КъулыкъущIэхэм я Спартакиадэ

ТЕМРЕЗОВ Рэшид: «Къэрал лъэщыр — ар, япэрауэ, цIыхуу хъуар узыншэу икIи жыджэру щыщыткIэщ!»

Урысей Федерацэм и Президент Путин Владимир и пщэрылъкIэ, Черкесск къалэм щрагъэкIуэкIащ хэгъуэгум и къэрал, муниципальнэ къулыкъущIэхэм я япэ Урысейпсо Спартакиадэр. КъулыкъущIэ 350-м щIигъу зыхэта гуп 27-м — КъЧР-м и Iэтащхьэмрэ и Правительствэмрэ я Администрацэм, Министерствэхэмрэ республикэм и районхэмрэ къабгъэдэкIахэр зэпеуащ атлетикэ псынщIэмкIэ, шахматымкIэ, баскетболымкIэ, футболымрэ Iэнэ теннисымрэкIэ.

Зэхьэзэхуэхэм къыпэкIуар аращи, командэпсо гъэлъэгъуэныгъэм елъытауэ Черкесск и мэрием къыбгъэдэкIа гупым япэ увыпIэр хуагъэфэщащ. ЕтIуанэр ихьащ Карачаевск къалэ округым. Ещанэр — КъЧР-м физкультурэмрэ спортымрэкIэ и Министерствэм. «Си гум къикIыу сохъуэхъу текIуэныгъэр къэзыхьахэмрэ зэпеуэм хэтахэмрэ! Гуапэщ плъагъуну, ди цIыхухэр махуэ къэсыхун республикэм папщIэ зэрылажьэр, я жыджэрагъыр, хэлъэтыр, я къарумрэ фIым зэрыхущIэкъумрэ щапхъэу къызэрагъэлъагъуэр. Сывогъэгушхуэ, си лэжьэгъухэ, икIи, шэч къытесхьэкъым, мыпхуэдэ зэхьэзэхуэхэр егъэкIуэкIыныр хабзэфI зэрытхуэхъунум! Дэ адэкIэ дыпылъынущ Къэрэшей-Черкесым щыщ цIыху нэхъыбэ спортым къыхэшэным, ахэр абы хыхьа нэужьи, зыхуэныкъуапхъэ Iэмалхэм кIэ къызэгъэпэщауэ гъэпсыным.

УФ-м и Президентым къызэрытхуигъэуващи, апхуэдэ бгъэдыхьэкIэфIыр щхьэпэнущ лъэпкъхэм ди зэхуэдэ мурадыр зэдгъэхъулIэным — физкультурэмрэ спортымрэ жыджэру ета урысей цIыхухэм я бжыгъэр 2030 гъэм нэгъунэ процент 70-м нэдгъэсыным. ДыкъэмыувыIэу делэжьынущ абы. Дэ ди къалэнщ ди республикэм щыпсэу дэтхэнэ зыми и гъащIэм физкультурэр, спортымрэ псэукIэ узыншэмрэ къыгуэпх мыхъун и зы Iыхьэу щIыныр!» — щитхащ социальнэ зэпыщIэныгъэхэм ди хэгъуэгум и Iэтащхьэм.

Зыгъэхьэзырар АБЫКЪУ Къамырзэщ