ГъащIэ насыпыфIэ

Бадзэуэгъуэм и 8-м, унагъуэм, лъагъуныгъэмрэ зэхуэпэжыныгъэмрэ я Махуэм, хабзэфІ зэрыхъуам тету, республикэм и къалащхьэм щагъэлъэпІащ жылагъуэмкІэ щапхъэгъэлъагъуэ, бын куэд зыпІа, илъэс куэд хъуауэ зэгурыІуэрэ зэдэІуэжу зэдэпсэу унагъуэхэр. Черкесск дэт щэнхабзэмкІэ Унэм а махуэм щызэхуэсащ республикэм и къалэ, район къэс къикІа унагъуэхэр: зэщхьэгъусэхэр, я бынхэр, бынхэм я быныжхэр.

Къызэхуэсахэм я махуэщІыр даІэтыну, яхъуэхъуну къахуеблэгъащ КъЧР-м и Іэтащхьэ Темрезов Рэшид, республикэм и ЦІыхубэ ЗэІущІэм (Парламентым) и тхьэмадэ Иванов Александр, Къэрэшей-Черкесым и Правительствэм и тхьэмадэ Аргун Мурат, КъЧР-м и муслъымэнхэм я муфтий Эркенов хьэжы Мухьэммэд, нэгъуэщІхэри. — Нобэ мыр е 17-нэу догъэлъапІэ унагъуэм, лъагъуныгъэмрэ зэхуэпэжыныгъэмрэ я махуэщІ нэхур. Унагъуэр цІыхум и быдапІэу, къэралым и лъабжьэу щытащ икІи апхуэдэу къонэж. Унагъуэхэм социальнэ дэІэпыкъуныгъэ ягъэгъуэтыныр, щІэгъэкъуэн захуэщІыныр къэралым и стратегическэ къалэн пажэщ. Абы и щыхьэтщ илъэс кІуар, 2024 гъэр, унагъуэм и Илъэсу, мы гъэр демографиер егъэфІэкІуэным, сабий нэхъыбэ республикэм къихъухьыным зэрытеухуар, абыхэм яхуэфэщэн программэхэри, проектхэри зэрылажьэр. ЩыІэххэ программэхэм мы гъэм иджыри хэгъуэгу программэ зыбжанэ къахэхъуащ.

ФІыщІэ псалъэ щхьэхуэ яхуэзгъэфэщэну сыхуейщ бын куэд зыпІ унагъуэхэм, СВО-м зи бын щыІэ анэ-адэхэм. Быныбэ унагъуэу республикэм мин 12,5-рэ щопсэу. Фэ фи бын пІыкІэр, ахэр быдэу я лъэ зэрытевгъэувэр къэралым и къэкІуэнщ, и пщэдейщ. Фэ псэемыблэжыныгъэмрэ жэуаплыгъэ лъагэмрэ фрищапхъэщ.

Унагъуэ къэс сохъуэхъу узыншагъэ быдэкІэ, зэгурыІуэныгъэрэ хуабагъэрэ, лъагъуныгъэ, сабий дыхьэшх макъ фи жьэгухэм дэмыкІыну! — жиІащ Темрезов Рэшид.

Хъуэхъу псалъэхэм къакІэлъыкІуащ къэрал нагъыщэхэмрэ щІыхьыцІэхэмрэ.

УФ-м и Президент Путин Владимир Владимирович ищІа Унафэр и лъабжьэу, «Мать-героиня» щІыхьыцІэ лъапІэр республикэм и Іэтащхьэм хуигъэфэщащ бын 14-м я анэ Коркмазовэ Кулизар. ЖыІэпхъэщи, мы гъэм япэ дыдэу апхуэдэ щІыхьыцІэр хуагъэфащэу аращ.

Урысей Федерацэм и Президентым и УнафэкІэ, «Унагъуэ институтыр гъэбыдэным хуащІ хэлъхьэныгъэ иным, бын гъэсэныгъэфІым и щІыхькІэ» псалъэхэмкІэ щІэгъэбыдауэ, «Родительская слава» орденым и медалыр хуагъэфэщащ Хьэбэз районым щыщ Къумыкъухэ Азэмэтрэ Ларисэрэ. Зэщхьэгъусэхэм пхъуищрэ зы къуэрэ зэдапIащ, зы пхъурылъху цІыкІу яIэщ.

А махуэм «Образцовая семья» щІыхьыцІэр, абы и нагъыщэр хуагъэфэщащ илъэс 50, нэхъыбэ зэдэпсэуа унагъуи 10-м.

Абыхэм ящыщщ илъэс 57-рэ хъуа унагъуэр — Сафроновхэ Владимиррэ Зинаидэрэ, лІыщІыгъуэ зи унагъуэр ирикъуа Петрич Павелрэ Татьянэрэ, илъэс 52-рэ хъуауэ зэдэпсэу Джэдыгухэ Мухьэрбийрэ Валентинэрэ, зи унагъуэ жьэгур илъэс 50 хъуа Къуныжьхэ Мурадинрэ Фатимэрэ, нэгъуэщІхэри. «За любовь и верность» медалымрэ ЩІыхь тхылъымрэ республикэм и унагъуэ 14-м хуагъэфэщащ. Абыхэм ящыщщ лІыщІыгъуэ ныкъуэ къызэдэзыгъэщІа, бынищ, бынырылъхуи 6 зэдэзыпІ Темырхэ Хьэзрэталийрэ Элизэрэ; зи унагъуэ ныбжьыр илъэс 42-рэ ирикъуа, зы бынрэ бынырылъху цІыкІуитІрэ зиІэ МыкІытІэхэ Мухьэрбийрэ Маринэрэ, илъэс 32-м къриубыдэу бынитІрэ бынырылъхуитІрэ зыгъуэта Уэрзэлыхэ Аслъэнрэ Анжелэрэ.

Бынитху, нэхъыбэ зыпІ анэ насыпыфІэ 12 а махуэм утыку ирашащ икІи «Материнская слава» щІыхь нагъыщэр къыщыхуагъэфэщащ.

МахуэщІ Іуэхугъуэхэм я гуІэфІтещІэж хъуащ уэрэдхэмрэ къафэхэмрэ, фэеплъ гукъинэж сурэтхэр зытрегъэхыныр, гъунэгъухэм, ныбжьэгъухэм, бынхэм я зэхъуэхъуныгъэхэмрэ удз гъэгъа Іэрамэ бжыгъэншэхэмрэ.

ТУАРШЫ Ирэ