ТекIуэныгъэм и Илъэс 80-м Москва щекIуэкIа Парадым ди адыгэ щIалэ хэтащ. А хъыбарыр ди гуапэ мыхъукIэ къэнакъым. АСЛЪЭНЫКЪУЭ Ислъам Мурат и къуэр къызыхэкIа лъэпкъкIэ Али-Бэрдыкъуэ, и анэшымкIэ Аргунхэ, Куэш-Хьэблэ щыщщ.
Абдеж курыт еджапIэр фIы дыдэу къыщиухри, и хъуэпсапIэр зригъэхъулIащ: Благовещенск ищхьэ команднэ военнэ училищэм щIыхьауэ щоджэ, етIуанэ курсым хэсщ. ЖыIэпхъэщи, военнэ еджапIэм щIыхьэныр еджэныгъэмкIэ и ехъулIэныгъэхэм къыщыувыIэкъым. АтIэ, апхуэдэ еджапIэм зезыпщытыр гукIи, псэкIи, акъылкIи, IэпкълъэпкъкIи псыхьауэ, ныкъусаныгъэншэу щытыпхъэщ. А псоми хуэфэщэнщ ди лъэпкъэгъу щIалэр. Абы и щыхьэтщ зыхэта щIыхь Iуэхури.И Iыхьлыхэм зэрыжаIащи, накъыгъэм и 9-м екIуэкIа Парадым телевизорымкIэ еплъащ, я нэхэр къытрамыхыу. Утыку Плъыжьым сатыру ирикIуэхэм я щIалэр къыщыхалъагъукIам, гуфIэгъуэрэ гушхуэныгъэу къапкърыхьар гъунэншэт. ИужькIэ Ислъам епсэлъахэщ телефонкIэ икIи езыми къажриIащ апхуэдэ тхыдэ Iуэхугъуэм зэрыхэтар насыпышхуэу къызэрилъытэр, дяпэкIи и еджэнкIи, и IуэхущIафэкIи апхуэдэ щIыхьым хуэфащэу зэрыщытыным зэрыхуэпабгъэнур. ИIэщ Ислъам щапхъэ зытрихыни, гъуазэ зыхуищIыни.
Зауэм хэтаи, тылым псэемыблэжу щылэжьаи и адэм и лъэныкъуэкIи, и анэшымкIи и мащIэкъым абы икIи Ислъам а щIэблэ хахуэм, гуащIэрылажьэшхуэм хуэфэщэнщ. Парадым хуэкIуэу, Ислъами, абы хэта дэтхэнэми лэжьыгъэшхуэ япэщIэкIащ, абы къыпэкIуа дахагъэ, уардагъэращ дэ телевизорымкIэ тлъагъужыр. Ислъам зэрыжиIэмкIэ, Благовещенск военнэ еджапIэм щыщ зы ротэ къыдашри, гъатхэпэм щегъэжьауэ Парадым хуагъэхьэзыращ. Иджы щIалэр и еджапIэм екIуэлIэжащ, еджэнми адэкIэ пищащ. ЕхъулIэныгъэкIэ, Ислъам! Тхьэм иджыри куэдрэ уи цIэр фIыкIэ зэхыдигъэх!
ТУАРШЫ Ирэ
Больше на Черкес хэку
Подпишитесь, чтобы получать последние записи по электронной почте.
