«КъэкIуэнур нобэм епхауэ: Хьэбэз районым егъэджэныгъэмкIэ и бэзыр лъэкIыныгъэхэм я къэухьу» щхьэщIэдзапIэм щIэту, Совет Союзым и ЛIыхъужь ХЬЭБЭЧ Умар и цIэр зезыхьэ Ботэщей еджапIэм щекIуэкIащ Хьэбэз муниципальнэ районым щыщ егъэджакIуэхэм я шыщхьэIу зэIущIэр.
Абы хэтащ Хьэбэз район и администрацэм и Iэтащхьэм и къуэдзэ Унэж Рэмэзан, егъэджэныгъэмкIэ и къудамэм и унафэщI Сидакъ Жаннэ, «Движение Первых» зэщIэхъееныгъэм и муниципальнэ координатор Унэжь МуIэед, егъэджакIуэ IэщIагъэм илъэс пщIы бжыгъэкIэ хуэпэжа икIи ноби хуэпэжу лажьэ педагогхэр, курыт еджапIэхэм я унафэщIхэр.
Ягъэгушхуэн, я лэжьыгъэ зэхэщIыкIыр иджыри зэ щапхъэу утыку кърахьэн щхьэкIэ зэIущIэм ирагъэблэгъащ икIи Хьэбэз район администрацэм къыбгъэдэкIыу ФIыщIэ тхылъхэр хуагъэфэщащ зи IэпщIэлъапщIагъ лъагэкIэ ену къыхэщу, илъэс куэдкIэ къыдэкIуэтей щIэблэр гъэсэным хэлъхьэныгъэшхуэ хуэзыщIу, гуащIафIэу къекIуэкIа педагог нэхъыжьыфIхэр. Апхуэдэщ Хьэбэз районым егъэджэныгъэмкIэ илъэс 30-м щIигъу гуащIэ хуэзыгъэтIылъа Сидакъ Розалинэ, егъэджэныгъэм и ветеранхэу Хьэкъун Людмилэ, Джэдгъэф Айшэт, Сонэ Риммэ, Абдокъуэ Фатимэ, Братхэ Рэзихьэт сымэ.
ФIыщIэ тхылъхэр егъэджакIуэхэм яIэригъыхьэжын ипэ, Унэжь Рэмэзан къызэхуэсахэм хъуэхъу псалъэкIэ захуигъэзащ: — ПщIэ зыхуэсщI си лэжьэгъухэ, педагогическэ гуащIэдэкIым и ветеранхэ, егъэджакIуэ, ныбжьэгъу лъапIэхэ! ХабзэфI зэрыхъуащи, гъэ къэс хуэдэуи, си гуапэщ егъэджакIуэхэм я шыщхьэIу зэIущIэм сыхэтыну. Еджэгъуэ пIалъэр щыщIидзэм ехъулIэу дызэхуэсурэ къыдопщытэж дяпэгъэ тхузэфIэкIар, доубзыху тщIэну къытпэщылъыр, ныкъусаныгъэу диIэр зэрыдгъэкIуэдыну щIыкIэм дропсалъэри, щхьэж къалэну иIэнур догъэнаIуэ.
Хьэбэз районым экономикэ и лъэныкъуэкIэ лэжьыгъэу щыIэр къэзылъахъэ щымыIэу зэкIэлъыдогъэкIуатэ, щытыкIэр зэпIэзэрытщ. Дэ сыт щыгъуи гулъытэшхуэ худощI къуажэхэм я псэукIэр нэхъыфI щIыным, ауэ, псом нэхърэ нэхъыщхьэр аращи, район администрацэм и къалэн пажэхэм ящыщщ егъэджэныгъэр фIыуэ къызэгъэпэщыныр — еджапIэщIэхэр ухуэныр, жьы хъуахэр зэгъэзэхуэжыныр, цIыкIухэр еджэнымкIи шхэнымкIи хуэныкъуэншэу, курыт еджапIэхэм я инфраструктурэхэмрэ я мылъку-техническэ лъапсэхэмрэ зэманым декIуу гъэпсыныр.
МащIэкъым илъэс кIуам Iуэхуу зэфIэтхар, ауэ тщIэну ди пщэ къыдэхуэнури нэхъыбэжщ. Фэ — егъэджакIуэхэр, фегугъуу фылажьэмэ, фыкъыддэIэпыкъумэ, а псори тыншу зэлъэщIэдгъэхьэфынущ. Iуэхур тхуагъэпсынщIэнущ къэралым щылажьэ федеральнэ, хэгъуэгу проектыфIхэми. Дяужь къиувэну, дызыхъуэжыну дызыщыгугъ щIалэгъуалэр щытыпхъэщ гуащIафIэу, узыншэу, Iущу, цIыхугъэр зыгъэнэхъапэу.
Апхуэдэу щыщыткIэ, щхьэусыгъуэ тхуэмыхъукIэ къанэкъым егъэджэныгъэм и хабзэ нэхъыфIхэр нэхъри дгъэбэгъуэну къалэн зыщытщIыжыну», — жиIащ Хьэбэз районым и Iэтащхьэм и къуэдзэм. Илъэс кIуам лэжьыгъэу ирагъэкIуэкIамрэ еджэгъуэ пIалъэщIэм и щытыкIэнумрэ ятеухуауэ районым егъэджэныгъэмкIэ и къудамэм и гуащэм убгъуауэ доклад къищIащ. Сидакъ Жаннэ IупщIрэ зэхэгъэкIауэ къытепсэлъыхьащ
Хьэбэз районым ит егъэджэныгъэ организацэхэм я нэгъабэрей гъэлъэгъуэныгъэхэм кърикIуам, мы гъэм педагогхэм я лэжьыгъэм игъуэтыну зэхъуэкIыныгъэхэм.
ЛЫХЬ Тимур
Больше на Черкес хэку
Подпишитесь, чтобы получать последние записи по электронной почте.
