Адыгэр зы дыхъужынщ

Мы дуней псом щикъухьа

Адыгэ лъэпкъыу лъэпкъ хъыжьэ,

Уи дыгъэр уэ къуэмыхьа, —

Узыншэщ адэ хэкужьыр.

Адэ хэкужьыр зыхуейр

Зэрыгъуэтыжмэщ и лъэпкъыр.

Адыгэ, умынэщхъей —

Ущхьэщыхьакъым уэ нэпкъым.

Дэ дохъумэж ди нэмыс,

Дэ дохъумэжыр ди хабзэ.

Щыхъуну хэти гунэс

ЕщIыф унафэ лъэпкъ Хасэм,

Узыншэщ ди Къэбэрдейр,

Ди Адыгейри Шэрджэсри.

Тхьэм къытщыхуакъым и ней —

Зэ гъущыжынщ дэ ди нэпсыр.

ЩIым цIыхуу тетым «Шэрджэс!»

ЖезыгъэIауэ лъэпкъ хахуэ,

Уи бын ящIахэр хэхэс

Зэхуэзэжынкъэ зы махуэ.

Адыгэр зы дыхъужынщ —

Къигъэзэжынщ ди насыпым.

Джэгушхуэ дэ щытщIыжынщ

Ди Iуащхьэмахуэ и лъапэм.

БИЦУ Анатолэ