1943 гъэм мазаем и 17-м хуит къащӀыжа Кавказым, Ӏуащхьэмахуэ и щыгум ТекӀуэныгъэм и Ныпыр щаӀэтауэ щытащ.
А тхыдэ къэхъукъащӀэм ипэ ди совет зауэлӀхэм бгылъэ лъагэм и щытыкӀэ хьэлъэхэм фашист дзэ пакIэхэм бэнэныгъэ гуащӀэ драгъэкӀуэкӀащ. Клухор, Марыхъу, Санчар бгы щхьэдэхыпӀэхэр зэхэуэ гуащӀэхэм я утыку хъуащ. Кавказым и бгы щхьэдэхыпӀэхэр зыхъумахэм я лӀыхъужьыгъэр мыкӀуэдыжын щӀыным хуэунэтӀауэ, 1966 гъэм унафэ къащтащ Къэрэшей-Черкесым Мемориальнэ комплекс щаухуэну.
Илъэс къэси хуэдэу, Кавказым и бгы щхьэдэхыпӀэхэр нэмыцэ-фашист зэрыпхъуакӀуэхэм къыщыӀэщӀахыжа махуэм ирихьэлӀэу, музей-фэеплъым щызэхуэсащ цӀыхубэр, а махуэхэм и лӀыхъужьхэм яхуэфащэ пщӀэр ирагъэгъуэтыжыну. Фэеплъ Ӏуэхугъуэм къекӀуэлӀащ республикэм и Правительствэм хэтхэр, КъЧР-м и ЦӀыхубэ ЗэӀущӀэм и депутатхэр, Къэрэшей-Черкесым и районхэмрэ къалэхэмрэ я лӀыкӀуэхэр, динырылажьэхэр, жылагъуэ зэгухьэныгъэхэм къабгъэдэкӀахэр, СВО-м хэтхэр, хэгъуэгум щыпсэухэр.
Хабзэ зэрыхъуауэ, пэкӀур къыщӀидзащ Кавказым и бгылъэ щхьэдэхыпIэхэм щыхэкӀуэда дзэ къулыкъущӀэхэм я фэеплъу тхьэлъэӀу, дыуэ щӀынымкӀэ. ПэкӀум кърихьэлӀахэм я къэпсэлъэныгъэхэм къыщыхагъэщащ ди Хэкум и ипщэ гъунапкъэхэр Гитлер иубыдыну ищӀа мурадыр Кавказым и лӀыхъужьхэм зэрызэхагъэщэщар, текӀуэныгъэр уасэ лъапӀэ дыдэкӀэ къызэрытӀэрыхьар. ХэкӀуэда ди зауэлӀхэм зы дакъикъэкӀэ яхуэщыгъуа нэужь, къызэхуэсахэм фэеплъ сыным и лъапэм удз гъэгъахэр щагъэтӀылъащ. Кавказым и бгы щхьэдэхыпӀэхэм я хъумакӀуэхэм я лӀыхъужьыгъэр цӀыхубэм щыгъупщэнукъым.
Зыгъэхьэзырар УЭЗАЕ Маринэщ
Больше на Черкес хэку
Подпишитесь, чтобы получать последние записи по электронной почте.
