Терроризмым хуэгъэза бэнэныгъэм щызэлъыкъуэтыным и Махуэм

Зыхуэгъэзэныгъэ

Къэрэшей-Черкесым щIыхь зыхуэтщI и цIыхухэ!

Нобэ, терроризмым хуэгъэза бэнэныгъэм щызэлъыкъуэтыным и Махуэм, дэ дигу къыдогъэкIыж къэралыр гуауэщхьэуэ хэзыгъэта теракт шынагъуэхэм хэкIуэдахэр. Урысейм и гукъеуэ нэхъыщхьэу тхыдэм къыхэнэнущ Беслан къалэр. Илъэс 21-кIэ узэIэбэкIыжмэ, террористхэм  цIыху 334-м, абыхэм ящыщу сабии 186-м, я гъащIэхэр IэщIахащ. Апхуэдэ къабзэу, хэкIуэдащ шынагъуэншагъэ, хабзэхъумэ къулыкъухэм я лэжьакIуэхэр.

А нэщIэбжьэм игъащIэкIи мыкIыжыну уIэгъэхэр къытринащ ди хэкуэгъу куэдым, псом хуэмыдэу, къуэш Ищхъэрэ Осетие-Аланием щыпсэухэм ягухэм. Беслан и фэеплъыр псоми ди зэхуэдэ узщ икIи ди зэхуэдэ дерсщ. А дерсым дегъэлъагъу терроризмым лъэпкъи дини зэримыIэр —  абы и мыхьэнэ нэхъыщхьэр цIыху гъащIэм фэ емыплъынращ.

Зэлъыкъуэтыныгъэм и Махуэр – ар таучэлми и Махуэщ. Апхуэдэ мыхъумыщIагъэ къэдмыгъэхъужыным таучэл тетщIэным и Махуэщ. Ижь ижьыж лъандэрэ Урысейм и къарур къызыхэкIыр и лъэпкъхэм я зэлъыкъуэтыныгъэращ. Лъэпкъ куэду дызэрызэхэтым и къарур зыми хухэгъэщIэнукъым.

Дэ пщIэшхуэ яхуэтщIу икIи дахуэарэзыуэ дигу къыдогъэкIыж ди зауэ къулыкъущIэхэр – бэнэныгъэ здрагъэкIуэкIым щыпэрытхэр. Абыхэм я лIыгъэр, щыпкъагъэмрэ псэемыблэжыныгъэмрэ, махуэ къэси я гъащIэм зэрыщымысхьыр – террор шынагъуэм ди хэкуэгъухэр щызыхъумэ мэIухущ. ПщIэ зыхуэтщI зауэ къулыкъущIэхэ, дэ зыщыдгъэгъупщэкъым фи хахуагъэр, хуэфащэ уасэ идот Урысейм и шынагъуэншагъэм хуэфщI хэлъхьэныгъэм.

Нобэ дэ ди щхьэхэр худогъэщхь лажьэ ямыIэу террористхэм яIэщIэкIуэда псоми  я фэеплъ нэхум. МыкIуэдыжын щIыхь яхуэфащэщ  я гъащIэм щымысхьыжу Беслан дэсхэмрэ къэралым и нэгъуэщI щIыпIэхэм щыпсэухэмрэ къащхьэщыжахэм. Абыхэм я лIыгъэр – я къалэным зэрыхуэщыпкъам и щапхъэщ.

Террорым хэкIуэдахэм я фэеплъыр гущIыхьэу дигум илъыну къудейкъым, атIэ абы дыхущIигъэкъунущ нацизмрэ фашизмрэ зыхэмытыну къэкIуэну ди сабийхэм яхуэдухуэным.

Фэеплъ нэху – хэкIуэдахэм. Псэууэ къэнахэм, террор шынагъуэр зи нэгу щIэкIахэм яхрелъ лIыгъэрэ щыпкъагъэрэ, яреIэ узыншагъэ. ЗэрыУрысейуэ яреIэ мамырыгъэрэ зэIузэпэщрэ.

ТЕМРЕЗОВ Рэшид, Къэрэшей-Черкес Республикэм и Iэтащхьэ                  

ИВАНОВ Александр, Къэрэшей-Черкес Республикэм и ЦIыхубэ ЗэIущIэм (Парламентым) и  тхьэмадэ                          

АРГУН Мурат, Къэрэшей-Черкес Республикэм и Павительствэм и тхьэмадэ