ЛЕРМОНТОВ МИХАИЛ и цІэр зезыхьэ, Минеральные Воды аэропортым терминалыщІэр къызэрыщызэІуахам и цІэкІэ КъЧР-м и Іэтащхьэ Темрезов Рэшид хъуэхъукІэ захуигъэзащ Ставрополь крайм и губернатор Владимиров Владимири, крайм щыпсэухэми.
УФ-м и Президентым, Правительствэм, лэжьыгъэм щІэгъэкъуэн зыхуэзыщІа цІыхухэм зэдрагъэкІуэкІа лэжьыгъэшхуэм къыпэкІуащ зэманым и къулеягъым тегъэпсыхьауэ къызэгъэпэща, метр зэбгъузэнатІэ мин 30 зи инагъ щІыпІэр. Абы хохьэ къатищу зэтет эскалаторыр, лифтыр, телъэтыкІыгъуэм ежьэ цІыхухэм яхуэгъэпса залышхуэр, хьэлъэхэр, хъуржынхэр щыщІаплъыкІ щІыпІэ щхьэхуэ. Аэропортым зы жэщ-махуэм лъэныкъуэ зэхуэмыдэ 70-мкІэ кхъухьлъатэ 240-рэ лъэтэфынуи къарущ. Аэропорт Іэхэлъахэм и къулеягъри умыгъэщІэгъуэнкІэ Іэмал иІэкъым. АтІэ, метр зэбгъузэнатІэ мин 43-м къызэщІеубыдэ машинэ гъэувыпІэ щІыпІэ хэхаи 6, электротранспортым тегъэпсыхьа электростанцхэр. Іуэхугъуэр нэхъри лъапІэ ещІ ар ТекІуэныгъэм и Илъэс 80-м зэрытехуам.
Аэропортым и мыхьэнэр зэхьэлІар Ищхъэрэ Кавказым и закъуэкъым. АтІэ ар ящхьэпэнущ Урысейм и Ипщэ лъэныкъуэм зэрыщыту. ТерминалыщІэ яухуэным щхьэусыгъуэ хьэлэмэт хуэхъуащ пассажиру аэропортым пхыкІым и бжыгъэр кІуэ пэтми зэрыхэхъуэм. Апхуэдэщи, 2024 гъэ закъуэр къатщтэмэ, Кавминвод аэропортым пхыкІащ пассажир мелуани 4,85-рэ, мелуаным щІигъу хамэ къэрал лъэныкъуэхэмкІэ лъэтащ. Абыхэм яхэтщ, зэрыгурыІуэгъуэщи, ди республикэм щыщхэри, ди хэгъуэгум и курортхэм къэкІуахэри. Илъэс кІуам туристу КъЧР-м къеблэгъащ мелуани 2-рэ мин 253-рэ. ГъэщІэгъуэнракъэ, ар республикэм цІыхуу щыпсэум нэхърэ хуэди 4-кІэ нэхъыбэщ. «Иджыри зэ сохъуэхъу мы Іуэху гуапэм зи гуащІэ хэзылъхьа псоми! УнафэщІ къудамэми, «Новапорт» компанэм и лэжьакІуэ гупми ехъулІэныгъэхэмрэ лъагапІэщІэхэмрэкІэ! Аэропортыр зыхуэлэжьэну пассажирхэм — узыншагъэ быдэ, уафэгу къащхъуэрэ мамыррэ, лъэтэгъуэ тынш!» — телеграмм каналым щитхащ республикэм и лІыщхьэм.
Ди корр.
Больше на Черкес хэку
Подпишитесь, чтобы получать последние записи по электронной почте.
