ЗыкIэлъывгъэплъ

2024 гъэм ди республикэм щыпсэу цIыху мин 327-м щIигъум медицинэ профилактикэ кIэлъыплъыныгъэхэр дра-гъэкIуэкIащ. Ар, абы ипэ ита илъэсым зыкIэлъызыгъэплъахэм нэхърэ проценти 20-кIэ нэхъыбэщ.

Диспансеризацэм, нэгъуэщI профилактикэ къэхутэныгъэхэм я фIыгъэкIэ, ди хэгъуэгум деж узыфэ мин 80-м нэс къыщIидзэ къудейуэ къыщIагъэщыфащ.
Республикэм зэпымычу щылэжьащ Iэзэгъуэ-къэхутэныгъэ мыхьэнэ зиIэ, «Поезда-здоровья» зи фIэщыгъэцIэ, бгъэкуэш хъу медицинэ комплексхэр. Апхуэдэ Iэмалым и фIыгъэкIэ, медицинэ щIэплъыкIыныгъэ, куууэ диспансеризацэ драгъэкIуэкIащ цIыху мин 49-м. Ари 2023 гъэм елъытамэ, мини 9-кIэ нэхъыбэщ.
«Иужьрей илъэси 6-м «Узыншагъэр хъумэн» лъэпкъ проектым ипкъ иту профилактикэ медицинэ къэхутэныгъэхэр ирагъэкIуэкIащ. Мы гъэм а лэжьыгъэм пащэнущ «Продолжительная и активная жизнь» лъэпкъ проектыщIэм тету. Ари хуэунэтIащ цIыхухэм я узыншагъэр хъумэным, егъэфIэкIуэным», — щитхащ и телеграм-каналым КъЧР-м и Iэтащхьэм.
Республикэм и лIыщхьэм иджыри зэ ягу къигъэкIыжащ игъуэу медицинэ профилактикэ кIэлъыплъыныгъэмрэ диспансеризацэмрэ егъэкIуэкIыныр узыншагъэр хъумэнымкIэ Iэмал нэхъыфIхэм ящыщу зэрыщытыр.
«Нэхъыщхьэр — дэтхэнэми мы зэманым зыкIэлъигъэплъыну лъэкIыныгъэ зэриIэращ. Диспансеризацэм республикэм щыпсэу псори хиубыдэнущ илъэсищ къэс зэ, цIыхум и ныбжьыр илъэс 40-м блэкIамэ — илъэс къэс. Абы папщIэ фызыщыпсэу щIыпIэхэм щылажьэ поликлиникэм зыхуэвгъэзэн хуейщ»,— жиIащ хэгъуэгум и лIыщхьэм.
Зыгъэхьэзырар БОРЭНЫКЪУЭ Мадинэщ