Мы гъэм шыщхьэІум и 17-м Беслъэней къуажэм къеблэгъащ хьэщІэ гуп. Ар — Новороссийск зи гъуэгур къыщезыгъэжьа, «Путь Надежды» Урыс географическэ жылагъуэм къыбгъэдэкІа лІыкІуэ гупщ. ЖыІэпхъэщи, мы зекІуэр хэкупсэ марафонышхуэм и лэжьыгъэм и зы Іыхьэщ. Ар зытеухуар мы гъэм ТекІуэныгъэ Иныр илъэс 80 зэрырикъумрэ Урыс географическэ жылагъуэм и илъэси 180-рэщ.
ЗекІуэм и мурад нэхъыщхьэр — Армавир сабий Унэр зауэ илъэсхэм щагъэкуэшым зрикІуа гъуэгур кІужынращ. А гъуэгумкІэ лІыгъэм, бэшэчагъым, зауэ илъэс мыгъуэхэм иджыри зэ драгъэплъэжынращ. ЕкІуэ лІэпІэншэ хъуа сабийхэр апщыгъуэм Беслъэней къызэрашауэ щытар къуажэдэсхэмкІэ тхыдэ гукъинэж яхуэхъуащ. «Путь Надежды» зекІуэр тхыдэ къэхутэныгъэ къудейкъым, атІэ ар щІэблэр хэ купсэу гъэсэнымкІэ Іэмал хьэлэмэтщ. Абы дыкъыхуреджэ мамырыгъэм и мыхьэнэр къыдгурыІуэным, тхыдэ фэеплъыр тхъумэным, Хэку зауэшхуэм и илъэсхэм совет цІыхубэм зэрихьа лІыгъэр тцІыхуным. Къеблэгъа хьэщІэхэм гуапэу япежьащ лъэпкъ фащэхэмкІэ екІуу зэщыхуэпыкІа еджакІуэхэр, прахьэжьащ лъэпкъ шхыныгъуэхэр, сабий ибэхэр зэзубыдылІахэм, Іуэхур къызэрекІуэкІам къызэхуэсахэр щагъэгъуэзащ. ДяпэкІэ удз гъэгъа гуэрэну зэщІэблэну дадийхэр а махуэм халъхьащ, фэеплъ сыным и лъабжьэри удз гъэгъа ІэплІэхэмрэ блэрхэмрэкІэ ягъэнщІащ. «Бесленей. Право на жизнь» документальнэ фильмым псори зэдеплъащ, нэпсхэр къригъакІуэу, блэкІам, а блэкІар цІыхугъэ лъагэкІэ зыгъэнщІахэм хуащІ пщІэмрэ щІыхьымрэ нэхъри зэщІигъаблэу. ТУАРШЫ Ирэ
Больше на Черкес хэку
Подпишитесь, чтобы получать последние записи по электронной почте.
