Тхыдэ-щэнхабзэ фестиваль

Къэрэшей-Черкесым хыхьэ Красногорскэ жылагъуэм «Кавказский рубеж» зыфIаща тхыдэ-щэнхабзэ фестивалыр щызэхэтащ. Дауэдапщэр къызэрагъэпэщащ жылагъуэм дэт пасэрей чэщанэм и Iэхэлъахэм.

Чэщанэм и Iэхэлъахэм этнокъуажэ цIыкIу щаухуащ. АбыкIэ ди республикэм щыпсэу лъэпкъхэм я хабзэхэри, я щыIэкIэ-псэукIэри, ябгъэдэлъ IэпщIэлъапщIагъри къагъэлъэгъуащ. Фестивалыр гъэщIэгъуэн зыщIа Iуэхугъуэхэм языхэзщ иммерсивнэ спектаклыр: лъэпкъ пщIантIэхэм театр теплъэгъуэхэмкIэ къагъэлъэгъуащ республикэм щыпсэухэм я тхыдэм, щэнхабзэм епха Iуэхугъуэхэр. «Тхыдэ бей зиIэ чэщанэм и Iэхэлъахэм ди лъэпкъхэм я щэнхабзэр къэдгъэлъагъуэу дауэдапщэ щызэхэтшэныр ар Iуэху щхьэпэу къыдолъытэ.

Мыбдеж хьэщIэхэм щалъагъу ди щэнхабзэр пкъыгъуэ зэхуэмыдэу зэрызэхэухуэнар, гъуазджэр къызэрежьэ щэхуххэми щыгъуазэ худощIхэ. Нобэ къэдгъэлъэгъуа спектакль гъэщIэгъуэнри – абы ипкъ иту цIыхухэр зы лъэпкъ пщIантIэм къыдэкIыу нэгъуэщIым куэшурэ щытащ, щэнхабзэм, хабзэхэм, джэгукIэхэм, шхыныгъуэхэм щагъэгъуазэурэ – Къэрэшей-Черкесыр зыхуэдэр къэбгъэлъэгъуэнымкIэ IэмалыфI дыдэ хъуащ», – жиIащ Къэрэшей-Черкесым щэнхабзэмкIэ и министр Агырбэ Зураб. Фестивалым къеблэгъа хьэщIэхэм хэгъуэгум щыпсэу лъэпкъхэм я шхыныгъуэхэр Iуагъэхуащ, мастер-классхэм хэтыну Iэмал иратащ.

Творческэ гупхэм ди къафэ-уэрэдхэр зэкIужу утыку кърахьащ, туристхэм я нэжэгужагъыр нэхъри къаIэту. Iуэхугъуэ гъэщIэгъуэным и къызэгъэпэщакIуэу щытащ Урысей зауэ-тхыдэ жылагъуэм и хэгъуэгу къудамэр, Къэрэшей-Черкесым щэнхабзэмкIэ и Министерствэр, дэIэпыкъуэгъу хъуахэщ къэрал тхыдэ-щэнхабзэ, щIыуэпс музей-къуэдмэзым рэ креативнэ индустриехэмрэкIэ еджапIэр. ЖыIэпхъэщи, Красногорскэ жылагъуэм дэт чэщанэр Кавказ зауэ зэман лъандэрэ къэна хэщIапIэщ, абы туристхэр куэду йокIуалIэ.

Чэщанэм и кIуэцIым къыщызэрагъэпэща экспозицэм XIX лIыщIыгъуэм икIэм Кавказым щыIа щыIэкIэпсэукIэр къэзыIуэтэж хьэпшыпхэр, сурэтхэр, инсталляцэхэр щызэхуэхьэсащ. Абы нэгузыужь щрагъэкIуэкI зэпыт. Чэщанэр зытет лъагапIэращи, Псыжьыпсым, бгылъэхэм дахащэу уаIуплъэнымкIэ тегъэпсыхьыпащ. Фестивалыр иджыри зэ щыхьэт техъуащ ди республикэм щыпсэу лъэпкъхэм я тхыдэмрэ щэнхабзэмрэ я къулеягъыр, ахэр зэмылIэужьыгъуэу зэрызэхэтыр, хабзэхэр яхъумэурэ нэхъыжьхэм нэхъыщIэхэм зэрыхапщэр, пщIэрэ щIыхьрэ зэхуащIу лъэпкъхэр мыбдеж зэрыщызэдэпсэур.

ЧЫРБЫЖ Иринэ