«Зыужьыныгъэм мыхьэнэшхуэ иIэщ»

Урысейм и Президент ПУТИН Владимиррэ Къэрэшей-Черкес Республикэм и Iэтащхьэ Темрезов Рэшидрэ лэжьыгъэ IуэхукIэ Москва къалэм щызэIущIащ.

Ахэр тепсэлъыхьащ хэгъуэгум и социально — экономикэ зыужьыныгъэм, зауэ операцэ хэхам хэт ди зауэлIхэмрэ абыхэм я унагъуэхэмрэ зэрызыщIагъакъуэм. Къэрэшей-Черкесым и Iэтащхьэм Урысейм и Президентыр щигъэгъуэзащ а лъэныкъуэхэмкIэ ялэжь Iуэхугъуэхэм, цIыхухэм я щыIэкIэ-псэукIэр егъэфIэкIуэным хуэгъэзауэ ди къэралым и ЛIыщхьэм ищIа пщэрылъхэр зэрагъэзащIэм. Ди республикэм и Iэтащхьэм Путин Владимир жриIащ дзэм къулыкъу щызыщIэхэмрэ абыхэм я унагъуэхэмрэ шэщIауэ зэрызыщIагъакъуэр, абы хуэунэтIауэ хэгъуэгум Iуэхугъуэ 54-рэ зэрыщагъэзащIэр, адреснэу унагъуэхэм зэрадэIэпыкъур, «Хэкум и хъумакIуэхэр» Фондым зэрадэлажьэр.

Къыхигъэщащ а лэжьыгъэр республикэм зэгъэуIуауэ зэрыщагъэзащIэр, а Iуэхум къэрал власть къулыкъухэр, жылагъуэ зэгухьэныгъэхэр, жэрдэмщIакIуэ гупхэр зэрыпыщIар, Президентым и унафэхэр гъэзэщIэным хуэгъэзауэ лэжьыгъэ купщIафIэ зэрырагъэкIуэкIыр, фронтым зэрадэIэпыкъур. ЗэIущIэм деж гулъытэ хэха щыхуащIащ къулыкъущIэхэм социальнэ, медицинэ реабилитацэ ягъэгъуэтыным ехьэлIауэ ялэжь Iуэхугъуэхэми. Темрезов Рэшид Президентым хуиIуэтащ республикэм реабилитацэ, экзопротезированэ здащI КупситI къызэрыщызэIуахар, федеральнэ кадровэ программэм щыщ «Къэрэшей-Черкесым и ЛIыхъужьхэр» щIыналъэ программэр икъукIэ фIагъ хэлъу зэрагъэзащIэр.

Ди къэралым и Президентым къыбгъэдэкIа фIэхъусыр республикэм и Iэтащхьэм яжриIэжащ 34-нэ гвардейскэ мотострелковэ бригадэ щхьэхуэм къулыкъу щызыщIэхэм. НэхъапэIуэкIэ абыхэм иратат Путин Владимир и Iэпэ зытридза, бригадэм и Бэракъыр. КъинэмыщIауэ, зэIущIэм щытепсэлъыхьащ социально-экономикэ зыужьыныгъэм: валовэ хэгъуэгу продуктым и бжыгъэм зэрыхэхъуэм, республикэм лъэпкъ проектхэр зэкIэлъыгъэкIуауэ зэрыщагъэзащIэм. Къэрэшей-Черкесым сабийуэ къыщыхъухэмрэ цIыхухэм я гъащIэр кIыхь зэрыхъумрэ, демографие щытыкIэм зегъэужьыным и Илъэсу екIуэкIа 2025 гъэм кърикIуа хэм и гугъу ищIкIэрэ, Темрезов Рэшид къытепсэлъыхьащ сабиймрэ анэмрэ социальнэ дэIэпыкъуныгъэ ягъэгъуэтыным хуэунэтIауэ къагъэщIа IэмалыщIэхэмрэ бгъэдыхьэкIэщIэхэмрэ.

Апхуэдэуи, абы къыхигъэщащ ухуэныгъэ и лъэныкъуэкIэ щыIэ ехъулIэныгъэхэр. «Урысейм и хэгъуэгухэм ящыщу ухуэныгъэ нэхъыбэу здыщекIуэкI, абыкIэ бжьыпэр зыIыгъ щIыналъэ 21-м КъэрэшейЧеркесыр яхэтщ. Арами, иджыри дызэлэжьын щыIэщ», — игъэбелджылащ ди республикэм и лIыщхьэм. Апхуэдэуи, Темрезов Рэшид къытеувыIащ егъэджэныгъэ IуэхущIапIэхэм я унэхэм я щытыкIэм, псыкIэ къызэзыгъэпэщ бэзхэр жьы зэрыхъуам ехьэлIа Iуэху зэIумыбзхэми. «Урысейм и Президентымрэ Правительствэмрэ зыкъызэрытщIагъакъуэм и фIыщIэкIэ, республикэм ит еджапIэхэр къызыхуэтыншэу зэгъэпэщыжыным теухуа программэр догъэзащIэ, сабий IыгъыпIэхэр зэгъэзэхуэжынымкIэ хэгъуэгу программэр къэтщтащ. Владимир Владимирович къыхигъэщхьэхукIащ социальнэ инфраструктурэм адэкIи зегъэужьыным мыхьэнэшхуэ зэриIэр», — МАХ-м щитхащ ди республикэм и Iэтащхьэм.

КъинэмыщIауэ, Темрезов Рэшид Урысейм и Президентыр щигъэгъуэзащ Черкесск къалэр илъэс 200 зэрырикъуар гъэлъэпIэным, мыхьэнэшхуэ зиIэ социальнэ IуэхущIапIэхэр зэгъэпэщыжыным ехьэлIауэ пщэрылъ ищIахэр зэрагъэзащIэм, къалэр зэIузэпэщ щIынымкIэ лэжьыгъэфI зэрырагъэкIуэкIым. ЗэIущIэм икIэм, Къэрэшей-Черкесым и Iэтащхьэм ди къэралым и ЛIыщхьэм фIыщIэ хуищIащ республикэ къалащхьэмрэ ди щIыналъэ псомрэ загъэужьыным и IуэхукIэ щIэгъэкъуэн сыт щыгъуи зэрыхъум папщIэ.