Налшык къалэм дэт, зи №2 лицейм физикэмрэ астрономиемкIэ и егъэджакIуэ Къэшэж Аслъэн «Росатом»-м иригъэкIуэкI «Ледокол знаний» VII дунейпсо щIэныгъэ-узэщIакIуэ зекIуэм хэтахэм ящыщ зы хъуащ. Мы хъыбарыр къет «Кавказ сегодня» порталым. Абы телъыджэу къыщыхъуам и гугъу пщIымэ, псом япэу къэгъэлъэгъуапхъэщ Кавказ Ищхъэрэ федеральнэ щIыналъэм и лIыкIуэу Iуэхум хэтахэм Ищхъэрэ Мылылъэ хым и курыкупсэм ит «ТекIуэныгъэр илъэс 50 ирокъу» атом мылкъутэм и вертолет тIысыпIэм адыгэ къафэхэр зэрыщагъэзэщIар. Къэшэж Аслъэн и ехъулIэныгъэхэм ипэIуэкIи мызэ-мытIэу дытепсэлъыхьащ. Физико-математикэ щIэныгъэхэмкIэ кандидат, «Илъэсым и егъэджакIуэ-2022» зэпеуэм и лауреат, «Классная тема» телепроектым и япэ Iыхьэм щытекIуа Къэшэжыр зекIуэм пашэу зыкъыщигъэлъэгъуащ икIи дуней псом икIа гупым ящIыгъуащ.
«Кавказым ис лъэпкъхэм я хабзэхэмрэ щэнхабзэмрэ яхъумэ къафэкIи, макъамэкIи, лъэпкъ фащэкIи. Ди лъэпкъ щIэинхэм я дахагъэм ноби мыхьэнэшхуэ иIэщ, ахэр яфIэгъэщIэгъуэнщ нэгъуэщI лъэпкъхэм щыщхэми. Ди къафэхэр утыку къит хьа нэужь, куэд къыдбгъэдыхьащ иджыри пытщэну къыдэлъэIуу. Уеблэмэ ди къафэ хабзэхэм теухуауэ нэхъыбэ къащIэну хуейуэ къыдэупщIырт, езыхэми абы щыщ гуэрхэр зрагъэщIэну щIэхъуэпсырт», — жеIэ егъэджакIуэм. «Ледокол знаний» ебланэ зекIуэр траухуащ Урысейм и лъэпкъхэм я зэкъуэтыныгъэм и илъэсым икIи абы хэтащ дунейм и къэрал 22-м икIа еджакIуэ, студент зэчиифIэу 68-рэ. Лъэпкъ зэмылIэужьыгъуэхэм я зэхуэзэ дахэ ар хъуащ. Вьетнамым, Индием, Белоруссием щыщхэр гукъыдэжышхуэ яIэу удж хъурейм хыхьащ, «щIым и гъунэм» урыс уэрэдхэр зэгъусэу зэрагъащIэу щызэхэсащ. Кавказ Ищхъэрэ щIыналъэм ифI ягъэлъэгъуэну Iэмал яIэу Арктикэм щыIащ еджакIуэ зэчиифIэхэр: Гордусенкэ Дарье (Владикавказ), Азаровэ Аннэ (Невинномысск), Страховэ Евгение (Минеральные Воды). Апхуэдэуи егъэджэныгъэ Iуэхум хэтащ Пятигорск щыщ блогер, музыкант, КВН-м хэта Дилан Ян.
«Тхыдэм къриубыдэу а щIыпIэм щыIар цIыху 15000-рэщи, сэри абыхэм сазэрыщыщым къызита гукъыдэжыр пхужымыIэным хуэдизщ. IэнатIэ зэхуэмыдэхэм пэрыт цIыху къызэрымыкIуэхэм — щIэныгъэлIхэм, тхакIуэхэм, зыплъыхьакIуэхэм, артистхэм, егъэджакIуэхэм, ныбжьыщIэ зэчиифIэхэм — махуипщIкIэ уаригъусэныр тыгъэшхуэт», — къыхигъэщащ блогерым. Егъэджэныгъэ программэм къыдэкIуэу, зекIуэм хэтахэм ялъэгъуащ арктикэ мылхэр, мыщэ хужьхэр, Франц-Иосиф и ЩIы архипелагыр. КъинэмыщIауэ, абыхэм я нэгу щIэкIащ щIыуэпс къэхъукъащIэ гъэщIэгъуэн — дыгъэр зэрыкъуилъафэм Арктикэм щыкIэлъыплъащ. Шэч хэмылъу, КИФЩI-м и лIыкIуэхэм я дежкIэ мы зекIуэр IэмалыфI хъуащ технологие лъагэхэм зыщагъэгъуэзэнымкIэ. Нэхъыщхьэжращи, абыхэм ягъэлъэгъуащ кавказ щэнхабзэм щIы хъурейм и дэнэ щIыпIи цIыхухэр зэрыщызэкъуигъэувэфыр.
БАГЪЭТЫР Луизэ
Больше на Черкес хэку
Подпишитесь, чтобы получать последние записи по электронной почте.
