкIа егъэджакIуэ 85-рэ, гъэсакIуэ 46-рэ. Финалым пхыкIахэм яхэхуащ ди республикэм щыщ егъэджакIуэхэри: Карачаевск къалэм дэт, зи № 1 курыт еджапIэм къэрэшеибзэмрэ литературэмрэкIэ щезыгъаджэ Лайпановэ Фатимэрэ Адыгэ-Хьэблэ къуажэм дэт «Светлячок» сабий садым щылажьэ, ищхьэ нэхъыщхьэ зиIэ гъэсакIуэ Мысро къуэ Радимэрэ. ТекIуэныгъэр зыхуагъэфэщахэм я цIэхэр фокIадэм и 11-м къраIуащ. ТекIуэныгъэ нэхъыщхьэр къихьащ Карелие Республикэм щыщ вепсыбзэмкIэ егъэджакIуэ Фомин Глеб.
«Лучшие практики развития родной речи детей дошкольного возраста» номинацэмкIэ текIуэныгъэр хуагъэфэщащ Башкортостан Республикэм къыбгъэдэкIа, башкирыбзэмкIэ егъэжакIуэ Шариповэ Альбинэ. «Анэдэлъхубзэхэм хуегъэджэнымкIэ хъыбар технологиехэр къэгъэсэбэпын» жыхуиIэ, «Дом народов России»-м и номинацэ хэхамкIэ нэхъыфIу къыщIэкIащ Ленинград областым урысыбзэмрэ литературэмрэкIэ и егъэджакIуэ Солонников Михаил Абы фэеплъ тыгъэр иритыжащ къэзыпщытэж Iыхьэм и жюрим хэта, къэралыбэ зэхущытыкIэхэмкIэ ФАДН къэрал политикэ Управленэм и унафэщI Цыбиков Тимур.
«ИгъащIэ лъандэрэ Урысейм и къару нэхъыщхьэщ абы щыпсэу лъэпкъхэм я зэхуэмыдагъымрэ я зэкъуэтыныгъэмрэ. АнэдэлъхубзэмкIэ егъэджакIуэм Урысейм и лъэпкъыбзэхэм я къэкIуэнум и лъабжьэр щIэблэм яхуегъэтIылъ!» — жиIащ Цыбиковым. Фигу къэдгъэкIыжынщи, зэпеуэр иригъэкIуэкIащ Урысейм щIэныгъэмкIэ и Министерствэм, УФ-м лъэпкъыбзэхэмкIэ федеральнэ институтыр щIыгъуу.
БОРЭНЫКЪУЭ Мадинэ
Больше на Черкес хэку
Подпишитесь, чтобы получать последние записи по электронной почте.
