Черкесск къалэм дэт къэрал филармонием волонтёрым и Махуэм, #МЫВМЕСТЕ Урысейпсо штабым и акцэр илъэситху зэрырикъуам ехъулIэу махуэщI дауэдапщэ щрагъэкIуэкIащ. А махуэм ягъэлъэпIащ псэ къабзагъэр, нэгъуэщIхэм зыщIагъэкъуэнымкIэ хьэзырыныгъэр къызэбэкI цIыху гъэщIэгъуэнхэр – цIыху къызэрыкIуэхэр, псапащIэ фондхэм хэтхэр, хыхьэкIым пыщIахэр, къулыкъущIэхэр, нэгъуэщIхэри.
Дауэдапщэм хэтащ Къэрэшей-Черкесым и Правительствэмрэ Парламентымрэ, федеральнэ, муниципальнэ къулыкъущIапIэхэм къабгъэдэкIа лIыкIуэхэр. Республикэм и Правительствэм и тхьэмадэм и къуэдзэ Поляков Евгений волонтёрхэм махуэщIымкIэ яхъуэхъуащ икIи къыхигъэщащ абыхэм хэгъуэгум и зыужьыныгъэм, зэпIэзэрытыныгъэм къаруушхуэ зэрытрагъэкIуадэр.
Щхьэхуэу къытеувыIащ зауэ операцэ хэхам хэт зауэлIхэм сыт и лъэныкъуэкIи защIэзыгъакъуэ волонтёрхэм. СВО-м хэтхэм къабгъэ дэкIыу волонтёр зэщIэхъееныгъэм хэт дэтхэнэми захуигъэзащ зауэм и ветеран, подполковник Магомедов Рустам. — Тхьэгъэпсэу яжесIэну сыхуейщ СВО-м щыIэ щIалэхэм еш ямыIэу ядэIэпыкъу цIыху псоми. Сыт хуэдэ псалъэ лъапIэри фхуэфащэщ. «СВОих не бросаем!» псалъэхэр фэращ лъэрыхь зыщIар. А къыхуеджэныгъэр фи гъуазэу махуэ къэс Iуэху хьэлъэ бжыгъэ фолэжь.
Фи псэемыблэжыныгъэм фронтым щыIэ щIалэхэми къару къарет: абыхэм зыхащIэ я щIыбагъкIэ къару, ахэр къызыфIэIуэху зэрыщыIэр. Фэ ращ шхынкIи, хущхъуэкIи техникэ зэмылIэужьыгъуэкIи, щыгъын хуабэкIи япэу къытпыкъуэкIыр! Зэхэуэхэр здекIуэкI щIыпIэ пхыдзахэм а гуманитар хьэлъэр къыднэзышэсыр! — жиIащ Магомедовым. МахуэщIым ипкъ иту республикэм и Iэтащхьэ Темрезов Рэшид къыбгъэдэкIа фIыщIэ тхылъхэр цIыху 90-м щIигъум хуагъэфэщащ. Апхуэдэщ «Мы вместе» зэщIэхъееныгъэм хэтхэр, доброволец-къегъэлакIуэхэр, районхэм я унафэщIхэр, абыхэм я къуэдзэхэр, цIыху къызэрыкIуэхэр. «Единая Россия» партым хэт, КъЧР-м и Парламентым и депутат Черняевэ Татьяни фыщIэ тхылъхэр республикэм и ЦIыхубэ ЗэIущIэм къыбгъэдэкIауэ волонтёрхэм яхуигъэфэщащ.
«Псэ къабзагъэр, гущIэгъуныгъэр сыт щыгъуи ди лъэпкъхэм яхэлъа хьэл-щэныфIхэм ящыщщ. Мы илъэсхэм къриубыдэу ковидым щыгъуэ госпиталхэм фадэIэпыкъуащ, закъуэныгъэр, жьыгъэр зи натIэ хъуа цIыхухэм защIэвгъэкъуащ, нобэ — передовойм гуманитар хьэлъэр егъэхьыным жыджэру фыпыщIащ…
Узыншагъэ, зэIузэпэщыныгъэ фыщымыщIэну сывохъуэхъу! «Мы вместе» форумым ипкъ иту ди къэралым и Президент Путин Владимир зэрыжиIащи: «Фызыхуэсакъыж, сыту жыпIэмэ, фэ фызытет лъагъуэм деж гухэр мафIэу къоунэху. А мафIэм, а гу пщтырхэм дэ псори дыхуэныкъуэщ», — жиIащ депутатым.
ЧЫРБЫЖ Иринэ
Больше на Черкес хэку
Подпишитесь, чтобы получать последние записи по электронной почте.
