Еджагъэшхуэ

ГъащIэ купщIафIэ езыхьэкI цIыху пцIыхурэ жэуэ къызэупщIмэ, сымычэнджэщу и цIэ къисIуэнущ Братхэ Хьэсин. Си фIэщ мэхъу, «хэт ар?» жэуэ мы хэгъуэгум щыпсэу зы цIыхуи зэрыщIэмыупщIэнур, сыту жыпIэмэ, диктор, журналист, щIэныгъэлI къызэрымыкIуэр псоми фIы дыдэу яцIыхури.

Апхуэдэ цIыху уасэ хуэпщIынри Iуэху къызэрымыкIуэщ. ГъащIэм къызэригъэлъагъуэщи, цIыху зэчиифIэм лъэныкъуэ куэдкIэ, IуэхущIафэ зэхуэмыдэхэмкIэ зыкъызэкъуех. Аддэ, областной радио жытIэу щыщыта зэманым, адыгэ редакцэм и журналист, и диктор Братхэ Хьэсин зи унагъуэ имыхьа щыIэжтэкъым. Апщыгъуэм и макъыр зэрызэхах лъандэрэ «Адыгэ Левитан»-кIэ къоджэ, нобэр къыздэсами а цIыхубэ фIэщыгъэцIэр хуэфащэ дыдэу зэрехьэ. КъеджэкIэ IэзагъкIэ Хьэсин зыри щхьэпрыкIыфакъым. Журналистикэр къапщтэмэ, Братхэ Хьэсин и тхыгъэ газетым къытрыригъадзэми, радио нэтынми абы и IэрыкIыр зыфIэмыгъэщIэгъуэна къэгъуэтыгъуейщ. Сыту? Абы жэуап етыгъуэфIабзэщ. Хьэсин и унагъуэ библиотекэм хуэдэу тхылъ здэкъулей ди хэгъуэгум щыгъуэтыгъуафIэкъым. Псом хуэмыдэу абы куэду хэлъщ тхыдэ жыжьэм, литературэм, бзэщIэныгъэм ехьэлIахэр, художественнэ тхылъ къызэрымыкIуэхэм я гугъу сщIыххэнкъыми. Апхуэдиз еджам, дауи, и IэрыкIхэр гъэнщIащ цIыхум сэбэп къыхуэхъун щIэныгъэхэмкIэ. Хьэсин и тхыгъэхэм, и IэдакъэщIэкIхэм аращ щIэупщIэшхуэ щIаIэр. И библиотекэм, зэджэ тхылъхэм я гугъу пщIымэ, зы гъэщIэгъуэн мы Iуэхум хэлъщ:

тхылъ къэскIи къэрэндащ цIыкIукIэ гупсысэ нэхъыщхьэхэр щIетхъэ, и нэхъыбэри къыхетхыкI тетрадь щхьэхуэ иIэу. Ар Iэгъуэу и лэжьапIэ Iэнэм телъщ. Апхуэдиз еджам, дауи, улъэщIыхьэну, хьэмэрэ, апхуэдиз щIэныгъэ нэхъуса зиIэм дауэ игу къэмыкIынрэт езыми тхэн щIидзэну! Ауэ къызэрыгуэкI тхакIуэ мыхъуу, Хьэсин яхоувэ къэхутэныгъэ лэжьыгъэшхуэ езыгъэкIуэкIхэм. Радиом къыIукIыжу пенсэм тIысыжа нэужь, гуманитар къэхутэныгъэхэмкIэ республикэ институтым ящтэри, илъэс пщIы бжыгъэкIэ лэжьахэм ехьэехуэу ябгъуроувэ. КъыдигъэкIагъэххэ лэжьыгъэ купщIафIэхэм къанэмыщIауэ, ноби Хьэсин и Iэнэм телъщ къыдигъэкIыну зыхуэхьэзыр тхыгъэ къызэрымыкIуэхэр — нарт пшыналъэм, мифологием и деж мафIэм ехьэлIа къэхутэныгъэ лэжьыгъэ гъуэзэджэр, адыгэ шыпсэжьхэм, псысэжь-хъыбарыжьхэм щыщIэдзауэ къуалэбзухэм я адыгэ фIэщыгъэцIэхэм ятеухуа тхылъ гъуэзэджэм щыщIэкIыжу. ЩIэныгъэрылажьэ, тхыдэдж, журналист гъэщIэгъуэныщэу сызыдэлэжьэн си насып къихьа Братхэ Хьэсин и махуэщI дахэм ипкъ иту Тхьэшхуэм сыхуолъэIу и гъащIэм къыхупищэну, гукъыдэж лъагэ иIэу, дэрэжэгъуэ къезыт щIэныгъэ лэжьыгъэм иджыри куэдрэ пэрытыну! Зэрылъэпкъыу фIыуэ тлъагъу, пщIэшхуэ зыхуэтщI Братхэ Хьэсин адыгэ жьантIэм щыдгъафIэ цIыху пэрытхэм яхэту иджыри куэдрэ къытщхьэщытыну, псэуныгъэ быдэ иIэну дыхуохъуахъуэ! КЪАРДЭН Заремэ, КъЧР-м щIыхь зиIэ и журналист