Черкесск къалэм дэт Индустриально-технологическэ колледжыр къэзыуха ныбжьыщIэхэм зрагъэгъуэта щIэныгъэм щыхьэт техъуэ дипломхэр иратыжащ. ЕджапIэм IэщIагъэ зэхуэмыдэхэр щагъуэтауэ, лэжьэным хуэхьэзыру мы гъэм къыщIагъэкIащ нэрыбгэ 204-рэ.
Абы щыщу диплом плъыжькIэ еджэгъуэ пIалъэр къаухащ ныбжьыщIэ 38-м. ЕджапIэм зэхиша гуфIэгъуэ дауэдапщэм къе блэгъащ КъЧР-м егъэджэныгъэмрэ щIэныгъэмрэкIэ и министр Кравченко Иннэ, «Автобан» ООО-м и унафэщI Шардан А. «Кавказ-цемент» АО-м и механик нэхъыщхьэ Донецкий Р., адэ-анэхэр, егъэджакIуэхэр. ЕджапIэм и унафэщI Байрамкулов Ахъмэт фIэхъускIэ къригъэблэгъащ хьэщIэхэр, еджапIэр къэзыухахэр, адэ-анэхэр.
— ЗэманкIэ узэIэбэкIыжмэ, укIытэхыу, Iэнкуну, зи хьэл иджыри зэтеувэн зыхущIэмыхьа ныбжьыщIэу къытхуэкIуахэр нобэ щIэныгъэрэ IэщIагъэ нэсрэ ягъуэтауэ, запсыхьауэ гъуэгущIэ тыдогъыхьэ. Псом япэрауэ сахъуэхъуну сыхуейщ адэ-анэхэм! — жиIащ унафэщIым. НыбжьыщIэхэми яущиящ лъагапIэщIэхэм хуэпабгъэну. — ЩIэныгъэ зэгъэгъуэтыным иджыри къэс фегугъуами, фи къару куэд хэфлъхьами, иджы гуащIэдэкI лэжьыгъэм и щIэдзапIэм фыщытщ. Ди пащхьэ итщ IэщIагъэ зэхэщIыкI лъагэ зыбгъэдэлъ, ди IуэхущIапIэхэр зыхуэныкъуэ, ехъулIэныгъэхэм хуэпабгъэ IэщIагъэлI ныбжьыщIэхэр. Си фIэщ мэхъу фэ фщыщ дэтхэнэми республикэмрэ ди къэралышхуэмрэ я экономикэм и зыужьыныгъэмрэ и щIэрэщIэныгъэмрэ хэлъхьэныгъэшхуэ зэрыхуэфщIынур. Фызыхунэсам фыкъыщымыувыIэу зывужь, зывузэщI! — жиIащ Кравченко Иннэ. КъыкIэлъыкIуэуи, колледжыр ехъулIэныгъэфI яIэу къэзыуха студентхэм я диплом плъыжьхэр яритыжащ. МахуэщIыр хъуэхъу, фIыщIэ псалъэхэмкIэ, гуфIэгъуэмрэ пIейтеиныгъэмрэкIэ гъэнщIауэ щытащ. НыбжьыщIэхэм я махуэщIыр ягъэдэхащ къафакIуэ гупхэмрэ уэрэджыIэхэмрэ.
БОРЭНЫКЪУЭ Мадинэ
Больше на Черкес хэку
Подпишитесь, чтобы получать последние записи по электронной почте.
