Узыншагъэ быдэр — жылагъуэм и лъабжьэщ

КъЧР-м и Жылагъуэ палатэм «Іэнэ хъурей»-м ипкъ иту зэІущІэ щекІуэкІащ «Диспансеризация и репродуктивное здоровье женщин» фІэщыгъэцІэр иIэу.

ЗэІущІэм хэлэжьыхьащ цІыхухэм я узыншагъэм телажьэ ІэщІагъэлІхэмрэ экспертхэмрэ. «Бзылъхугъэм и узыншагъэр сабий къыхуэхъуным тегъэпсыхьауэ щытыныр — унагъуэм и узыншагъэм и лъабжьэщ, лъэпкъымкІэ щытыкІэ зэпІэзэрытщ. Ар къыгуэхыпІэ имыІэу епхащ цІыхум и псэукІэм и фІагъым, хэгъуэгум и социальнэ, экономикэ зыужьыныгъэм», — къыхигъэщащ КъЧР-м и Жылагъуэ палатэм и пашэ Ляшовэ Еленэ.

Іуэхум хэбгъэкІ хъунукъым цІыхухъум и узыншагъэм и мыхьэнэри. Абы къыдэкІуэу, зэІущІэм зэрыщыжаІащи, хэгъуэгум щыпсэу цІыхухъухэр хуэхуэмыхущ медицинэ и лъэныкъуэкІэ, зыкІэлъагъэплъыным, зрагъэІэзэным хуэпІащІэкъым. Апхуэдэуи, езыхэм я узыншагъэм зэран къызэрыхуахьым къыщымынэу, щІэблэмкІи зэран мэхъу. Абы къыхэкІыу, мыхьэнэшхуэ иІэщ диспансеризацэм, репродуктивнэ узыншагъэр зыхуэдэр къэхутэным.

ГъащІэр нэхъыфІ щІыным, цІыхубэм и узыншагъэр егъэфІэкІуэным теухуа лъэпкъ проектхэр пхыгъэкІынымкІэ апхуэдэ лэжьыгъэм и мыхьэнэр къыхагъэщащ къэпсэлъахэм. Тегъэчынауэ ирипсэлъащ къалэнхэм, зэфIэхыпхъэ Іуэхугъуэхэм. ЗэІущІэм хэтахэр ирипсэлъащ гъащІэр нэхъ кІыхь хъунымкІэ зехьэпхъэ гъерэтхэм. Абы и зы Іыхьэщ бзылъхугъэм и узыншагъэр, бын къыщІэхъуэнымкІэ узыншагъэ лъэпощхьэпо имыІэным власть къулыкъухэри, медицинэ ІуэхущІапІэхэри тегъэчынауэ зэрытелэжьапхъэр.

Апхуэдэу, бзылъхугъэ лъэщыджэм зэрыдэІэпыкъуфыну программэ къэгъэщІын зэрыхуейри жаІащ. Къыхагъэщащ узыншагъэр хъумэн лэжьыгъэм уней, хьэрычэтыщІэ медицинэ ІуэхущІэхэри къыхашэныр лей зэрымыхъунур. Къэрал медицинэ къулыкъухэмрэ унейхэмрэ зэгъусэу узыншагъэр егъэфІэкІуэным телэжьэныр цІыхухэмкІэ сэбэп хъунут. «Шэч къытетхьэкъым зэдэлэжьэныгъэр хэгъуэгум узыншагъэр щегъэфІэкІуэнымрэ репродуктивнэ щытыкІэмрэ щхьэпэну зэрыщытым», — щІагъэбыдэжащ зэІущІэм и лэжьыгъэр.