Жьакуэ — Али-Бэрдыкъуэ къуажэхэм я Iэхэлъахэм Къэрэшей-Черкесым и машинэ зэдэжэ (авторалли) спортымкIэ чемпионат щызэхэтащ. Ар траухуащ ТекIуэныгъэм и Илъэс 80-м.
Чемпионатым къришэлIащ Урысейм и къуапэ зэхуэмыдэхэм къикIа спортсмен 40 — Москва, Санкт-Петербург, Краснодар, ТIуапсэ, Донецк, Горловкэ, Луганск, Головки, Севастополь, Сочэ къалэхэм, нэгъуэщIхэми.
А Iуэхугъуэр къызэрымыкIуэу телъыджэ ящыхъуащ республикэм щыпсэухэм. УнагъуэкIэрэ абы еплъыну къекIуэлIащ сабийхэри, щIалэгъуалэри, дадэ-нанэхэри. Сытым хуэдиз гухэхъуэ къарита спорт машинэ дахэхэр зылъэгъуа щIалэ цIыкIухэм! Машинэхэр здызэхуэса, Хьэбэз къуажэм и утыку нэхъыщхьэм деж абыхэм лъэкIыныгъэ яIащ гъунэгъуу еплъыну, спортсменхэм ябгъэдэтыну, ящIыгъуу сурэт зытрагъэхыну.
ХьэщIэхэмрэ чемпионатым хэтынухэмрэ гуапэу кърагъэблэгъащ Къэрэшей-Черкесым физическэ культурэмрэ спортымрэкIэ министрым и къуэдзэ Петренко Андрейрэ Хьэбэз муниципальнэ район администрацэм и Iэтащхьэм и къуэдзэ Унэжь Олегрэ.
— Илъэс кIуам япэ дыдэу автоспортымкIэ зэхьэзэхуэ щрагъэкIуэкIауэ щытащ ди республикэм. Апщыгъуэми къыхахат Хьэ-бэз районыр, къуажитIым я Iэхэлъахэр. Гъуэгур, щIыпIэхэр ягу зэрырихьар къыхалъытэу, Урысейм и Кубокым ипэ къихуэ зэдэжэр мыбдеж къыщахьащ, икIи абы арэзы зэрытехъуам шэч къытетхьэкъым, — къыхигъэщащ Петренко Андрей.
Спортсменхэр гъуэгу темыхьэ щIыкIэ я гукъыдэжыр къыхуаIэтащ Хьэбэз щэнхабзэмкIэ Унэм и уэрэджыIэхэм къызэрагъэпэща концертымкIэ.
Махуэ псом екIуэкIа зэдэжэм емышу еплъащ джабэхэм, бгылъэхэм, гъуэгубгъухэм «текIутауэ» тета цIыхухэр.
Чемпионат нэужьым спортсменхэм гухэхъуэ яIэу зэрыкIуэжам хуэдэу, ди цIыхухэми гукъыдэжышхуэ мы зэхьэзэхуэм къазэрыритар шэчыншэщ.
Зыгъэхьэзырар АСЛЪЭНЫКЪУЭ Мадинэщ
Больше на Черкес хэку
Подпишитесь, чтобы получать последние записи по электронной почте.
