Къэрэшей-Черкес Республикэм щыщ тхэквондист ныбжьыщIэ, бгъэдэлъ спорт IэпщIэлъапщIагъымкIэ, и IэчлъэчагъкIэ ди къэралми лъэпкъыбэ утыкуми щыцIэрыIуэ спортсмен лъэрыхь ВЫКХЪЭ Амир дунейпсо пашагъэм, дыщэ медалым щIэбэнынущ.
Жэпуэгъуэм (октябрым) и 24 — 30 махуэхэм Чынтым (Китайм) тхэквондомкIэ дуней псом и чемпионат щызэхэтынущ. А спорт зэхьэзэхуэм щызэпэщIэтынущ дуней хъурейм тет, тхэквондо спорт лIэужьыгъуэмкIэ фIым я нэхъыфI дыдэ Iэчлъэчхэр (бзылъхугъэхэри цIыхухъухэри). Урысей Федерацэм и командэ къыхэхам хэту зи хьэлъагъыр кг. 68-рэ хъу гупым яхэту здэбанэ утыкум ихьэнущ КъэрэшейЧеркесым къыбгъэдэкIа тхэквондист — Маху А. и цIэр зезыхьэ, олимп резервхэмкIэ Спорт еджапIэм и гъэсэн Выкхъэ Амир. Дунейпсо чемпионатым хуэкIуа и спорт гъуэгуанэм Амир ирикIуащ ерыщу, Iуэху зэхэщIыкI ин зыIэригъыхьэу, текIуэныгъэхэмрэ бжьыпэмрэ зыIэщIимыгъэкIыу. ИпэIуэкIэ Амир текIуэныгъэр къыщихьащ пщIэ лъагэ зиIэ лъэпкъыбэ зэпеуитIым: «Bulgaria Open», «Presidents Cup — European Edition G3» хуэдэхэм, ВТФ-м и нэIэм щIэту екIуэкIахэм. А спорт зэхьэзэхуэхэр Болгарие къэралым щызэхэтащ. А тIум дежи ди лъэпкъэгъу спортсменым бжьыпэр зэрызыIэригъыхьам лъэкIыныгъэ къритащ дуней хъурейм тхэквондист нэхъыфIу тетым япэщIэтыну. Тхьэм уи насып тригъакIуэ, Амир!
АБИДОКЪУЭ Люсанэ
Больше на Черкес хэку
Подпишитесь, чтобы получать последние записи по электронной почте.
