Къэрэшей-Черкесым щыщ, зауэ операцэ хэхам и ветеранхэр «Зэгъусэу дытекӀуэнущ» форумым хэтщ. Москва къалэм, «Урысей» лъэпкъ Купсэм щыщӀидзащ «Зэгъусэу дытекӀуэнущ» форумыр — ветеранхэр мамыр гъащӀэм хэгъэзэгъэжынымкӀэ, абыхэм я унагъуэхэм ядэӀэпыкъунымкӀэ я зэфӀэкӀхэмкӀэ здызэпсэлъэн, здызэдэгуэшэн утыку нэхъыщхьэр. Форумым кърихьэлӀащ къэралым и щӀыпӀэ псоми къикӀа лӀыхъужь 1000-м щӀигъу — СВО-мрэ нэгъуэщӀ зэпэщӀэтыныгъэхэмрэ я ветеранхэр, «ЛӀыхъужьхэм я зэман» кадр программэмрэ хъумакӀуэхэм папщӀэ хэ гъуэгу программэхэмрэ хэтхэр, ди лӀыхъужьхэм я унагъуэхэм щыщхэр, жылагъуэ зэгухьэныгъэхэмрэ властым и къулыкъухэмрэ я лӀыкӀуэхэр. Абыхэм яхэтщ Къэрэшей-Черкесым щыщ, зауэ операцэ хэхам и ветеранхэр: Мутчаев Дахир, Хьэткъуэ Ислъам, Заичкин Александр, Бытдаев Арсен, Гусхэ Замир сымэ. Форумым ди лӀыхъужьхэм дэтхэнэми къыздихьащ и щхьэкӀэ игъэунэхуа Ӏуэху закъуэ мыхъуу, атӀэ адрейхэми ядэгуэшэну, ядэӀэпыкъуну, щӀыналъэ зэмылӀэужьыгъуэхэм къикӀа я лэжьэгъухэм я жэрдэмхэм щӀэдэӀуну зэрыхьэзырыр.
Ахэр «Право на службе ветерана» зэӀущӀэм хэтынущ. Абдеж щытепсэлъыхьынущ хэкупсэхэм къагъэзэжа нэужь я гъащӀэм ехьэлӀа хабзэ, социальнэ Ӏуэхугъуэшхуэхэм. «Урысейм и Президентым и фӀэхъус псалъэм къыщыхигъэщащ Хэкум и хъумакӀуэхэм ядэӀэпыкъуныр — ди къалэну зэрыщытыр, къэралымрэ жылагъуэмрэ зэдэлэжьэну къызэрытпэщытыр. Дауи, къэралым и УнафэщӀым и псалъэр ӀупщӀщ: Хэкур зыхъумахэмрэ ноби зыхъумэхэмрэ ди дэӀэпыкъуныгъэр зыхащӀэн папщӀэ дызэгъусэу а Ӏуэхум делэжьын хуейщ. Апхуэдэ зэӀущӀэхэращ зэпсэлъэныгъэ узыншэ зэтегъэувэнымкӀэ, цӀыхухэм я жэрдэмхэр зэхэхынымкӀэ, дэӀэпыкъуныгъэр нэхъ щхьэхуэу, нэхъ сэбэп хъууэ щӀынымкӀэ щхьэпэ хъур», — МАХ-м щитхащ ди республикэм и Ӏэтащхьэм.
Больше на Черкес хэку
Подпишитесь, чтобы получать последние записи по электронной почте.
