Къэрэшей-Черкесым и Iэтащхьэ Темрезов Рэшидрэ республикэм и муфтий Эркенов Мухьэмэд-хьэжырэ хэтщ Казань щекIуэкI, «Россия – Исламский мир: KazanForum» XVI Къэралыбэ экономическэ форумым.
Мыр Урысей Федерацэм и хэгъуэгухэмрэ ислъам дунейм и къэралхэмрэ я экономическэ зэдэлэжьэ- ныгъэм зиужьыным щхьэпэ стратегическэ утщ.
— Мы гъэм нэхъыщхьэу тегъэщIапIэ ящIащ ислъам финансхэм, логистикэм, агропромышленнэ комплексымрэ туризмэмрэ зайгъэужьыным хуэунэтIа кIуэрабгъухэр. Абыхэм я лъэныкъуэкIэ ди республикэм хэкIыпIэшхуэхэр иIэщ. Хэгъуэгур Форумым зэрыхыхьэм лъэкIыныгъэ кърет экономикэм ягъэнэхъапэ и IэнатIэхэм къыщагъэщхьэпэ, жыжьэ кIуэ проектхэр утыкум ирихьэну.
Дэ къытпэплъэт IуэхукIэ гъэнщIа программэ. Абы и къэухьхэм итщ «Использование потенциала парт-
нерских финансов в экономическом развитии Российской Федерации» пленар зэIущIэр, жыжьэ кIуэ бгъэдыхьэкIэм хуэлажьэ «Россия исламский мир» Гупым и зэхуэсыр, «RUSSIA HALAL EXPO» гъэлъэгъуэныгъэм КъЧР-р хэшэныр.
Форумыр фIы дыдэу къызэрызэрагъэпэщам папщIэ фIыщIэ яхузощI УФ-м и Правительствэм и тхьэмадэм и къуэдзэ Хуснуллин Маратрэ Тэтарстаным и Iэтащхьэ Минниханов Рустамрэ, — щыжиIащ ди хэгъуэгум и Iэтащхьэм и къэпсэлъэныгъэм.
КъинэмыщIауэ, КъЧР-м экономикэ зыужьыныгъэмкIэ и Министерствэм игъэхьэзыра стендым щыплъагъунут республикэм и предприятэ нэхъ лъэщхэр — «Аквалайн»-р, «Дамате»-р, «Бумфа Групп»-р, къинэмыщIауэ, ди хэгъуэгум и хьэрычэт цIыкIумрэ ику итымрэ къыщIагъэкI продукцэхэр. «Форумым и утыкум Къэрэшей-Черкесым ирихьа продукцэхэр фIагъ яIэу, хуэсакъыу къыщIагъэкI, хэплъхьэ мыхъун пкъыгъуэу зыри къыщыгъэсэбэпакъым», – жиIащ ди республикэм и лIыщхьэм.
Темрезов Рэшид къыхигъэщащ Къэрэшей-Черкесым «хьэлэл» зытет продукцэр зэрыщыцIэрыIуэр, зэрызэбграхыр. Абы къегъэлъагъуэ ди республикэр ислъам къэралхэм зэрадэлажьэр, дяку дэлъ сату зэпыщIэныгъэхэр нэхъри зэрагъэбыдэр.
АтIэ, мыпхуэдэ гъэлъэгъуэныгъэхэм лъэкIыныгъэ къыуат хэгъуэгум и зэфIэкIхэр хэIущIыIу пщIынымкIэ, республикэм инвесторхэр къешэлIэнымкIэ, хьэрычэт Iуэхумрэ туризмэмрэ зегъэужьынымкIэ.
Форумым ипкъ иту зэхуэзащ Хуснуллин Маратрэ Темрезов Рэшидрэ. Ахэр тепсэлъыхьащ гъуэгу, инженер инфраструктурэхэм зегъэужьынымкIэ, къулыкъущIапIэхэм капитальнэ ухуэныгъэхэр щегъэкIуэкIынымкIэ лэжьыгъэхэр зэрыкIуатэм, абы папщIэ зэфIах Iуэхугъуэхэм.
Вице-премьерым жиIащ Къэрэшей-Черкес Республикэм щыпсэухэм я гъащIэр егъэфIэкIуэным ехьэлIауэ хэгъуэгум и унафэщIхэм лъэкI къызэрамыгъэнар и фIэщ зэрыхъур.
КъинэмыщIауэ, лъэныкъуитIыр къытеувыIащ ди республикэм кхъухьлъатэ комплес щыухуэнымкIэ проектыр зэрагъэзащIэм.
Ди республикэм и лIыщхьэм Хуснуллин Марат фIыщIэ хуищIащ Къэрэшей-Черкесым щагъэзащIэ, мыхьэнэшхуэ зиIэ проектхэм гулъытэ ин къызэрыхуищIым, ахэр гъэзэщIэнымкIэ щIэгъэкъуэныфI зэрыхъум папщIэ.
КъЧР-м и Iэтащхьэмрэ и Правительствэмрэ я пресс-къулыкъу
Больше на Черкес хэку
Подпишитесь, чтобы получать последние записи по электронной почте.
