Беслъэнейдэсхэм я гумащIагъэр

1942 гъэм Ленинград щыщ сабийхэр фашистхэм къаIэщIэзыхыу къезыгъэла, зи жьауэм щIэзыгъэувэу зыпIа беслъэнейдэсхэм я псэемыблэжыныгъэр ягъэщыпкъэн я мураду махуэку кIуам фэеплъ пэкIу Беслъэней къуажэм щрагъэкIуэкIащ.

Ди лъэпкъэгъухэм апщыгъуэм я нэгу щIэкIар, лIыгъэу зэрахьар — ар ди хэгъуэгум и тхыдэм и напэкIуэцI нэхъыщхьэхэм ящыщщ, абыхэм къагъэлъагъуэ а зэман ерум дызыпэщIигъэува гугъуехьхэм цIыхугъэкIэ, гущIэгъуныгъэрэ зэкъуэтыныгъэрэкIэ дазэрыпэлъэщар. А илъэс ткIийхэм, беслъэнейдэсхэм куэд я фэм дэкI рэ пэт, гъуэгуанэ кIыхьым еша-елIауэ къигъэна журт сабий 32-р бийм щахъумэри, пIэщхьагъ хуабэ, гулъытэ, гугъэ нэху ирагъэгъуэтыну зраубыдылIащ…

Фэеплъ пэкIум хэтащ жылагъуэ Iуэхузехьэхэр, къэрал унафэщI къулыкъухэм къабгъэдэкIахэр: Беслъэней къуажэм и нэхъыжь Советым и тхьэмадэ Лахъу Александр, «КъэхутакIуэ ныбжьыщIэ» щIалэгъуалэ Союзым и Къэрэшей-Черкес къудамэм и унафэщI Уэз Мадинэ, УФ-м и следственнэ Комитетым и следственнэ Управленэм и Хьэбэз районзэпх къудамэм и зэхэгъэкIакIуэ нэхъыжь Шыбзыхъуэ Азнаур, Беслъэней къуажэ администрацэм и Iэтащхьэ Тхьэгъэпсэу Гаррирэ къуажэ поселенэм и Iэтащхьэ ЗекIуэ Мухьэмэдрэ. Мы дауэдапщэм мыхьэнэ хэха иратащ Беслъэней еджапIэм щылажьэ егъэджакIуэхэмрэ щеджэ цIыкIухэмрэ къызэрыхашам.

КъыдэкIуэтей щIэблэм и дежкIэ — тхыдэм пыщIэныгъэ хуиIэныр, зауэр зи нэгу щIэкIахэм я гукъэкIыжхэм хэдэIуэныр, я нэхъыжьхэм лIыгъэу зэрахьар псэкIэ зыхащIэну лъэкIыныгъэ зэрагъуэтар уасэ зимыIэщ. Ахэри, балигъхэм ящIыгъуу, дунейм ехыжахэм зы дакъикъэкIэ яхуэщыгъуащ, фэеплъ сыным и пащхьэми удз гъэгъахэр щагъэтIылъащ. Гу лъыттащ ахэр къызэхуэсахэм я гукъэкIыжхэм гъэщIэгъуэн халъагъуэу зэрыщIэдэIуам, тхыдэ фэеплъыр хъумэным хэлъхьэныгъэ хуащIыну зэрыхуеям. Пэж дыдэщ, дэтхэнэ зыми ди пщэ илъщ ди тхыдэр тхъумэну, къытщIэтаджэ щIалэгъуалэм а Iуэхушхуэм педгъэщэну, сыту жыпIэмэ, дяпэ итахэр зэрыубыду, зым Iэпыхур зым къищтэжу къызэрелам, цIыхуу къызэрынэжам теухуауэ куэд къыбжезыIэжыфыну щыIэр аращ.

ЛЫХЬ Тимур