Ди республикэм и къалащхьэм щызэхэтащ махуэ бжыгъэкIэ екIуэкI «Ищхъэрэ Кавказым щыпсэу лъэпкъхэм я зэныбжьэгъугъэ» велозэдэжэр. Урысейм, Белоруссием, Къэзахъстанымрэ Хьэрып Зэгуэт Эмиратхэмрэ я велогонщики 100-м щIигъур Черкесск къынэсащ мы зэхьэзэхуэм ипкъ иту Адыгэ Республикэмрэ Краснодар краймрэ къыщызэрагъэпэща гъэунэхуныгъэ хьэлъитIыр къызэранэкIауэ.
Черкесск дэсхэмрэ и хьэщIэхэмрэ хэплъащ къалэм и Ищхъэрэ район цIыкIум километр 70 хъууэ, хуэшэмэджыпэу гъэпсауэ зэдэжэм хухаха «критериум» гъуэгум зэрыщызэпеуам, дэтхэнэ спортсменми и IэкIуэлъэкIуагъыр, текIуэныгъэм щIэбэныным нэрыгъыу хуиIэр, Iуэхум Iущу, уеблэмэ хьилэшыуэ зэрыбгъэдыхьэр къызэригъэлъэгъуам.
КъыкIэлъыкIуэ махуэм зэдэжэр яхьынущ «Черкесск — Гумыщхьэ щхьэдэхыпIэ» гъуэгум. Ар хуабжьу гугъуу икIи щIэщыгъуэу щытыну жаIэ, Къэрэшей-Черкесым и щIыуэпс дахащэм и курыкупсэм иту зэхьэзэхуэр зэрекIуэкIынум къыхэкIкIэ. Аращи, велозэдэжэм хэтхэми абы и хьэщIэхэми зрагъэлъагъуфынущ иджырей зэманым декIу, сыт щыгъуи зызыужь Черкесски, зыми хуэ бгъадэ мыхъун, тхыдэ жыжьэр зыхъумэ ди къуажэхэри, жылагъуэхэри. Гуапэ мыхъуу къанэкъым Урысейм щыпсэу лъэпкъхэм я зэкъуэтыныгъэм и Илъэсым мы зэхьэзэхуэхэр зэрекIуэкIым.
Абы дызэрепх хэгъуэгухэмрэ цIыхухэмрэ икIи дегъэгушхуэ КъЧР-м щыпсэу лъэпкъхэм я псэкупсэ, щэнхабзэ щӀэиным и Илъэсым абы и ужь дызэрихьэфам. Мыпхуэдэ спорт дауэдапщэ ин ди республикэм къызэрыщетхьэжьэм иджыри зэ лъэкIыныгъэ къыдет урысей хэгъуэгухэми, хамэ къэралхэми къикIа ди хьэщIэхэм Къэрэшей-Черкесым и беягъымрэ и дахагъымрэ ядгъэлъагъуну.
ЛЫХЬ Тимур
Больше на Черкес хэку
Подпишитесь, чтобы получать последние записи по электронной почте.
