Республикэм и лIыщхьэм лъэIукIэ зыкъыхуагъэзащ СВО-м зи къулыкъу пщэрылъхэр щызыгъэзащIэ ди хэкуэгъухэм. ЛъэIур зытеухуауэ щытар Хэку зауэшхуэм щыгъуэ хэкIуэда совет зауэлIхэм я фэеплъу Бэвыкъуэ къуажэм дэт сыным, абы и Iэхэлъахэм зэгъэзэхуэжыныгъэ зэрыхуэныкъуэращ. «Родина-мать» фэеплъ-къуэшыкхъэр 2020 гъэм зэрагъэзэхуэжауэ щытащ. ИджыкIэ абы и Iэхэлъахэр Iэмал имыIэу гъэщIэрэщIэн хуейщ, къинэмыщIауэ, ихъуреягъкIэ фонархэр гъэувыпхъэщ, щIыуэпс гъуэзи ешэлIапхъэщ», — къыхагъэщащ щIалэхэм. Темрезов Рэшид ди хэкуэгъу къулыкъущIэхэм псалъэ яритащ а фэеплъ къуэшыкхъэр накъыгъэм и 9-м, ТекIуэныгъэм и Махуэшхуэм ехъулIэу, фIагъ лъагэ хэлъу зэрызэрагъэзэхуэжынумкIэ. «Iэмал имыIэу а псори зэлъэщIэдгъэхьэнущ. «Газпром-межрегионгаз Черкесск»-м и лэжьакIуэхэм щIыуэпс гъуэзыр а щIыпIэм ирашэлIэнущ, иджырей зэманым тегъэпсыхьа щIыб фонархэр дгъэувынущ икIи накъыгъэм и 9 Махуэшхуэм ехъулIэу зэгъэзэхуэжыныгъэ лэжьыгъэхэр духынущ. Къапщтэмэ, ТекIуэныгъэм и Илъэс 80-м Хэку зауэшхуэм, совет зауэлIым яхьэлIа фэеплъ сыну хъуам зэгъэзэхуэжыныгъэ лэжьыгъэхэр етщIылIэнущ. Ар ди пщэрылъ пажэщ, ди жэуаплыгъэ инщ», — жэуап яритащ къулыкъущIэхэм хэгъуэгум и лIыщхьэм. Абы къыдэкIуэуи, Темрезов Рэшид фIыщIэ яхуищIащ урысей къулыкъущIэхэм, абыхэм къагъэлъагъуэ лIыгъэм, хахуагъэм, Хэкур яхъумэну сыт щыгъуи зэрыхьэзырым, щIыхь яхэлъу Ищхьэ главнокомандующэм — УФ-м и Президентым игъэува къалэнхэр зэрагъэзащIэм папщIэ. «Срогушхуэ фэ фщыщ дэтхэнэми! Си хэкуэгъу къулыкъущIэхэм — лIыгъэрэ хахуагъэрэ зыхэлъ щIалэхэм сроин! – къыщIигъужащ республикэм и лIыщхьэм.
Больше на Черкес хэку
Подпишитесь, чтобы получать последние записи по электронной почте.
