Зи ныбжьыр илъэс 15-м нэмыса спортсменхэр зыхэта, Iэхуитлъэхуит бэнэкIэмкIэ Европэм пашагъэр къыщыхьыным хуэгъэза спорт зэхьэзэхуэ ин накъыгъэм и 22-24 махуэхэм Болгарием хыхьэ Самоковэ къалэм щекIуэкIащ. Абы къекIуэлIащ къэрал пщIы бжыгъэм къабгъэдэкIа бэнакIуэхэр. Ди гуфIэгъуэшхуэм щIэту, Къэрэшей-Черкес Республикэм щыщ, Урысейм и командэ къыхэхам хэта бэнакIуэм – Хьэбэз районым зыщызыгъасэ ХЬЭЖМЭСТАФЭ Аслъэн домбеякъ медалыр зэпеуэм къыщилъэщащ.
Аслъэн зыкъыщигъэлъэгъуащ зи хьэлъагъыр килограмм 75-рэ хъухэм яхэту. Фигу къэдгъэкIыжынщи, пIалъэ кIэщIкIэ узэIэбэкIыжмэ, Каспийск къалэм Аслъэн Урысейм пашагъэр къыщилъэщауэ щытащ. «Хьэжмэстафэ Аслъэн икъукIэ IэпщIэлъапщIэу зыкъыщигъэлъэгъуащ Европей пашагъэм здыщIэбэна спорт зэхьэзэхуэм. ИкIи, зи ныбжьыр илъэс 15-м нэсахэм я деж ди хэкуэгъу спортсмен ныбжьыщIэр ещанэ увыпIэкIэ къахэжаныкIащ», — итхащ КъЧР-м физкультурэмрэ спортымрэкIэ Министерствэм и пресс-къулыкъум. Мы зэхьэзэхуэм Аслъэн спорт зэпэщIэтыныгъиплI иригъэкIуэкIащ, щым дежи бжьыпэр щиубыдащ. БэнакIуэр зыгъасэр Iуэху зэхэщIыкI ин зыбгъэдэлъ гъэсакIуэхэу Езауэ Адемыркъанрэ Щауэ Азэмэтрэщ.
Больше на Черкес хэку
Подпишитесь, чтобы получать последние записи по электронной почте.
