Зэдэлэжьэныгъэр гъерэтыфIэу

КъЧР-м и Iэтащхьэ Темрезов Рэшид хэтащ хэгъуэгу МВД-м и коллегием: 2024 гъэм ялэжьар къапщытэжащ, къалэныщIэхэр зыхуагъэувыжащ. ЗэIущIэм хэтащ УФ-м и МВД-м и Управленэ нэхъыщхьэу СКФО-м щыIэм и унафэщI Бачурин Сергей, КъЧР-м и ФСБ-м и Управленэмрэ хабзэхъумэ къулыкъухэмрэ я унафэщIхэр, МВД-м и лэжьакIуэхэр.

Темрезов Рэшид къыщыпсалъэм къызэрыхигъэщамкIэ, илъэс кIуари, абы и щыпэгъэхэри зауэ операцэ хэхар егъэкIуэкIыным, ди мыныбжьэгъу къэралхэм Урысей Федерацэм и жылагъуэ-политикэ щытыкIэр зэхатхъуэну зэрыпылъым, Ищхъэрэ-Кавказ хэгъуэгуми къызэреныкъуэкъум епхауэ щытащ. «Хабзэхъумэ, къэрал унафэщI къулыкъухэри, МВД-ри зэрызэдэлажьэм, Къэрэшей-Черкесым щыпсэухэм яIэ къызэгъэпэщыкIэ губзыгъэм и фIыгъэкIэ нобэ республикэм и щытыкIэр зэпIэзэрытщ. Жылагъуэ-политикэ щытыкIэ тэрэз зэрыдиIэр къегъэлъагъуэ УФ-м и Президентымрэ республикэм и Парламентымрэ я хэхыныгъэхэр, щэнхабзэм, спортым хуэгъэза дауэдапщэ инхэр ди щIыналъэм зэрыщедгъэкIуэкIам. Я къалэн нэхъыщхьэхэр зэрагъэзащIэм къинэмыщIауэ, хабзэхъумэ къулыкъущIэхэм СВО-р здекIуэкI щIыпIэхэм IэпщIэлъапщIэу, хахуэу къэралым и хьисэпхэр щахъумэ», — жиIащ ди хэгъуэгум и лIыщхьэм. Республикэм туристу къекIуалIэм и бжыгъэр кIуэ пэтми зэрыхэхъуэм папщIэ, Темрезов Рэшид мыхьэнэшхуэ иIэу къилъытащ дяпэкIэ терроризмэмрэ экстремизмэмрэ, экономикэ щIэпхъаджагъэхэмрэ гъуэгу-транспорт къэхъугъэхэмрэ къару зэхэлъкIэ бэнэныгъэ ядегъэкIуэкIыным. Сыт щыгъуи гъерэтыфIэу зэрызэдэлажьэм папщIэ фIыщIэ яхуищIащ генерал-полковник Бачурин Сергей, КъЧР-м и МВД-м и унафэщI Нефедов Владимиррэ Министерствэм и лэжьакIуэхэмрэ. Зи къулыкъукIэ нэхъ къыхэжаныкIахэм ФIыщIэ тхылъхэр яхуигъэфэщащ