«Уи зэфIэкIым мардэ иIэкъыми, тегушхуэ!»

УзыншагъэкIэ дагъуэ зиIэхэм я IэщIагъэ IэкIуэлъакIуагъыр къэгъэлъэгъуэнымкIэ «Абилимпикс» хэгъуэгу чемпионатыр ди республикэм щрагъэжьащ.
Къэрэшей — Черкес къэрал филармонием и чемпионатыр хэIэтыкIауэ къыщызэIуахащ.
Абы къеблэгъащ КъЧР-м егъэджэныгъэмрэ щIэныгъэмрэкIэ и министрым и къуэдзэ Карасовэ Заирэ, республикэм гуащIэдэкIымрэ социальнэ зыужьыныгъэмрэкIэ и министрым и къуэдзэ Шияновэ Ольгэ, предприятэшхуэхэм я лIыкIуэхэр, IэщIагъэ къыздыщIах ику ит еджапIэхэм, коррекцэ еджапIэхэм я унафэщIхэр.
«Абилимпикс» чемпионатыр ди къэралым илъэс 11 хъуауэ щокIуэкIри, ди хэгъуэгур абы зэрыхэтрэ мы гъэм илъэси 10 ирокъу. Мы гъэм чемпионатыр траухуащ ТекIуэныгъэм и Илъэс 80-мрэ Хэкум и хъумакIуэм и Илъэсымрэ.
ГуфIэгъуэ Iуэхугъуэм хэтыну къекIуэлIахэм фIэхъускIэ захуигъэзащ Карасовэ Заирэ.
— «Уи зэфIэкIым мардэ иIэкъым, тегушхуэ!» къыхуеджэныгъэм сыт щыгъуи фыщIэт! ХъуэпсапIэхэр куэду зивгъыIэ икIи абыхэм фахуэкIуэнымкIэ фи къару фыщымысхь! Мы чемпионатым хэт псоми текIуэныгъэр къахьэгъэххэщ, — игъэгушхуащ абы ныбжьыщIэхэр.
Мы гъэм чемпионатыр «Молодежь и дети» лъэпкъ проектым и зы Iыхьэ хъуащ. Республикэр Урысейпсо чемпионатым щыхыхьам IэщIагъэ лIэужьыгъуитI къудейт къызэрыщIидзауэ щытар. Иджы ахэр лIэужьыгъуэ 21-кIэ екIуэкIынущ. Апхуэдэщ «дакIуэ», «вебпрограммированэ», «автомашинэщIыж», «егъэджакIуэ», «щыгъэ хъагъэ» (бисероплетение), нэгъуэщIхэри. Мы зэм щIэуэ къыхагъыхьащ «цыкIэ сурэт щIынымрэ» «тIатIийм макет къыхэщIыкIынымрэ». А IуэхугъуэхэмкIэ щызэпщытэнущ еджакIуэ 22-рэ, ику ит IэщIагъэ къыздыщIах еджапIэм и студент 91-рэ, ищхьэ еджапIэм щеджэ нэрыбги 5, лъэкIыныгъэм и фестивалым хэта нэрыбгэ 20, лажьэхэу нэрыбги 5. КъинэмыщIауэ, къыхэгъэщыпхъэщ иджы СВО-м и ветеранхэр «Абилимпикс»-м къызэрыхыхьар.
Чемпионатым и зэхьэзэхуэ Iуэхугъуэхэр щекIуэкIынущ Черкесск къалэм дэт Индустриально-технологическэ колледжым. Хэгъуэгу Iыхьэм щытекIуахэр, хабзэ зэрыхъуауэ, Москва къалэм мы гъэм и жэпуэгъуэм (октябрым) щекIуэкIыну «Абилимпикс» Лъэпкъ чемпионатым хэтыну кIуэнущ.
Фигу къэдгъэкIыжынщи, «Абилимпикс» чемпионатыр — «Россия — страна возможностей» Президент утыкум и зы Iыхьэщ.
УзыншагъэкIэ зи зэфIэкI иримыкъу ныбжьыщIэхэр социальнэ гъащIэм хэгъэзэгъэнымкIэ, гуащIэдэкI лэжьыгъэм ахэр хэшауэ, адэкIэ я псэукIэр егъэфIэкIуэным щхьэпэ лъэкIыныгъэфIу щытщ «Абилимпикс»-р. Аращ илъэс къэс а зэпеуэм нэхъри цIыху нэхъыбэ къыщIызэщIиубыдэр.
БОРЭНЫКЪУЭ Мадинэ