Зэхэуэ гуащIэм и фэеплъ

Хэку зауэшхуэм ди къэралым къыщихьа ТекІуэныгъэ Иным и напэкІуэцІ нэхъыщхьэхэм ящыщ зыщ Курск зэхэуэр. Ар тхыдэм хыхьащ зауэм и зэпыгъэзапІэ, ар зэриухынур зэлъыта хъуа зы Іыхьэу. Курск зэхэуэр 1943 гъэм бадзэуэгъуэм и 5-м щегъэжьауэ шыщхьэІум и 23-м нэгъунэ екІуэкІащ. Ар зэриухрэ мы гъэм илъэс 82-рэ ирикъуащ. А зэхэуэ гуащІэр Іыхьищу ягуэш тхыдэджхэм: Курск зыхъумэжыныгъэ операцэ — бадзэуэгъуэм и 5-23-м къриубыдэу; Орловскэ ебгъэрыкІуэныгъэ операцэ — бадзэуэгъуэм и 12 — шыщхьэІум и 18; Белгородско-Харьковскэ ебгъэрыкІуэныгъэ операцэ — шыщхьэІум и 3-23-м.

Бадзэуэгъуэм и 12-м Прохоровкэ гъущІгъуэгу станц Іэхэлъахэращ къыщыхъуар ЕтІуанэ Дунейпсо зауэм и нэхъ лъэрыхь дыдэу тхыдэм хыхьа танк зэхэуэр. «Кутузов», «Румянцев» операцэхэм къапэкІуэу, Орёлрэ Белгородрэ хуит къащІыжащ. ШыщхьэІум и 23-м Харьков нэмыцэм къыІэщІахыжащ. Апхуэдэ зэхэуэ гуащІэхэм бийм фІы хихакъым, и лъэнкІапІэр хуабжьу щІихащ хэщІыныгъэу игъуэтам: дивизэ 30, абы щыщу танк дивизи 7, сэлэт, офицер мин 500-м щІигъу, танкыу, Іэщэфащэу мин 1,5-м щІигъу, кхъухьлъатэ мини 3,7-м щІигъу. Пэжщ, Совет Союзым и Къару Узэдахэми хэщІащ хуабжьу: цІыху мин 860-м нэхъыбэ.

Абы щыщу мин 255-р яукІащ е хъыбарыншэу кІуэдащ Зэхэуэм и купщІэу щытар, и мыхьэнэр къэлъытэгъуейщ. Ар зауэм и зэпыгъэзапІэ хъуауэ убж хъунущ, ди дзэхэм я кІэн нэхъ къикІыу, бийм къарукІэ ефІэкІыу. Абы къинэмыщІауэ, ди къэралым Курск зэхэуэм къыщихьа текІуэныгъэм хуабжьу къигъэтІэсхъащ армырами дзыхь зыхуамыщІыж Германием хамэ къэралхэм къыхуаІэ зэхущытыкІэхэр. Уеблэмэ дзыхь къыхуащІыжыххэтэкъым жыпІэми хъуну апхуэдэт иджы Германием и Іуэхур.

Иджы зыми жиІэжтэкъым ар зыри зытемыкІуэфын къэралу. Фашистыдзэм хьэбэсабэр Курск къыщыхуахьа шыщхьэІум и 23-р зауэ щІыхьым и Махуэу Урысейм щагъэуващ. Нобэ украин нацистхэм, Украинэм и пашэм а блэкІа тхыдэр, ар щІыхькІэ зыгъэнщІа я адэжьхэр ягу къэкІыжыну лейтэкъым. Апщыгъуэм, 1943 гъэ жыжьэм украин сэлэтри, совет зауэлІри зы къарууэ, я блыпкъ зэгъэкъуауэ зы бийм — нэмыцэм пэщІэтащ. Нобэ апхуэдэ лІыгъэмрэ цІыхугъэмрэ дэ тщыгъупщэн дыхуиткъым. Фэеплъыр — мыкІуэдын щІэинщ!

ШЫБЗЫХЪУЭ Ирэ