ЗыгъэпсэхупIэхэр йофIакIуэ

УФ-м и Правительствэм и вице-премьер Новак Александр лэжьыгъэ IуэхукIэ Къэрэшей-Черкес Республикэм къеблэгъащ. Хэгъуэгум и Iэтащхьэ Темрезов Рэшид щIыгъуу, абы къиплъыхьащ «Домбай», «Архъыз» турист-рекреационнэ комлексхэр, «Архъыз» аэропортыр здращIыхьыну Софийскэ аузым и Iэхэлъахэр. Вице-премьерымрэ ди хэгъуэгум и Iэтащхьэмрэ зэдрагъэкIуэкIа лъэныкъуитI зэIущIэм республикэм и социально-экономикэ зыужьыныгъэм тегъэчынауэ щытепсэлъыхьащ.

Темрезов Рэшид хьэщIэр щигъэгъуэзащ илъэс кIуам зыхуагъэувыжа пщэрылъхэр зэрагъэзэщIам, къыхагъэщхьэхукIа проектхэр ипэкIэ зэрыкIуэтам, нобэкIэ зытелажьэм. Псалъэмакъ нэхъыщхьэу къаIэтахэм ящыщщ «Архъыз» аэропортым и ухуэ ныгъэр, абы епха инфраструктурэр зэтегъэпсыхьыныр: гъуэгум, энергетикэм, ЖКХ-м епха лъэныкъуэгъазэхэр. Новак Александр зригъэлъэгъуам, нэIуасэ зызыхуищIа проектхэм арэзы техъуащ. ИнвестицэхэмкIэ, цIыхухэм лэжьапIэ ягъэгъуэтынымкIэ, туризмэр егъэфIэкIуэнымкIэ илъэс кIуам ялэжьам и гъэлъэгъуэныгъэфIу къилъытащ республикэм и ехъулIэныгъэхэр.
ыкъуитI зэпсэлъэныгъэм къыкIэлъыкIуэу, Новак Александррэ Темрезов Рэшидрэ межведомственнэ комиссэм и зэIущIэ ирагъэкIуэкIащ. Абы хэтащ УФ-м экономикэ зыужьыныгъэмкIэ и министрым и къуэдзэ Назаров Сергей, УФ-м и Президентым и полпредым и къуэдзэу СКФО-м щыIэ Надыкто Владимир, КъЧР-м и Правительствэм и тхьэ мадэ Аргун Мурат, хэгъуэгум и Правительствэм хэтхэр, министрхэр, ресурс компанэхэм я унафэщIхэмрэ курортхэм зегъэужьыным телажьэхэмрэ. Мыбдежым нэхъ убгъуауэ къытепсэлъыхьащ «Архъыз» ВГТРК-м и зыужьыныгъэм, инвесторхэм я къыхэлъхьэныгъэхэм, проектыщIэхэм, туризмэр зэрырагъэфIэкIуэну кIуэрабгъухэм. Архъыз жылагъуэм и Iэхэлъахэр туристхэм папщIэ тыншыгъуэу зэтегъэпсыхьыным гулъытэ хуащIащ. Апхуэдэ зы проектым ипкъ иту, лъэсырызекIуэхэм папщIэ псыхъуэ Iуфэм ирикIуэ километри 7,2-рэ зи кIыхьагъ гъуэгур, лъакъуэрыгъажэкIэ къэзыжыхьхэм папщIэ километри 5 зи кIыхьагъ гъуэгу щхьэхуэхэр зэтрагъэпсыхьынущ. КъызэралъытэмкIэ, абы курорт жылагъуи 4-р зэпищIэнущ, зыгъэпсэхупIэ щIыпIэхэр нэхъ хуит ищIынущ. Курортым и зыужьыныгъэм телажьэхэр щхьэхуэу къытепсэлъыхьащ ирагъэкIуэкI лэжьыгъэм яубзыхуа проектхэр зэрыкIуатэм. Темрезов Рэшид вицепремьерым фIыщIэ хуищIащ, республикэм и социально-экономикэ щытыкIэм щыгъуазэу гулъытэ къызэрыхуащIым, къэралым и дэIэпыкъуныгъэ къызэрырагъэзым папщIэ. АСЛЪЭНЫКЪУЭ Мадинэ. Архъыз жылагъуэ