«ТекIуэныгъэм и Iуэрытхыр»

Черкесск къалэм и уэрам нэхъ зекIуапIэ дыдэм — Первомайскэм — хэкупсагъэ мыхьэнэ зиIэ «ТекIуэныгъэм и Iуэрытх» акцэм теухуа сурэт гъэлъэгъуэныгъэр къыщызэIуахащ.
Ар мы гъэм япэу ирагъэкIуэкI Iуэхугъуэщ. Стендхэм къыщыгъэлъэгъуащ акцэр щекIуэкIым траха сурэтхэр, ди хэгъуэгум щыщхэри хэту. Абдеж къалэдэсхэр, щIалэгъуалэ жылагъуэ зэгухьэныгъэхэм хэтхэр куэду къекIуэлIащ, яфIэгъэщIэгъуэну зыщаплъыхьащ.
— Iуэрытхыр къызэрырагъажьэрэ мы гъэм илъэси 7 мэхъу. Ауэ абы теухуа гъэлъэгъуэныгъэр ди хэгъуэгум щыяпэрейщ. Нэхъыщхьэр — а Iуэхум щIалэгъуалэр нэхъыбэу къыхэшэнращ, ахэр ди Хэкум и тхыдэм щыгъуазэ щIынращ. Япэ дыдэу ди хэгъуэгум «ТекIуэныгъэм и Iуэрытх» акцэр щрагъэжьам, ар здатхыну щIыпIитI къудейщ щыIэу щытар. Мыгъэрей Iуэрытхыр щатхыну щIыпIэхэр куэдкIэ нэхъыбэ хъуащ. Акцэр зэрекIуэкI зэманым къриубыдэу Iуэрытхыр ди республикэм щыщ цIыху мин 15-м ятхагъэххэщ. Абыи къегъэлъагъуэ мы Iуэхум зэрызиубгъур.
Си щхьэкIэ къэсщтэнщи, акцэм и фIыгъэкIэ, сфIэгъэщIэгъуэну щIэ куэд къэсцIыхуащ. Абы дэтхэнэми лъэкIыныгъэ къыдет иджыри зэ ди тхыдэ щIэныгъэр здынэсыр къэтхутэжыну, — къыддэгуэшащ «Зыуэ щыт Урысей» хэгъуэгу парт къудамэм и ГъэзэщIакIуэ комитетым и унафэщI Джамбаев Руслан.
«ТекIуэныгъэм и Iуэрытх» акцэм ипкъ иту, мы гъэм ди республикэм Iуэрытхыр здатхыну щIыпIэ 83-рэ щыIэнущ. Абы дэтхэнэри хэтыфынущ, и ныбжьым емылъытауэ. КъинэмыщIауэ, акцэм и официальнэ сайтми онлайн щытыкIэм иту ар щызэфIагъэкIыфынущ.
ЩIэныгъэфI къэзыгъэлъагъуэхэм я цIэр къыхагъэщ хабзэщ хэгъуэгу, фееральнэ нагъыщэкIэ. Ауэ, нэхъыщхьэр аращи, акцэм дэтхэнэми лъэкIыныгъэ ярет Хэку зауэшхуэм теухуа тхыдэмкIэ я щIэныгъэр здынэсым кIэлъыплъыжыну. Мы Iуэхум хэта дэтхэнэми, Iуэрытхыр зэратхамкIэ сертификат къахуэкIуэжынущ.
БОРЭНЫКЪУЭ Мадинэ