Лъэпкъым и набдзэу адыгэш

Мэкъуауэгъуэм (июным) и 12-15 махуэхэм Санкт-Петербург къалэм щызэхэтащ «Иппосфера-2025» лъэпкъыш гъэлъэгъуэныгъэр. 1999 гъэ лъандэрэ ирагъэкIуэкI Iуэхугъуэ дахэм къызэщIрагъэубыдащ шы спортымкIэ зэхьэзэхуэхэри, шы лъэпкъхэр утыку ишэнри, шурылъэс къэщIынри, мастер-классхэр къэтынри, нэгъуэщI куэди.

Шы индустрием хуэлажьэхэм, псэущхьэ щыпкъэм и гъащIэм хэплъэну зыфIэфIхэм папщIэ къызэрагъэпэщ Iуэхугъуэ нэхъыщхьэмкIэ лIыщIыгъуэ плIанэ мэхъури ди къэралым зэрешалIэ шыхъуэным нэхъ хуэщIауэ исхэр, шы Iэпслъэпсхэр къыщIэзыгъэкIхэмрэ шууей лъэрыхьхэмрэ, шы спортым пыщIахэмрэ лъэпкъыш зэхуэмыдэхэмрэ. Мыгъэрей иппосферэм хэтащ лъэпкъыгъуэ 20-м щыщ шы 200-м щIигъу: адыгэшыр, хьэрыпышыр, ахалкетинскэр, буденновскэр, донскойр, лъэхъу орловскэр, вятскэр, мезенскэр, владимирскэр, хьэлъэзешэ советскэр, хагъыхьащ цыджаныши (тингерыр), къыдыри. Гъэлъэгъуэныгъэм и программэр гъэнщIауэ щытащ дауэдапщэ зэмылIэужьыгъуэхэмкIэ. Ленинград областым махуиплIми щылэжьащ конференцхэмрэ семинархэмрэ, лэжьыгъэ Iуэхум ехьэлIа зэIущIэхэмрэ нэгузыужь зекIуэхэмрэ. «Шууей Хасэм» къыбгъэдэкIыу адыгэшу 8 яшащ иппосферэм — иныкъуэр Адыгэ-Республикэм ейуэ, адреиплIыр Къэрэшей-Черкесымрэ Къэбэрдей-Балъкъэрымрэ я тIурытIу. Ди хэгъуэгум икIахэм мылъкукIэ фIы дыдэу защIигъэкъуащ Къэрэшей-Черкес Республикэм и Адыгэ Хасэм.

— Сыт щыгъуи хуэдэу, «Шууей Хасэм» игъэхьэзыру «Иппосферэм» здиша хьэщIэгъафIэ стендым цIыхуу екIуэлIар къыпхуэмыбжыну куэдт. Абдежым гукъыдэж зиIэм лъэкIыныгъэ иIащ адыгэ къафэ къыщищIынуи, адыгэ кхъуей зыIуигъэхуэнуи, ди лъэпкъым и тхыдэмрэ и щыIэкIэ-псэукIэмрэ нэIуасэ уахуэзыщI гупсысэхэм щIэдэIунуи, — щитхащ и телеграм-каналым Адыгэ Республикэм и

Iэтащхьэ КъумпIыл Мурат. Япэ дыдэу адыгэшыр утыку ирашащ «Ашэмэз» ансамблым уэрэд игъэзащIэкIэрэ. АтIэ, кавказыбгхэм къеха уэрэдыр зи тхьэкIумэ иIуахэм а махуэм псэ кIэ зыхащIащ ди лъэпкъышым и уардагъымрэ и лантIагъымрэ я телъыджагъыр. Уэрэдым хэт дэтхэнэ пшы Iэпэри дэхъуу гъэпсат утыку къихьэ шым и бэкъуэкIэми, и къэжэкIэми. «Иппосфера-2025» шы гъэлъэгъуэныгъэм кърикIуамкIэ, мы гъэм чемпионыцIэм шы лъэпкъыгъуэ 13 щIэбэнати, текIуэныгъэр къилъэщащ Нижегородскэ областым хыхьэ Перевозскэ къалэ округым и «Горизонт» шы заводым щаIыгъ «Терек» шым (хьэлъэзешэ советскэм). Ар иджы щытынущ дяпэгъэ екIуэкIыну гъэлъэгъуэныгъэм и напэу. Чемпионхэм я рингым етIуанэ увыпIэр къыщихьащ икIи еплъакIуэхэм я фIылъагъуныгъэр къилэжьащ илъэсибл зи ныбжь Ансар» къэбэрдеишым (Адыгэ Республикэ), ещанэ хъуащ «Традиция» зи  фIэщыгъэцIэ, Доманчук Еленэ и мезенскэ шыбзыр. «Шагъдий вагъуэбэ» зыфIаща рингым и чемпион, и вице-чемпион цIэ лъапIэхэр къыхуагъэфэщащ «Джанет» ООО-м щагъэхъу, 2018 гъэм Латникэрэ Альфэрэ къатехъукIа, Пилтакян Саркис и «Ансар» пцIэгъуэплъым. ЕтIуанэ увыпIэр Кушпэ Щэмил и «Алмаз», ещанэр КIэдэкIуей Зэмрэт и «Доспех» адыгэш хакIуэхэм къахьащ (сурэтхэм щыволъагъу).

ЛЫХЬ Тимур