ГуащIэдэкIым и Махуэм — накъыгъэм и 1-м илъэс 90 зэрырикъуар игъэлъэпIащ Инжыдж-КIыкIун къуажэм щыщ, зи гъащIэ псор педагогическэ лэжьыгъэм пыщIауэ къекIуэкIа АГЫРБЭ ФатIимэт Мусэ и пхъум. ФатIимэт 1936 гъэм Инжыдж-КIыкIун къуажэм къыщыхъуащ. И нэгу щIэкIащ къэралыр зыпхыкIа щытыкIэ-псэукIэ хьэлъэр, зауэр, гъаблэр, зэхуримыкъуныгъэр…
Ауэ, гукIи псэкIи цIыху щабэу, зыми гужьгъэжьгъ хуимыIэу къэгъуэгурыкIуащ. ЕджапIэр къиуха нэужь, Черкесск къалэм дэт педагогическэ колледжым щеджащ. Ищхьэ щIэныгъэ щызригъэгъуэтащ Карачаевск педагогическэ институтым (иджы университетым). ЩIыхь хэлъу ари къиухри, и щIэныгъэм щыхигъэхъуащ Ставрополь къалэм курсхэм щеджэкIэрэ. И гъащIэ псор ФатIимэт триухуащ педагогическэ лэжьыгъэм, сабийхэм щIэныгъэ ябгъэдэлъхьэнымрэ гъэсэнымрэ. Зэуэ жытIэнщи, гъуэгуанэр тынштэкъым. Арами, пщIэ иIэу ар икIун лъэкIащ. НыбжьыщIэ дыдэу щIидзэри пенсэм нэсыхун пэщIэдзэ классхэм я егъэджакIуэу щылэжьащ Инжыдж-КIыкIун классий еджапIэм, иужьым Хьэбэз еджапIэ-интернатым. И закъуэ абы ипIащ, гъащIэм лъэ быдэкIэ хигъэуващ и щIалэ закъуэ Зураб.
ЩIыхь хэлъу пенсэм щытIысыжым, и гъащIэр ятриухуащ и щIалэм къыщIэхъуа щIэблэм. Зэман зэхуэмыдэхэм ФатIимэт иригъэджахэм ноби псалъэ гуапэ куэд къыхужаIэ, пщIэшхуэ къыхуащI щIэныгъэ нэс, гъэсэныгъэ тэрэз къабгъэдэзылъхьа я егъэджакIуэм. ЩIэупщIакIуэ къыхуокIуэ зэпыт, ягу къагъэкIыж еджапIэм зэрыщIэсахэр, ФатIимэт зыхуригъэджахэр, я гукъэкIыж гуапэхэмкIэ зэдогуашэ. Ар уасэншэщ егъэджакIуэм дежкIэ. Ди анэ, нанэ дыщэ ФатIимэт щIэблэ бжыгъэм ябгъэдилъхьа гуащIэр псыхэкIуадэ хъуакъым. И гуащIэдэкI псэемыблэжыр къыхалъытэкIэрэ, егъэджэныгъэ бэзым къыбгъэдэкIыу гъунэжу къыхуагъэфэщащ щIыхь тхылъхэр, медалхэр. Дыхуейщ ди псэм хуэтхь анэм, ди анэшхуэ гуапэм узыншагъэ быдэ Тхьэм къыхуигъэфэщэну! И гъащIэр тыншыгъуэкIэ гъэнщIауэ, щIыхьрэ пщIэрэ къебэкIыу псэуну дохъуэхъу! ФIыщIэ мыухыж худощI дэтхэнэми къыдбгъэдилъхьа къарум, фIылъагъуныгъэ иным папщIэ!
И бынунагъуэр
Больше на Черкес хэку
Подпишитесь, чтобы получать последние записи по электронной почте.
