Черкесск къалэм «Сердечно-сосудистая онкология: интервенционные, сверхобъемные, симультанные и реваскуляризирующие вмешательства, сосудистый доступ» зи фIэщыгъэцIэ щIэныгъэ-практическэ конференц щекIуэкIащ.
Абы къызэхуишэсащ Урысейм и хэгъуэгу зэхуэмыдэхэм щыщ кардиолог, лъынтхуэ, онколог, эндоваскулярнэ хирург, интервенционнэ радиолог нэхъыфIхэр. Ахэр тепсэлъыхьащ гумрэ лъынтхуэмрэ я узыфэхэр онкологие узыфэм щыпэщӀэхуэ Ӏуэхугъуэ нэхъ гугъу дыдэхэм.
Конференцыи и лэжьыгъэм хэтащ УФ-м и Федеральнэ ЗэIущIэм и Къэрал Думэм узыншагъэр хъумэнымкIэ и Комитетым и тхьэмадэм и япэ къуэдзэ, онколог, GMS Hospital-м и щӀэныгъэ чэнджэщэгъу нэхъыщхьэ Башанкаев Бадма, Къэрэшей-Черкесым и ЦIыхубэ ЗэIущIэм (Парламентым) и депутат Хубиев Хьэсэн, республикэм узыншагъэр хъумэнымкIэ и министр Камурзаевэ Динарэ, Ищхъэрэ-Кавказ къэрал Академием и ректор Кочкаров Руслан сымэ.
ЗэIущIэм и мурад нэхъыщхьэу щытащ федеральнэ клиникэхэмрэ щӀыналъэ купсэхэмрэ я зэфӀэкIхэмкIэ зэдэгуэшэнымрэ сымаджэ нэхъ хьэлъэ дыдэхэми шынагъуэншэу икӀи фӀагъ иӀэу яӀэзэнымкӀэ къагъэсэбэп иджырей ӀэмалыщӀэхэр къэгъэлъэгъуэнымрэ.
Ар екӀуэкӀащ «Пятничные встречи с живой хирургией Angiopicture» проектым ипкъ иту. Абы и тхьэмадэм и къуэдзэщ КъЧРКБ-м и хэгъуэгу лъынтхуэ Купсэмрэ гу-лъынтхуэ хирургиемкӀэ и къудамэмрэ я унафэщӀ Темрезов Марат.
Конференцым къеблэгъащ Къэрэшей-Черкесым и Правительствэм и тхьэмадэ Аргун Мурат. Абы и щхьэкIэ, ди хэгъуэгум и Iэтащхьэм къыбгъэдэкIыу къызэхуэсахэм яхъуэхъуащ лэжьыгъэ купщIафIэкIэ, ехъулӀэныгъэкIэ, ди цӀыхухэм я гъащIэм и фIагъыр нэхъри езыгъэфIэкIуэну щӀэныгъэ лэжьыгъэщӀэхэр яӀэну.
— Нобэрей зэӀущӀэм и мыхьэнэр къэлъытэгъуейщ, сыт щхьэкӀэ жыпӀэмэ, ар занщIу епхащ узыншагъэр хъумэным, медицинэм и лэжьакIуэхэм, ди щӀыналъэм зэрызиужьым. Ар медицинэ Ӏуэхутхьэбзэхэр зэрагъэзащӀэм теухуащ, нэгъуэщӀу жыпӀэмэ, УФ-м и Президентым къытхуигъэува пщэрылъхэр: цӀыхум и социальнэ щытыкӀэм емылъытауэ медицинэ хуэӀухуэщӀэхэр фӀагъ иIэу яIэрыгъэхьэныр хэгъэхъуэным. КъинэмыщIауэ, къыхэгъэщыпхъэщ иужьрей зэманым УФ-м и Президентым и унафэхэм я фӀыгъэкӀэ узыншагъэр хъумэнымкӀэ бэзыр жыджэру зэрефIакIуэр. Ар ди къэралым и хэгъуэгу къэс зыхыдощӀэ икIи лъэпкъ проектхэр догъэзащIэ. Нобэ дыгушхуэу жытӀэфынущ Къэрэшей-Черкесым фӀыуэ зэрызиужьыр.
Щхьэхуэу къыхэзгъэщыну сыхуейщ республикэм и Ӏэтащхьэм абы хуищI хэлъхьэныгъэшхуэр. Правительствэм и тхьэмадэу сыщыткӀэрэ, солъагъу узыншагъэр хъумэным и бэзым, абы зегъэужьыным хухах мылъкур икӀи ар къыхощ ди республикэм и социальнэ, экономикэ зыужьыныгъэм, — къызэхуэсахэм захуигъэзащ Аргун Мурат икIи къэкӀуэну ИлъэсыщӀэмкӀэ яхъуэхъуащ насып, хуабагъэ, узыншагъэ, тыншыгъуэ я унагъуэхэм илъыну.
ИужькIэ ди республикэм и Iэтащхьэ Темрезов Рэшид къыбгъэдэкIыу, и ӀэщӀагъэм зэрыхуэӀэзэм, узыншагъэр хъумэным и зыужьыныгъэм хуищIа хэлъхьэныгъэшхуэм, иригъэкIуэкI щӀэныгъэ лэжьыгъэ жыджэрым папщӀэ «КъЧР-м щӀыхь зиӀэ и дохутыр» щӀыхьыцӀэр хуигъэфэщащ Восканян Сергей Эдуардович, ФӀыщӀэ тхылъ иритащ Ростов клиническэ сымаджэщым «Спасения конечностей» и Купсэмрэ лъынтхуэ хирургиемкIэ и къудамэмрэ я унафэщI Жолковский Александр Владимирович сымэ.
Министр Камурзаевэ Динарэ къытепсэлъыхьащ конференцэм мыхьэнэшхуэ зэриIэм, зэрыуасэншэм.
— Нобэ дыкъызэхуэсащ иджырей медицинэмкӀэ мыхьэнэшхуэ зиӀэ Ӏуэхугъуэм — гу-лъынтхуэ онкологием, а узыфэхэр зиӀэ сымаджэхэм я бгъэдыхьэкӀэщӀэхэм, яӀэзэкӀэхэм дытепсэлъыхьыну. Мы унэтӀыныгъэм гулъытэ хэха хуэщӀын, куууэ джын хуейщ, сыту жыпӀэмэ ар зытеухуар цӀыхум и Ӏэпкълъэпкъым нэхъыщхьэу хэлъ гумрэ лъынтхуэмрэщ. Апхуэдэ узыфэхэр зэрыдунейуэ, ди республикэри яхэту, цӀыху гъащӀэр нэхъыбэу зыхьщ. ЗымкӀи щэхукъым, цӀыхухэр дунейм ехыжыныр нэхъ гъэмэщӀэным, дунейм къытехьэ нанухэр нэхъыбэ щӀыным, лъэпкъ мурадхэр гъэзэщӀэным ди къару псори зэрыхуэунэтӀар, — жиӀащ министрым.
— Конференцыр зытеухуар гу-лъынтхуэ узыфэхэр зэрыгъэхъужын, сымаджэхэм зэреIэзэн Iэмалхэращ. Ди конференцым къекӀуэлӀащ апхуэдэ сымаджэхэм яIэзэнымкIэ зэфIэкI лъагэ зыбгъэдэлъ онколог, лъынтхуэ хирург гуп.
Ди хэгъуэгу Купсэм и лэжьакӀуэхэм илъэси 5-м щӀигъуауэ операцэхэр щагъэзащӀэ онкодиспансерым. Сымаджэщым иӀэщ гибриднооперационнэ, ангигеографическэ оборудованэхэр, абыхэм я фӀыгъэкӀэ ди хирургхэм жьэжьейм, тхьэмщIыгъум, кIапцIэм (поджелудочная железа), нэгъуэщIхэм ягъуэта инвазилацэ опухолыр операцэ ящI. Хирургхэр зэгъусэу апхуэдэ операцэ 300-м щӀигъу ящӀагъэххэщ, — журналистхэм къыддэгуэшащ Темрезов Марат.
Программэм ипкъ иту, къагъэлъэгъуащ операцэ хьэлъэ дыдэхэр зэращIыр, апщыгъуэхэм деж къэхъункӀэ хъуну клиническэ Ӏуэхугъуэхэр зэхагъэкӀащ, методикэ гъуэзэджэхэмрэ интерактивнэ зэпсэлъэныгъэхэмрэ къагъэлъэгъуащ. Псалъэм папщӀэ, конференцым ипкъ иту, «Бутов С.П. и цӀэр зезыхьэ Къэрэшей-Черкес онкологие диспансер»-м и операционнэ пэшым сымаджэр операцэ зэращIыр къатащ.
Апхуэдэ лъагапӀэ зиӀэ конференц Къэрэшей-Черкесым щекӀуэкӀыныр — ди медикхэм я ӀэщӀагъэм зэрыхагъахъуэм и щыхьэт къудейкъым, атӀэ ди хэгъуэгум технологие инкIэ медицинэ дэIэпыкъуныгъэ ягъэгъуэтыным зегъэужьынымкIэ хэлъхьэныгъэшхуэщ.
«Ди цӀыхухэм я узыншагъэр — уасэншэщ икӀи медицинэм зегъэужьынымкIэ мыпхуэдэ лъэбакъуэхэм мыхьэнэшхуэ зиIэ текӀуэныгъэхэм — ди цӀыхухэм я гъащӀэр къегъэлыным — нэхъ пэгъунэгъу дыхуащI», — МАХ-м щитхащ республикэм и Iэтащхьэм.
ЕЗАУЭ Маринэ
Больше на Черкес хэку
Подпишитесь, чтобы получать последние записи по электронной почте.
