«Къэрал лъэщым Iэ худоIэт!»

«Ди нэхъыжьхэр щапхъэщ хэкупсагъэкIэ, псэемыблэжу Хэкур фIыуэ лъагъунымкIэ! ХабзэфIым тету, ныбжь зиIэ ди нэхъыжьыфIхэри жыджэрагъ яхэлъу холIыфIыхь Къэрэшей-Черкесым, Урысей псом я жылагъуэ гъащIэм. Хэхыныгъэхэм къокIуалIэ яхэлъ хэкупсагъэмкIэ щапхъэ ягъэлъагъуэу. Апхуэдэ щапхъэ дахэ сыт щыгъуи къызыкъуэкIхэм ящыщщ Беслъэней, Адыгэ-Хьэблэ къуажэхэм дэс нэхъыжьыфIхэр, адыгэ фащэхэмкIэ зэщыхуэпыкIауэ.

«Ди нэхъыжьхэм ябгъэдэлъ Iуэху зэхэщIыкI иныр, Iущагъыр сыт щыгъуи ди гъуэгугъэлъагъуэщ. Абыхэм я щапхъэкIэ щIалэгъуалэм ирагъэлъагъу укъыздэхъуа щIыналъэм, укъызыхэкIа лъэпкъым я псэкупсэ хабзэхэр хъумэным мыхьэнэ ин зэриIэр, фIэщхъуныгъэмрэ пщIэ зэхуэщIынымрэ зэгуэпх мыхъуну зэрызэпыщIар. Ди нэхъыжь Iумахуэхэм Iэ хуаIэт мамырыгъэм, зэIузэпэщыныгъэм, я къуажэхэр ефIэкIуэным, лъэ быдэкIэ щыту къэралым зиужьыным. ХэхыпIэ щIыпIэм къемыкIуэлIэфа, Iэ зыIэтыну хуей ди нэхъыжьыфI къэс и унагъуэм екIуалIэурэ, я конституцэ хуитыныгъэхэр кърагъэгъэлъэгъуащ. Дахуохъуахъуэ ди нэхъыжьхэм узыншагъэ быдэкIэ, унагъуэ хуабагъэкIэ, зэIузэпэщыныгъэкIэ, я гъащIэр насыпкIэ гъэнщIауэ кIыхь хъуну», — къыхигъэщащ республикэм и лIыщхьэм.

КъЧР-м и хэхыпIэ щIыпIэхэм Iэ щаIэтащ СВО-м къулыкъу щызыщIа ди ветеранхэм — ди хъумакIуэхэм, ди къэралым, абы щыпсэу цIыхухэм я къыщхьэщыжакIуэхэм. Абыхэм я дежкIэ Хэкур — псалъэ къудейкъым. Ар езым бгъэдэлъ гъащIэ зэхэщIыкIщ икIи жэуаплыгъэщ. Абыхэм Iэ хуаIэтащ къэралым и къэкIуэнум, ар шынагъуэншэу щытыным. Абыхэм зэгуэр хэхыныгъэр ящIагъэххэт, Хэкур хъумэнымкIэ упщIэр къыщыувауэ щытам. Иджыпстуи СВО-м и ветеранхэм къыхах дяпэкIэ республикэм, къэрал иным я къэкIуэнур, ди къэралым ТекIуэныгъэр къилъэщыныр я гугъапIэ нэхъыщхьэу! «БгъэдыхьэкIэ нэс хэти хуаIэу» «Хэхыныгъэ махуищыр къэралым, хэгъуэгухэм, цIыхухэм я дежкIэ мыхьэнэ куу зыхэлъ Iуэхугъуэу екIуэкIащ. Урысей Федедерацэм и Къэрал Думэм и депутатхэр дгъэбелджылыкIэрэ, дэ хэтхар къэралым и зэпIэзэрытыныгъэмрэ щхьэхуитыныгъэмрэщ, Урысейм и зыужьыныгъэщ, лъэпкъхэм я зэкъуэтыныгъэщ. ФIыщIэ ин яхузощI ди республикэм щыпсэухэм, хэхыныгъэхэм хэтахэм, КъЧР-м и ХэхакIуэ комиссэм и лэжьакIуэхэм, щIыпIэ избиркомхэм, шынагъуэншагъэр, жылагъуэр къызэзыгъэпэщахэм. Щхьэхуэу фIыщIэ яхузощI муниципалитетхэм, творческэ гупхэм, хэхыныгъэ щIыпIэхэм махуэщI зэхэтыкIэ зыухуахэм, цIыхухэм я гукъыдэжыр къэзыIэтахэм. ФIыщIэ псалъэкIэ къыхэзмыгъэщынкIэ Iэмал иIэкъым ди нэхъыжьхэр, зи щапхъэкIэ щIалэгъуалэр зыгъасэхэр. Езы щIэблэри — къэралым и къэкIуэнум гумызагъэу зэрыхуэлажьэм папщIэ. Сыт щыгъуи хуэдэу, хабзэфIым тету, Къэрэшей — Черкесым щыпсэу лъэпкъхэм къагъэлъэгъуащ ябгъэдэлъ акъылыфIагъыр, граждан еплъыкIэ жыджэрыр. Апхуэдэ бгъэдыхьэкIэм дэркIэ мыхьэнэ хэха иIэщ, сыт щхьэкIэ жыпIэмэ, ди цIыхухэр гунэфу хущыткъым къэралым и хабзэкъэгъэщI къулыкъум щылэжьэнухэр къыхэхыным, УФ-м и Президент Путин Владимир игъэбелджыла лэжьыгъэр зэфIэхыным», — махуищ хэхыхыныгъэр къызэщIикъуэжу жиIащ хэгъуэгум и лIыщхьэм.

Удэзыхьэхыу, гъэщIэрэщIауэ ХэхыпIэ участкэхэри, абы къекIуэлIа хэхакIуэхэри зэпеуащ хэт нэхъ телъыджэу Iуэхум бгъэдыхьэфынуми. Языныкъуэхэм деж махуэ псом и кIыхьагъкIэ артистхэм уэрэд жаIащ, лъэпкъ къафэхэр къащIащ; теплъэгъуафIэ хъуащ здэлажьэ IуэхущIапIэ щхьэхуэм и лэжьапIэ щыгъыныр зыщыгъыу хэхыныгъэм къекIуэлIахэр. Ягъэбелджылащ «Псоми къахэлыдыкIа хэхакIуэ», «ХэхыпIэ щIыпIэм къекIуэлIа цIыху дахэ», «Гуапагъэ ин зыхэлъа», «Самый душевный избиратель», «ЗэIущIэ насыпыфIэ» хуэдэхэр; КъЧР-м щыпсэу лъэпкъхэм я ерыскъыхэкIхэр къезыхьэлIа, «Самый заботливый избиратель» зыфIащари ягъэбелджылащ. Ныбжь зэхуэмыдэхэм итхэр зыщIэс унагъуэхэр зэгъусэу хэхыныгъэм къызэрекIуэлIамкIэ ягъэщыпкъащ щIэблэхэм я зэпыщIэныгъэр. «Семейный выход» щхьэщIэдзапIэм щIэту, а махуэм унагъуэ зэдэзыщIахэми Iэ яIэтащ. Хэхыхыныгъэр щекIуэкIым къыщалъхуа махуэр техуахэри ягъэгуфIащ. Ныбжьышхуэ зиIэу къэкIуахэми фэеплъ саугъэтхэр иратащ. КIэщIу жыпIэмэ, хэхыныгъэ махуэхэр екIуэкIащ гуфIэгъуэкIэ, хэхакIуэхэм я гукъыдэжкIэ гъэнщIауэ, утемызашэу, удэзыхьэх Iуэхугъуэу.

Зыгъэхьэзырар АБИДОКЪУЭ Люсанэщ