IэнатIэм хуэфащэу

Мэкъуауэгъуэм (июным) и 20-м Черкесск къалэм щекIуэкIа зимычэзу конференцым ипкъ иту УФ-м и Бзылъхугъэхэм я Союзым и Къэрэшей-Черкес хэгъуэгу къудамэм и унафэщI IэнатIэр Борлаковэ Маринэ хуагъэфэщэжащ.

ЗэIущIэр къызэIузыха икIи езыгъэкIуэкIа Борлаковэ Маринэ щIаплъыкIыну къыхилъхьа упщIэхэр хуэгъэзауэ щытащ Бзылъхугъэхэм я Союз Урысейпсо жылагъуэ-къэрал организацэм и Уставым зэхъуэкIыныгъэ халъхьауэ къэщтэжыным, хэгъуэгу къудамэм и унафэщI, нэIэ-ревизэ къулыкъухэр хэхыным.

ЗэIущIэм кърихьэлIащ, онлайн IэмалкIи къыхэлэжьыхьащ хьэщIэ лъапIэхэр: КъЧР-м и Iэтащхьэмрэ и Правительствэмрэ я Администрацэм и унафэщIым и япэ къуэдзэ Хубиев Марат, КъЧР-м гуащIэдэкIымрэ социальнэ зыужьыныгъэмрэкIэ и министрым и къуэдзэ Щай Мадинэ, УФ-м и Бзылъхугъэхэм я Союзым и Ставрополь къудамэм и унафэщIым и дэIэпыкъуэгъу Гусевэ Александрэ, «Карачаево-Черкесское объединение организаций профсоюзов» Союзым и пашэ Айбазовэ Раисэ, «ЦIыхубэ фронт» Урысейпсо жылагъуэ зэщIэхъееныгъэм и хэгъуэгу исполкомым и унафэщI Каппушевэ Людмилэ, КъЧР-м и Жылагъуэ палатэм и пашэ Ляшовэ Еленэ, республикэм къыщыдэкI къэрал лъэпкъ газетхэм я редактор нэхъыщхьэхэр — Абидокъуэ Люсанэ «Черкес хэку», Къул Фэрдаус «Абазаштэ», Атуовэ Алтынай «Ногай давысы», Коркмазовэ Салимэ «Къарачай» сымэ; медицинэ, егъэджэныгъэ, бэдаущ лэжьыгъэхэм пыщIахэр, бзылъхугъэ жылагъуэ Iуэхузехьэхэр.

КъызэрапщытамкIэ, хэгъуэгум и бзылъхугъэхэм я Советым хэтхэм я нэхъыбэр конференцым офлайн, онлайн IэмалхэмкIэ хэлэжьыхьащ. Къыхалъхьа упщIэхэм япкъ иту, дяпэкIэ илъэсих пIалъэкIэ лэжьэну хахащ Союзым и бзылъхугъэхэм я хэгъуэгу къудамэм и тхьэмадэр, и къуэдзэхэр, ревизэ комиссэм и пашэр.

Апхуэдэу, экономикэ щIэныгъэхэм я кандидат, «Кубань» колхоз-племрепродуктор СХА-м и правленэм и унафэщI, «Женское движение Единой России» федеральнэ бэдаущ проектым и хэгъуэгу Жылагъуэ советым и пашэ, ОНФ-м и ЩIэплъыкIакIуэ Борлаковэ Маринэ конференцым хэтахэр зэдэарэзыуэ хуагъэфэщэжащ организацэм и пашэу щытыныр.

Къуэдзэ пщэрылъхэр зыхьыну IэIэткIэ зыхуагъэфэщар Лещенко Светланэ, Айбазовэ Зухра сымэщ. Ревизор IэнатIэм и пщэрылъхэр КъЧР-м щIыхь зиIэ и экономист, усакIуэ, УФ-м и тхакIуэхэм я Союзым хэт Гъуэщокъуэ Мадинэ хуагъэфэщащ.

Гу зылъытапхъэщи, организацэм и Правленэм нэрыбгэ 29-рэ хагъэхьащ, республикэм къыщыдэкI лъэпкъ газетхэм я унафэщI бзылъхугъэхэри хэту. ИкIи, Советым хагъэхьахэми, абы и унафэщI IэнатIэр зыхуагъэфэщэжа Борлаковэ Марини яхуэгъэзауэ мы махуэм хъуэхъу гуапэхэр конференцым щыжаIащ. «КъызэрымыкIуэ щIыхь лъагэщ ббгъэдэлъ IэпщIэлъапщIагъым, уи лэжьыгъэм пщIэ къыхуащIыныр.

Борлаковэ Маринэ хэлъ пашагъэ хьэлыр, бзылъхугъэхэм я хьэлэмэтхэмрэ хуитыныгъэхэмрэ хъумэ-

ным псэемыблэжу илъэс куэд щIауэ зэрыхуэлажьэр, апщыгъуэми, унагъуэм илъ хабзэфIхэр хъумэным хуищI гулъытэм къыхуихьащ а бзылъхугъэм хуащI пщIэ лъагэмрэ щIыхь инымрэ.

Шэч хэмылъу, абы бгъэдэлъ Iуэху зэхэщIыкIыр, и къарур, и пщэрылъхэм зэрыбгъэдыхьэр щхьэпэнущ, уеблэмэ лъабжьэ хуэхъунущ организацэм дяпэкIэ зыIэригъыхьэну ехъулIэныгъэхэм.

Ди фIэщ мэхъу, Бзылъхугъэхэм я Союзым и хэгъуэгу къудамэм и унафэщIу фыщыткIэрэ, организацэм социальнэ жэрдэмхэмрэ проектхэмрэ игъэзащIэкIэрэ, абы адэкIи жыджэру зэрызиужьынур, бзылъхугъэхэм я хуитыныгъэ лъэкIыныгъэхэм загъэубгъуным, я  хьэлэмэтхэр хъумэнымкIэ фызэрыхуэлэжьэнур» жаIащ къэпсэлъахэм.

ЩОХЪУЖЬ Л.