ХЬЭБЭЗ районым щыщ, бын куэд зиIэ Къумыкъухэ я унагъуэм Урысей Федерацэм и Президент Путин Владимир и УнафэкIэ къэрал нагъыщэ лъагэр къыхуагъэфэщащ, унагъуэ институтыр гъэбыдэнымрэ сабийхэр гъэсэнымрэ хуащI хэлъхьэныгъэшхуэм папщIэ.
Абыхэм я цIэр къраIуащ «Родительская слава» орденым и медаль лъапIэмкIэ. «Дызэдопсэу дяку дэлъ фIылъагъуныгъэр, пщIэ зэхуэщIыныгъэр тхъумэу, дэ сытри тхузэфIэкIынущ, дыунагъуэщи!» — апхуэдэ къыхуеджэныгъэм щIэту зэдопсэу, я бын зэдапI, я гуащIэ къэралым, республикэм хуагъэтIылъ Къумыкъухэ Азэмэтрэ Ларисэрэ я унагъуэ насыпыфIэм.
Апхуэдэ анэ-адэфIым я нэIэм, я щапхъэм, щIыхь зыхэлъ я дуней тетыкIэм щIэту къагъэтэдж я бын хъарзыниплIри — Ланэ, Жаннэ, Ашэмэз, Камилэ сымэ.
Къумыкъухэ я унагъуэр зэрыбыныбэми къыщымынэу, ахэр зэгурыIуэрэ зэдэIуэж, сыт хуэдэ къалэнри зэдэзыгъэкIуатэ, фIыщэу зэрылъагъу гуп дахэщ. Мы унагъуэм и нэхъыжьхэм быныр хуагъасэ щытыкIэ нэхъыщхьэ дыдэхэм: хабзэм тету къадекIуэкI унагъуэ щIэин лъапIэхэм, нэхъыжьым пщIэ хуэщIыным, узыщалъхуа щIыналъэр фIыуэ плъагъуным, гуащIэдэкIым пэIэщIэ зумыщIыным, щIым телэжьэныр фIыуэ лъагъуным, лъэпкъ куэд зыщыпсэу я Хэкум и щэнхабзэ къулейм иригушхуэным.
КъызэрымыкIуэу уасэшхуэ хуащIу яхъумэ мы унагъуэм тхыдэ щIэин лъапIэхэр, хэкупсагъэ-kъэпкъыпсагъэр, Хэку-анэр фIыуэ лъагъунымрэ пщIэ хуэщIынымрэ. «Защитники Отечества» фондым и къудамэм щылажьэ адэм и щапхъэм быныр хуегъасэ узыщалъхуа къэралым и хьэлэмэтхэр хъумэным, пщIэ хуэщIыным, ар зыхъумэхэм я лIыгъэм уригушхуэным, Урысейм узэрыщыпсэур, абы и цIыхуу узэрыщытыр бгъэщыпкъэным. «Родительская слава» орденым и медалыр — къэрал нагъыщэ закъуэ мыхъуу, ар и нагъыщэщ унагъуэхэм къадекIуэкI хабзэ уасэншэхэр зэрагъэщыпкъэм, ахэр зэрыпсэум, зэращымыгъупщэм, жылагъуэр гъэбыдэным ахэр зэрыхапщэм.
Къумыкъухэ я унагъуэр апхуэдэхэм я щапхъэ нэсщ. Егъэлеиныгъэ хэслъхьэкъым, ауэ апхуэдэ унагъуэхэращ Урысейм лъабжьэ хуэхъур.
Сахуохъуахъуэ си хэкуэгъухэм яхуэфащэ дыдэу я цIэр къызэрыраIуа къэрал нагъыщэ инымкIэ!
Щапхъэгъэлъагъуэ унагъуэр насыпрэ зэIузэпэщыныгъэрэ щимыгъащIэкIэ! «Тхьэм фигъэпсэу щIалэгъуалэм явгъэлъагъу, зыщIэфпIыкI щапхъэфIхэм папщIэ! Фэ фогъасэ пэжагъыр зыгъэнэхъыщхьэ, хабзэфIхэр зымыгъэкIуэд, къэралыр зэрыгушхуэ щIэблэ.
АбыкIи хэлъхьэныгъэшхуэ хувощI Урысейм и къэкIуэнум!» — унагъуэм яхъуэхъуащ Къэрэшей-Черкес Республикэм и Iэтащхьэ Темрезов Рэшид.
Шэчыншэу, Къумыкъухэ я унагъуэм Хьэбэз районми, республикэм дежи я пщIэр щылъагэщ. Унагъуэм щызекIуэ хабзэ дахэхэращ лъабжьэ яхуэхъур быным я гъэсэныгъэм, езы унагъуэр щапхъэгъэлъагъуэу ялъытэным. АбыхэмкIи ехъулIащ мы бын насыпыфIэр.
Фигу къэдгъэкIыжынщи, «Родительская слава» орденым и медалыр — къэрал нагъыщэ нэхъ лъапIэ дыдэхэм ящыщщ. Ар къагъэщIащ унагъуэ лъапIагъэхэр, хабзэфIхэр хъумэн, сабийхэм я гъэсэныгъэм хуащI хэлъхьэныгъэ къызэрымыкIуэр къэгъэлъэгъуэн папщIэ.
Апхуэдэ щапхъэхэр гъунэжу зэрабгъэдэлъращ Къумыкъухэ я унагъуэм щIыхь лъагэкIэ и цIэр къыщIраIуар, и пщIэр щIаIэтыр.
Дахуохъуахъуэ унагъуэ дахэм зэIузэпэщыныгъэкIэ, гуфIэгъуэрэ насыпрэ щымыщIэну!
АБИДОКЪУЭ Люсанэ
Больше на Черкес хэку
Подпишитесь, чтобы получать последние записи по электронной почте.
