Къэрэшей-Черкес Республикэм и муфтий Эркенов хьэжы Мухьэммэдрэ IэбуХьэнифэ и цIэр зезыхьэ республикэ ислъам институтым и ректор Каитов хьэжы Ахьмэдрэ зэIущIэ купщIафIэ зэдрагъэкIуэкIащ. Ректорыр къытепсэлъыхьащ еджэгъуэ илъэсым къриубыдэу ирагъэкIуэкIа лэжьыгъэм. ЖыIэпхъэщи, ректорыщIэм лэжьыгъэм бгъэдыхьэкIэщIэхэр, зэхъуэкIыныгъэхэр хилъхьащ икIи ахэр лъэужьыншэ, нэд хъуакъым. Эркенов хьэжы Мухьэммэд лъагэу къилъытащ хьэжы Ахьмэд, ар зи пашэ гупым ирагъэкIуэкIа лэжьыгъэр.
Псом нэхърэ нэхъыщхьэу къыхигъэщащ институтым студенту щеджэм я бжыгъэр нэрылъагъуу зэрыхэхъуар — хуэдипщIкIэ. Ислъам институтым щеджэныр, дин щIэнгъуазэр къызэрыхахыр нэрылъагъу ещI апхуэдэ бжыгъэм. КъинэмыщIауэ, мы гъэм институтым и пщIантIэм къыщызэIуахащ нэрыбгэ 200 зэ щIыхьэгъуэу зыщIэхуэ мэжджыт. Ари щхьэмыпэкIэ къэнакъым студентхэм я щIэныгъэм хагъэхъуэным, дин Iуэхугъуэхэр тыншу зэрахьэным.
Каитов хьэжы Ахьмэд республикэм и муфтийр зэрыщигъэгъуэзащи, институтым ехьэлIа дэфтэрхэр, лэжьакIуэ гупыр, дерсхэр, дерсщIыб лэжьыгъэр — псори зэтрагъэпсыхьауэ, тыншу лэжьыгъэр йокIуэкI. Иджыри зы зэхъуэкIыныгъэ къыхэгъэщыпхъэщ. Ар зэхьэлIар зи узыншагъэкIэ дагъуэ зиIэхэм, зэхэзекIуэныр къызэхьэлъэкI, ауэ дин щIэнгъуазэхэм хуэпабгъэхэм я тыншыгъуэмрэ шынагъуэншагъэмрэщ. Абы ипкъ иткIэрэ, къызэрагъэпэщащ пщIантIэми, институт кIуэцIми, мэжджытми тыншу зэрыщызэхэзекIуэн Iэмалхэр.
Эркенов хьэжы Мухьэммэд къыхигъэщащ дяпэкIи институтым и зыужьыныгъэм, и лэжьыгъэкIэ ефIэкIуэным шэч къызэрытримыхьэр. ИужькIи муфтийр яIущIащ студентхэм, зэпсэлъэныгъэ гъэщIэгъуэн зэдрагъэкIуэкIащ, диным и мыхьэнэр, муслъымэным и хьэл-щэныр, и Iэдэбыр зыхуэдэн хуейр и купщIэу. УпщIэхэр куэдащ, дэтхэнэми жэуапхэр игъуэтащ, зэчэнджэщащ, щхьэж и гупсысэ къыхилъхьащ.
ШЫБЗЫХЪУЭ Ирэ
Больше на Черкес хэку
Подпишитесь, чтобы получать последние записи по электронной почте.
