Унэмрэ зэуапIэмрэ зэзыпх лъэмыж

Къэрэшей-Черкес Республикэм ядищтащ СВО-м зыщIэгъэкъуэнымкIэ «Всё для Победы!» Урысейпсо акцэр. Абы ипкъ иткIэрэ, щIышылэм и 20-м Черкесск къалэм дэт къэрал филармонием псапащIэ акцэ-концерт щекIуэкIащ. Абы и къызэгъэпэщакIуэу щытащ хэгъуэгу «ЦIыхубэ фронт»-мрэ филармониемрэ. Абы къекIуэлIащ КъЧР-м и Iэтащхьэмрэ и Правительствэмрэ я Администрацэм и унафэщIым и къуэдзэ Хубиев Марат, КъЧР-м и ЦIыхубэ ЗэIущIэм (Парламентым) и депутатхэр, СВО-м и ветеранхэр, республикэм и къулыкъущIапIэхэм, IуэхущIапIэхэм къабгъэдэкIахэр, псапащIэ Iуэхум гукIи псэкIи пыщIахэр, лъэпкъхэм къабгъэдэкIа творческэ интеллигенцэр.

— ПIалъэ кIэщIым, уеблэмэ махуэ зыбжанэм къриубыдэу Iуэхур къызэдгъэпэщащ икIи хуабжьу жыджэру къытпэджэжащ филармонием и артистхэр. Зэхэту къызэдгъэпэща Iуэхум къызэрыпыкъуэкIа жэуаплыгъэм, зэхэщIыкI лъагэм и цIэкIэ фIыщIэ псалъэхэр яхуэфащэ дыдэщ. КъинэмыщIауэ, концертым къекIуэлIа, акцэм зи Iыхьэ хэзылъхьа дэтхэнэми фи зэхэщIыкIым папщIэ тхьэм фигъэпсэу! МащIэкуэд иIэкъым псапащIэ Iуэхум, дэтхэнэми и зы сомри, и зы кIэпIейкIэри ди зауэлIхэм, СВО-м хуэдунэтIынущ, сэбэп хъунущ. Мы акцэр — унэмрэ зэуапIэхэмрэ яку дэлъ лъэмыжщ, — жиIащ КъЧР-м и «ЦIыхубэ фронт»-м и пашэ Каппушевэ Людмилэ икIи сыт щыгъуи щIэгъэкъуэнрэ гъусэ пэжу къакъуэт республикэм и Парламентым и депутатхэр псалъэ гуапэхэмкIэ къыхигъэщащ. ЖиIащ акцэм къыхэкIымкIэ зэпыщIэныгъэ Iэмалхэр, оборудованэ, техникэ зэхуэмыдэхэр, медицинэ хьэпшыпхэр, хущхъуэ хэр къызэращэхунур.

ЗыщIагъэкъуэнущ «Домбай» подразделенэщIэм. Псалъэм пищащ утыкум къихьа, СВО-м хэт ди адыгэ щIалэ хахуэ Блымгъуэт Салим: «Нобэ зэуапIэхэм Iут, СВО-м хэт псоми къабгъэдэкIыу фIыщIэ фхузощI зэхэфша Iуэху щхьэпэм и цIэкIэ. «Всё для Победы!» псалъэхэу акцэм гъуазэ хуэхъуахэр хьэкъщ — ТекIуэныгъэр икIэщIыпIэкIэ дыдеинущ!». КъЧР-м егъэбыдылIа «Домбай» зэгъэпэща зэуакIуэ гупми къыбгъэдэкIа видеозыхуэгъэзэныгъэм щIалэхэм псалъэ гуапэхэр щагъэIуащ, жаIащ ди хэгъуэгум, я адэхэм, адэжьхэм я напэ къабзэр зэрамыгъэулъиинур, нэрыгъыу ТекIуэныгъэм зэрыхуэпабгъэнур.

Гуапэ зэрыхъущи, мыпхуэдэ псапащIэ акцэ-концертхэр я щыпэзэхэшэкъым ди республикэм и къалащхьэми, районхэми. Абыхэм къекIуалIэ дэтхэнэми я сом Iыхьэ халъхьэ псоми ди зэхуэдэу дызыгъэпIейтей Iуэхум. КъинэмыщIауэ, щIэх-щIэхыу СВО-м ирагъашэ псапащIэ гулъэхэр. Ахэр зыхуэдэм, зыхуэдизым концертым къекIуэлIахэр щагъэгъуэзащ документальнэ фильмымкIэ. СВО-м зыщIэгъэкъуэным ехьэлIа сыт хуэдэ лэжьыгъэри зэгъэзэхуауэ, Темрезов Рэшид и унафэкIэ къызэрагъэпэща Зыуэ Щыт республикэ штабым и нэIэм щIэту йокIуэкI.

Псори дызэкъуэтмэ, зы пабгъэныгъэм ипэкIэ дигъэкIуатэмэ, Урысей уардэр, ди лъэпкъ Пашэм и унафэ узыншэр ди гъуазэмэ, къэралым къегъуну хуежьауэ зыми къызэрыщIэмыкIуэнур, СВО зауэлIхэм быдэу дазэрыкъуэтыр, пэжыгъэм и къару лъэщыр, ар сыт щыгъуи тепщэ зэрыхъур къызыхэщ уэрэдхэр гум дыхьэу, нэпсхэр кърагъакIуэу утыкум щагъэIуащ филармонием и уэрэджыIэхэм.

ТУАРШЫ Ирэ