ЖыгыщIэхэр мэбагъуэ

«Фэеплъ жыг хадэ» акцэр ди къэралым щрагъэкIуэкI Хэку зауэшхуэм ТекIуэныгъэ Иныр къызэрыщытхьрэ Илъэс 80 зэрырикъум и щIыхькIэ. Мы Iуэху дахэм и фIыгъэкIэ лIыхъужьхэм папщIэ къэкIыгъэ фэеплъхэр къоунэху, мэзхэри нэхъыбэ мэхъу. Акцэр 2020 гъэм ирагъэжьащ. Абы лъандэрэ, илъэс къэс фэеплъ «удзыфэхэр» Урысейм и щIыналъэхэм щыхасэ.Апхуэдэ жыгыщIэхэр щагъэтIысащ Дыгъужь Къурмэн и цIэр зезыхьэ Хъумэрэ курыт еджапIэм и пщIантIэм. А Iуэху щхьэпэр къызэфIагъэкIащ мы еджапIэм къыщIигъэкIа, зауэ операцэ хэхам хэт Ещэр Рустам и шыпхъум и къуэ, япэ классым щеджэ Дзэмыхь Айдэмыррэ абы и классэгъу цIыкIухэмрэ и гъусэу.

Мы Iуэхур лэжьыным лъабжьэ хуэхъуащ щIалэм и адэшхуэм игъэува хабзэр. АтIэ, адэшхуэр Хэку зауэшхуэм псэууэ къыщыхэкIыжым, гъащIэм, мамырыгъэм, унагъуэ быдэм я нагъыщэу къалъытэ хьэйуей (айва) къызыпыкIэ жыг цIыкIу и пщIантIэм щыхисауэ щытащ. Абы лъандэрэ илъэс 80 текIыжауэ, а хабзэ дахэм пащащ лIыхъужьым и щIэблэм. Нэхъри гушхуэныгъэ къыпхелъхьэ адэшхуэм и щапхъэм ирикIуэкIэрэ, ди Хэкур хъумэным ехьэлIауэ къуэрылъхум и зауэлI къалэнхэр нобэ зэригъэзащIэм. — Хэтсэ дэтхэнэ жыгымкIи дэ зэкъудогъэувэ иджырей, къэкIуэну щIэблэр, нэхъыжьхэм зэрахьа лIыгъэр ящыдмыгъэгъупщэу. Дэ ди къалэнщ мамырыгъэм папщIэ зи гъащIэр зыта сэлэтхэр зэи тщымыгъупщэныр. Ахэращ ТекIуэныгъэ Иныр къытхуэзыхьар, ди къэкIуэнум, ди къэралым, дэтхэнэ унагъуэми ди лъапIэныгъэ нэхъыщхьэ мамырыгъэр къытхузэзыгъэпэщар, — жиIащ Рустам.

«Фэеплъ жыг хадэ» акцэм Рустамрэ Айдэмыррэ жыджэру зэрыхэлэжьыхым къегъэлъагъуэ тхыдэ щIэиныр щIэблэм яIэщIэлъхьэным мыхьэнэшхуэ зэриIэр. Хьэйуей жыгыщIэр хъунущ блэкIамрэ къэкIуэнумрэ зэзыпх лъэмыж, мамырыгъэм, зэныбжьэгъугъэм, Хэкур зыхъумахэм я фэеплъыр хъумэным мыхьэнэшхуэ зэраIэр цIыхухэм ягу къигъэкIыжу.

Иужьрейуэ жытIэнщи, нобэрей Iуэхум хэта дэтхэнэри илъэс Iэджэ дэкIа нэужь мыбы къакIуэу лIыхъужьхэм захуигъэщхъыну, абыхэм я лIыгъэр, апхуэдэуи а жыгыр езым зэгуэр зэрыхисар игу къигъэкIыжыну Iэмал хъарзынэщ. КърекI мы жыгхэр быдэрэ къарууфIэу, гъащIэм, фэеплъымрэ мамырыгъэмрэ я дамыгъэу.

КъЧР-м и Iэтащхьэмрэ и Правительствэмрэ я пресс-къулыкъу