Урысей Федерацэм, Къэбэрдей-Балъкъэр Республикэм щӀыхь зиӀэ я артист, Урысей Федерацэмрэ Къэрэшей-Черкесымрэ я цӀыхубэ артист, Къэрэшей-Черкес къэрал педагогическэ университетым щӀыхь зиӀэ и доктор, Даур Аслъэн и цӀэр зезыхьэ щэнхабзэмрэ гъуазджэхэмрэкӀэ колледжым и унафэщIу щыта Гъуэт Хъусин мазаем (февралым) и 27-м илъэс 85-рэ ирикъунут. Абы и макъ лъэщымкӀэ жиӀауэ щыта «Си нанэ», «Адыгэ нэмыс», «Ӏэлъын цӀыкӀу», «ИстамбылакӀуэ», «Гуащэгъагъ и гъыбзэ», «Голуби», «Си къэшэн», «Гимн дикой дивизии», «Песня об Эльбрусе» уэрэдхэр, нэгъуэщӀхэри ноби ӀупщӀу дэтхэнэми ди тхьэкӀумэм итщ, ди гур ягъэхуабэ.
И сабиигъуэр
Хъусин 1941 гъэм мазаем и 27-м Жьакуэ къуажэм щыщ Гъуэтхэ Азэмэт-Джэрийрэ Хъаджэтрэ я унагъуэм къихъухьащ. ЩӀалэр анэ-адэм я бын закъуэт. Хъусин адэншэу къэтэджа сабийхэм ящыщщ: ар иджыри илъэс хъуатэкъым и адэр зауэм щыдэкӀам икӀи, жагъуэ зэрыхъущи, абы къигъэзэжакъым. Азэмэт-Джэрий и письмохэр 1943 гъэм и бжьыхьэм зэпыуащ. КъызэрыщӀэкӀамкӀэ, ар Курск и Ӏэгъуэблагъэхэм щекӀуэкӀа зэхэуэшхуэм хэкӀуэдащ. Хъусин и сабиигъуэр зауэнэужь зэманхэм техуами, езым ӀэфӀу, гуапэу игу къинэжа лъэхъэнэщ. Гъэмахуэ мазэ жьэражьэхэр къуажэм дэс щӀалэ цӀыкӀухэм псыхъуэм щагъакӀуэт: загъэпскӀт, дыгъэм зыхуагъафӀэт, бдзэжьей ещэт, джэгукӀэ зэхуэмыдэхэр зэхаублэт.
Гъэмахуэм плъапӀэу яӀэр Инжыдж ЦӀыкӀу псыхъуэрамэ, щӀымахуэ кӀыхьхэр Хъусин игу къинэжат анэм жиӀэу щыта хъыбарыжьхэмкӀэ, уэрэдхэмкӀэ. ЩӀалэ цӀыкӀум и псэр а хъыбархэм, уэрэдхэм дихьэхт, сабийм и гущӀэм ахэр хэтӀысхьащ, и дуней еплъыкӀэри куэдкӀэ яухуащ. Хэт ищӀэнт апщыгъуэм илъэс бжыгъэ текӀа нэужь, анэм зыщигъэгъуэзауэ щыта уэрэд куэд Хъусин концерт утыкушхуэхэм зэрыщыжиӀэнур…
Апхуэдэурэ сабийм и гъащӀэр хуэму, мамыру кӀуатэт. ЖыӀэпхъэщи, Хъусин щӀыкӀей, гушыӀэ хэлът. Сыт хуэдэ джэгуми, щӀалэ цӀыкӀухэр зэпщэфыӀэми — ар пашэхэм яхэтт. Дунейм къыщыхъу Ӏуэхугъуэхэращи, къуажэдэсхэр абыхэм нэӀуасэ хуэзыщӀу щытар радиоращ. КъинэмыщӀауэ, радиом къиӀукӀ зэпытт уэрэдым теухуа программэ зэхуэмыдэхэр. Хъусин а радиоконцертхэр фӀэфӀ дыдэт, зэхих уэрэдхэр зэуэ и гум ириубыдэт икӀи пщӀантӀэм, унэм, еджапӀэм щыжиӀэрейт.
Сабийм и макъ дахэм гу лъатагъэххэти, ар еджапӀэм къыщызэрагъэпэщ концертхэм, дауэдапщэхэм хагъэхьэт.
ЩӀалэгъуэ дахэр
Гъуэтым и щӀалэгъуэр зытехуа пӀалъэр къэралым иригъэкӀуэкӀ ухуэныгъэм и зэманыгъуэ фӀыгъуэт. Абы къыхэкӀыу, 1959 гъэм, Хъусин курыт еджапӀэр къиуха нэужь, и дэфтэрхэр щӀелъхьэ Черкесск къалэм дэт, ухуакӀуэ ӀэщӀагъэм здыхурагъаджэ училищэм. Апщыгъуэм училищэм и унафэщӀу щытар Сымхьэ СулътӀант. Ар лӀы зэтеубыдат, дзэм, зауэм хэтати, еджапӀэм дежи щыткӀийт. Арами, унафэщӀым макъамэм, уэрэдым, щэнхабзэм гулъытэ ин хуищӀт, гъуазджэм цӀыхум и зыужьыныгъэмкӀэ мыхьэнэшхуэ иӀэу къилъытэт.
Дауи, унафэщӀ набдзэгубдзаплъэм зэуэ гу къылъитащ уэрэд жыӀэным хуэжыджэр адыгэ щӀалэм. Уеблэмэ ар и псэм фӀэфӀ хъуащ, адэ пэлъытэу къыщхьэщытащ. Хъусин хагъэхьащ училищэм художественнэ зыужьыныгъэмкӀэ щыӀа гупым. Езым иужькӀэ жиӀэт, СулътӀан хуабжьу къызэрыдэӀэпыкъуар, гъащӀэм деж зэриунэтӀар. Дунейм ущытеткӀэ, гуфӀэгъуэм къинэмыщӀауэ, гъащӀэм къыдэкӀуэ хабзэщ гуауэри. Хъусин и еджэгъухэм ягъусэу, Эркен-Щыхьэр практикэ ягъэкӀуауэ, паркет иралъхьэт, къулыкъущӀапIэм щылажьэ бзылъхугъэм Хъусин телефоным зэрыраджэр щыжиӀам: Хьэбэз дэт сымаджэщым къращӀыкӀт, и анэр хьэлъэу абы щӀэхуащ. Асыхьэтым гупсысэ пӀейтейхэм зэщӀащта Хъусин, и лъакъуэрыгъажэм тетӀысхьэри, уэшхыр къежэхыу, епӀэщӀэкӀыу Хьэбэз нихусащ. ЩӀалэр сымаджэщым щынэсам я Ӏыхьлыхэр зэхуэсагъэххэт. Ар анэм бгъэдыхьэри, «Дауэ ущыт, Хъаджэт?» — жиӀащ, зэрынэщхъейр анэм иримыгъэлъагъун и мураду. Анэм и жэуапт, абы мы дунейм и гъуэгуанэр зэрыщиухар.
Ар и къуэм елъэӀуащ унэм ишэжыну, сымаджэщым и псэр щыхэкӀыну зэрыхуэмейр жиӀэри. Пщэдджыжьым Хъусин и анэр унэм ишэжыну гъуэгу техьащ. Ахэр «Ӏэдииху» чэщанэр тыншу здэплъагъу щӀыпӀэм щынэсым, Хъусин къэувыӀэри, жиӀащ: «Хъаджэт, плъагъурэ, мес Ӏэдииху и чэщанэр. Абы и хъыбарыжь, уэрэд дапщэрэ къызжепӀа?» Анэм псэлъэну къару иӀэжтэкъым, ауэ и нэхэр чэщанэм тригъэплъызащ пӀалъэкӀэ. Хъаджэт и къарууншагъэр зыхэзыщӀэ къуэм и нэпсхэр и нэкӀум щежэхыурэ Жьакуэ къынэсыжахэщ… Хъаджэт дунейм ехыжа нэужь, щӀалэм и гъащӀэм жэщ кӀыфӀым зыкъытриубгъуащ.
Апщыгъуэм Гъуэтым и ныбжьыр илъэс 20-м иту арат. И анэр пасэIуэу IэщIэкIа щхьэкIэ, зэгуэрми и гум иригъэхутэкъым абы лъагъуныгъэу къыхуиIар. КъыжриIэу щыта псалъэ пэжхэр и джэрпэджэжт, абыхэм гугъэ нэху къратт, къару къыхалъхьэт… А пӀалъэ хьэлъэм ирихьэлӀэу Черкесск къеблэгъат Саратов консерваторэм щыщ комиссэр. ИкIи Хъусин бгъэдэлъ зэчийр къызыгурыӀуэ, абы къыхуэгузавэ Сымхьэ СулътIан чэнджэщ-письмо къригъэзу къыхуетх: «ПсынщӀэу Черкесск къакӀуэ. Саратов къикIа комиссэ къэкӀуауэ, консерваторэм щӀагъэхьэну ныбжьыщӀэхэр къыхаш. Сэ абыхэм яжесӀащ уэ макъ лъэщ зэрыуиӀэр, ахэр къодэӀун зэрыхуейр».
ЛIы губзыгъэм зэрыжиIауэ Хъусин ещIэ, комиссэм йокIуалIэри, и макъыр, и зэфIэкIыр къегъэлъагъуэ. Комиссэм зэдэарэзыуэ щIалэр Собинов и цIэр зезыхьэ Саратов консерваторэм вокалымкӀэ и къудамэм щӀэгъэхьэн хуейуэ унафэ къахь. ХъыбарыфӀыр Хъусин и Ӏыхьлыхэм щажриӀэм, абыхэм ар ягъэзэхуакъым. Абыхэм жаӀэт, ар Карачаевск пединститутым щIыхьэмэ нэхъ тэрэз зэрыхъунур. Хъусин и гур уэрэдым ихьэхуами, и Ӏыхьлыхэм зытракъузэ институтым экзаменхэр щӀыхьэн папщӀэ итыну ежьащ. Абдеж ар щыӀущIащ комиссэм хэт, и цӀыхугъэ Зэгъэщтокъуэ Ольгэ. ЩӀалэр Саратов консерваторэм ящтэу къыщицӀыхум, бзылъхугъэм жиӀащ Хъусин Ӏэмал имыӀэу абы кӀуэн зэрыхуейр. Махуэ бжыгъэ дэкIри, ар институтым щыӀущIащ адыгэбзэкӀэ езыгъэджа Тамбий БэтӀал. А лӀы губзыгъэми Саратов Ӏуэхур къыщищӀэм, Хъусин жриӀащ ар абы шэч хэмылъу еджакӀуэ зэрыкӀуапхъэр…
Хъусин экзамен псори тыншу итат, икӀи щӀыхьащ институтым. Ӏыхьлыхэр арэзыт, гуфӀэгъуэ Ӏэнэ къызэтрагъэуват, псори къехъуэхъут. Ауэ езы Хъусин зэгупсысыр нэгъуэщӀт, ар псэкӀэ хэдагъэххэт: «Пщэдджыжь жьыуэ «Зеленчук-Черкесск» гъуэгум сытетын хуейщ». Хъусин и псэр дэзыхьэх лъагъуэм яхутекӀакъым. Апхуэдэу щIалэр и псэр, и гур зыщIэхъуэпс, зыхуэпабгъэ лъагъуэм щыгъыни, шхыни, ахъши имыӀыгъыу теуващ икӀи хъуэпсапӀэм нихусащ.
Еджэгъуэр, къулыкъур
Консерваторэм деж вокалымкӀэ Хъусин и егъэджакӀуэу щытар Чернышевскэ и цӀэр зезыхьэ оперэмрэ балетымрэ я театрым и уэрэджыӀэ пашэ Шевелевэ Аннэщ. ИужькӀэ нэгъуэщӀ егъэджакӀуэхэри иӀащ, дэтхэнэри сэбэп хъуащ щӀалэм и макъыр гъэувынымкӀэ, абы зегъэужьынымкӀэ. ЕджапӀэм щӀалэм щызэхихащ урысей, хамэ къэрал авторхэм я оперэ партиехэр. Хъусин и дунейр щӀэращӀэт, еджэным гупсэхугъуэ къыхуихьт.
А псом къыдэкӀуэу щӀалэр хущӀэкъут оперэ спектаклхэр димыгъэхуу, дэтхэнэри щӀиплъыкӀыну. Абыхэм и псэр яхьэхупат. Апщыгъуэм студентхэм я нэхъыбэр еджэт икӀи лажьэт. Хъусини театрым и уэздыгъэхэр гъэлэжьэнымкӀэ ӀэнатӀэм пэрагъэуващ. Ар фӀэфӀ дыдэт, сыту жыпӀэмэ сценэм къыщыхъу дахагъэхэм нэхъ пэгъунэгъут… 1962 гъэм и гъэмахуэ пӀалъэу Гъуэт Хъусин Жьакуэ къэкӀуэжри, и гъащӀэм деж Ӏуэхугъуэ дахэ къыщыхъуащ.
Абы унагъуэ дищӀащ, псэгъу хуэхъуащ зэры цIыкӀу лъандэрэ ицӀыхуу щыта БакӀуу Айшэт. ХьэгъуэлӀыгъуэ нэужьым, мазэ дэкӀри, Хъусин Саратов игъэзэжащ, еджэным пищэжын хуейт. АрщхьэкӀэ абдеж абы «къыщыпэплъэт» военкоматым и повесткэр. ИлъэсиплӀкӀэ — 1962-1966 гъэхэм — Гъуэтым къулыкъу щищӀащ Тихоокеанскэ флотым. Ауэ абдежми ди лъэпкъэгъум и зэчийр хигъэкIуадэкъым. Офицерхэм я Унэм творческэ гуп къызэзыгъэпэщ сэлэтхэм ар хагъыхьауэ щытащ. Дзэ къулыкъур щызэфӀэкӀым, Хъусин консерваторэм игъэзэжащ. Абдеж щрихьэкӀа еджэгъуэ илъэсхэм къриубыдэу, Хъусин зригъэщӀащ уэрэд зэхуэмыдэхэр: романсхэр, ариехэр. Гъуэтым фӀыуэ илъэгъуахэм ящыщщ урыс лъэпкъ уэрэдыжьхэри.
ГуащӀэдэкӀым и япэ лъагъуэхэр Консерваторэр къыщиух илъэсым Хъусин Волгоград областым хыхьэ Камышин къалэм къикӀыу тхылъ къыхуагъэкӀуащ: Гъуэтыр ирагъэблагъэт къалэм дэт макъамэ училищэм щригъэджэну. Апхуэдэ гулъытэр хуабжьу гуапэт, ауэ Хъусин и Хэкум хуезэшат, и унэ къэкӀуэжыну щӀэхъуэпст. Хэкум къигъэзэжа нэужь, Хъусин илъэситӀкӀэ щылэжьащ Хьэбэз къуажэм дет макъамэ еджапӀэм. Зэманыр кӀуатэт, Камышин къалэм кърагъэкӀа тхылъым иджыри къару иӀэт. Езы Хъусини щӀэхъуэпст адэкӀэ зиужьыну, бгъэдэлъ щӀэныгъэмкӀэ студентхэм ядэгуэшэну. Апхуэдэу абы триубыдащ Камышин къалэм Ӏэпхъуэжыну.
Абдеж творчествэм етауэ илъэсибл щигъэкӀуащ. Педагогическэ Ӏуэхугъуэм къинэмыщӀауэ, Хъусин абдеж Ӏэмал щигъуэтат симфоническэ, урыс лъэпкъ Ӏэмэпсымэхэм я оркестрхэм ящӀыгъуу сценэм къытехьэну. Апхуэдэ ӀэмалыфӀыр вокалистымкӀэ хъуэпсапӀэт. Гъуэт Хъусин и гъащӀэр дахэу екӀуэкӀт. Унагъуэр, лэжьыгъэр тыншу зэдэгъуэгурыкӀуэт.
Ауэ цӀыхум и гъащӀэ гъуэгум къыпэщылъыр ищӀэу щытыгъамэ, и лъэр здытеувэнури зэригъэзахуэтэкъэ… Апхуэдэу хы ФӀыцӀэ Ӏуфэм деж Хъусин щрихьэкӀа зыгъэпсэхугъуэ пӀалъэм кӀэух хуэхъуащ машинэ зэжьэхэуэныгъэ шынагъуэр. Ар псэууэ къызэрелар дохутырхэм ягъэщӀагъуэт. УэрэджыӀэр къелыным, и къару къихьэжыным сэбэп хуэхъуащ и унагъуэм хуиӀа фӀылъагъуныгъэр, и щхьэгъусэм зэпымыууэ, емытӀысэхыу абы къыкӀэлъызэрихьа гулъытэр. ЦӀэрыӀуагърэ щӀыхьрэ къелъэщ Зэрыхабзэщи, гукъеуэр и закъуэу къеблагъэкъым.
Хъусин и къару къихьэжу щыхуежьэм, гуауэр къэкӀуащ щхьэгъусэм и дыщымкӀэ: Айшэт и анэр дунейм ехыжащ, и адэр операцэ хьэлъэ ящӀащ. Дауи, Айшэт и адэр къигъанэ хъунутэкъым, абы къыхэкӀыу унагъуэм Къэрэшей-Черкесым къагъэзэжащ. Апхуэдэу, 1981 гъэм Гъуэт Хъусин егъэджакӀуэу щы лэжьэн щӀедзэ Черкесск къалэм дэт макъамэ училищэм. Педагогическэ лэжьыгъэм къинэмыщӀауэ, Хъусин жылагъуэ Ӏуэхугъуэхэми хэт зэпытщ.
А зэманым зи макъыр и фӀыгъуэ дыдэм хуэкӀуа Хъусин и концертхэр щокӀуэкӀ къуажэ клубхэм, организацэхэм. ЖыӀэпхъэщи, концертхэр ехъулӀэныгъэ яӀэу къыщызэрагъэпэщт Къэрэшей-Черкесым и мызакъуэу, Къэбэрдей-Балъкъэрми, Адыгэ Республикэми. Псом хуэмыдэу, Гъуэт Хъусин игъэзащӀэ уэрэдхэм ящыщу цӀыхубэм нэхъ зыхащӀэт урыс, адыгэ уэрэдыжьхэр. Ищхъэрэ Кавказым и композиторхэу Тхьэбысым Умар, Тыкъуэ Къаплъэн, Даур Аслъэн, Ногайлиев Мэжид сымэ я уэрэдхэу Хъусин и макъымкӀэ игъэӀуахэри хуабжьу цӀэрыӀуэт. А пӀалъэм Гъуэтым и творчествэр йофӀакӀуэ: областым и радиом и хорым щӀыгъуу уэрэд жеӀэ, уэрэдыщӀэхэр нэхъыбэ мэхъу, «Нарт» ӀуэрыӀуатэ ансамблыр къызэрегъэпэщ.
И макъ лъэщ, удэзышэхым и мызакъуэу, Хъусин Тхьэм къыбгъэдилъхьат артист зэчийри. Абы и уэрэд жыӀэкӀэм цӀыхухэр игъэпӀейтейт. Абы къыхэкӀыу, ар щӀэх цӀыхубэм фӀыуэ къалъэгъуащ. 1991 гъэм Хъусин къыхуагъэфащэ республикэм щэнхабээмкӀэ и министрым и къуэдзэ ӀэнатӀэр. ПцӀым сыт и Ӏэмал? Ар пӀалъэ хьэлъэт: къэралым щэнхабзэри нэгъуэщӀ лъэныкъуэгъазэ куэдри Ӏэпэдэгъэлэл щыхъуат… Арами, республикэ псом и профессиональнэ гъуазджэр зи нэӀэ щӀагъэува Гъуэтыр и пщэрылъхэр нэхъусауэ зэригъэзэщӀэным сыт щыгъуи пылъащ.
Ар хущӀэкъут хэгъуэгум и напэу къалъытэ филармонием, «Эльбрус» къэфакӀуэ гупым, макъамэ училищэм заригъэужьыну, я пщӀэр къиӀэтыну. Зи Ӏуэху бгъэдыхьэкӀэрэ зи зэхэщӀыкӀ инрэ къы халъытэ Хъусин 2003 гъэм къыхуагъэфащэ Даур Аслъэн и цӀэр зезыхьэ училищэм и унафэщӀ ӀэнатӀэр. Мыбдежым абы лъэныкъуэ куэд и нэӀэм къыщӀэуват: ар унафэщӀт, чэнджэщэгъут, егъэджакӀуэт, ущиякӀуэт, экономистт. А пӀалъэм Гъуэт Хъусин ирихьэлӀа псоми жаӀэт ар цӀыхугъэрэ гулъытэрэ зыбгъэдэлъ цӀыху щыпкъэу зэрыщытыр.
Апхуэдэт и лэжьэгъухэри, и студентхэри — псоми дахэкӀэ япыкъуэкӀыну Ӏэмал къигъуэтыну лъэкӀт. Хъусин зэрызиумысу щытащи, абы и гъащӀэм гъуазджэр, уэрэдыр хэмыту и нэгу къыхущӀэгъыхьэтэкъым. «Уэрэдым гъащӀэ езытыр уэрэджыӀэращ. Нэхъыщхьэр жыпӀэм и мыхьэнэращ, ар цӀыхубэм я гум нэсрэ, хьэмэрэ ахэр уэрэдым хуэгунэфу къанэрэ. Си уэрэдхэр бзэ зэхуэмыдэхэмкӀэ згъэӀуащ. СызэрегупсысымкӀэ, дунейм утетыху ӀуэхуфӀ зехьэпхъэщ. Гъуазджэр фӀым хуэзгъэлэжьэну сыхущӀокъу. Согугъэ, ди лъэпкъ гъунэгъухэм я бзэхэмкӀэ згъэӀуа уэрэдхэм лъэпкъхэр зэпэгъунэгъу зыщӀ мамырыгъэ къадэкӀуауэ», — жиӀэт мамырщӀэкъуу щыта Хъусин. Зыужьыныгъэр щхьэпэщ Гъуэтым и гъащӀэм гъэщӀэгъуэн куэд щилъэгъуащ, цӀыху цӀэрыӀуэхэм, зэчиишхуэ зыбгъэдэлъхэм ядэлэжьащ.
Апхуэдэщ Даур Аслъэн, Тут Заур, Тыкъуэ Къаплъэн, Сметанников Леонид, Лещенко Лев, Гасташевэ Наталье, Темыркъан Борис, Басков Николай, нэгъуэщӀхэри. ЗэӀущӀэ гъэщӀэгъуэнхэм я фэеплъу Хъусин зэрихьэт сурэт телъыджэхэр Артистым гукъинэж щыхъуащ хамэ къэралхэм щилъэгъуа хабзэхэр, цӀыхухэр. Хъусин сыт щыгъуи хуабэу игу къигъэкӀыжт Испанием, Италием, Тыркум, Польшэм щрагъэкӀуэкӀа концертхэр. Абы къыхигъэщт хамэ къэралхэм деж Кавказым щыщ лъэпкъхэм я уэрэдхэр щыжиӀэкӀэ, ди щэнхабзэр цӀыхухэм ягу зэрыдыхьэр, абы нэхъри зэригъэгушхуэр.
«Бзэр умыщӀэуи, уэрэдымкӀэ, макъамэмкӀэ, къафэмкӀэ лъэпкъхэр зэпэгъунэгъу пхуэщӀынущ, гъуазджэм псори дызэпещӀэ», — жиӀауэ щытащ Хъусин. Дауи, ар пэж дыдэщ. Макъамэм, къафэм, лъэпкъ псом и псэр хыболъагъуэ, куэд къыпхуеӀуатэ… Нэхъыщхьэращи, Гъуэт Хъусин насыпыфӀэу зыкъилъытэжу щытащ. «СынасыпыфӀэщ. ФӀыуэ слъагъу Ӏуэхугъуэр си ӀэщӀагъэщ. Си унагъуэкӀи насыпыфӀэ сыхъуащ. Абыхэм сыт щыгъуи зыкъысщӀагъакъуэ. СыщогуфӀыкӀ си студентхэм я ехъулӀэныгъэхэм, абыхэми насыпыфӀэ сащӀ!» — зэпсэлъэныгъэхэм языхэзым жиӀэгъауэ щытащ абы. Хъусин зыщӀэхъуэпсу щыта гъуазджэм и дунейм щыпсэуащ, зэрысабийрэ гухэлъ зыхуищӀауэ щыта бзылъхугъэ дахэр псэгъу зыхуищӀыну лъэкӀащ.
Айшэтрэ езымрэ къуищ зэдапӀащ. Абыхэм щӀэныгъэрэ гъэсэныгъэрэ бгъэдалъхьащ, езыхэми я гъащӀэ лъагъуэ ягъуэтыжащ. Русланрэ Беслъэнрэ юриспруденцэм зратащ. И къуэ Аслъэн адэм и лъагъуэм ирикӀуащ, артист, композитор зэчиифӀэ хъуащ. Абы макъамэ куэд ээхилъхьащ. Фигу къэдгъэкӀыжынщ ар зыхэта «Оштен» гуп лъэрыхьыр. Гупыр цӀэрыӀуэ щыхъум, абы и цӀэр хамэщӀ щыпсэу ди лъэпкъэгъухэми зэхахащ. Апхуэдэу, Канадэм щыпсэу ди адыгэхэм я жэрдэмкӀэ, Аслъэн а къэралым ирагъэблагъэри, я симфоническэ оркестрым и дирижёру щытащ. ЩӀалэм классическэ макъамэми, адыгэ лъэпкъ макъамэми фӀыуэ хещIыкӀ.
Артист лъэрыхь, цӀыху гъэщӀэгъуэныщэ Гъуэт Хъусин и ныбжьыр илъэс 81-м иту 2023 гъэм и дунейр ихъуэжауэ щытащ. Хъусин и творческэ къэухьыр къэпщытэжыгъуейщ, абрагъуэщи. Ауэ, нэхъыщхьэр аращи, артист телъыджэр и гъащIэр зытриухуа музыкэм сыт щыгъуи хуэпэжащ. ЦIыхубэм ауэ жиIакъым: «ЦIыхум и цIэр псэухукIэ езыри псэущ» жэуэ. Нобэ Хъусин и макъри, и уэрэдхэри, и фэеплъри псэущ, шэч хэмылъу!
НапэкIуэцIыр зыгъэхьэзырар ГЪУКӀЭКЪУЛ Иринэщ
Больше на Черкес хэку
Подпишитесь, чтобы получать последние записи по электронной почте.
