УФ-м и тхакIуэхэм я Союзым хэт, Урысейми Къэрэшей-Черкесми щэнхабзэмкIэ щIыхь зиIэ я лэжьакIуэ, ди республикэм и цIыхубэ тхакIуэ, КъЧР-м и Iэтащхьэм иухуа, гъуазджэмрэ литературэмрэкIэ и саугъэтым и лауреат, ПсэукIэДахэ къуажэм щIыхь щызиIэ и цIыху ШОРЭ Ахьмэд ЛутI и къуэм мы гъэм и IэдакъэщIэкI хъуа тхыгъэхэм хигъэхъуащ – «Я посвящаю вам свои стихи» зыфIища тхылъ цIыкIур Черкесск къалэм урысыбзэмкIэ къыщыдэкIащ.
Сборникым ихуащ Къэрэшей-Черкесым щыщ творческэ цIыхухэм, и хэку цIыкIум авторым ятриухуа усэхэр. Апхуэдэщ Бэчыжь Лейла, Дер Станислав, Мэкъуауэ Фатимэ, Абидокъуэ Люсанэ, Романенко Владимир, Хапчаев Сэлыхь, Тылик Людмилэ, Толкуновэ Валентинэ, авторым ипхъу Iэсят сымэ ятриухуахэри. КъинэмыщIауэ, Ахьмэд къызыдэкIа Хьэгъундыкъуей къуажэм, зыщыпсэу Черкесск къалэм, зэры-Кавказу яхуиусахэми тхылъ напэкIуэцIхэм зыщывгъэгъуэзэфынущ. ЖыIэпхъэщи, тхылъыщIэм ихуащ «Мысли вслух» жыхуиIэ Iыхьэри.
Абы щызэхуэхьэсащ Шорэм щIэныгъэлIхэм, тхакIуэхэм, жылагъуэ Iуэхузехьэхэм, журналистхэм, егъэджакIуэхэм къыхужаIэ псалъэ гуапэхэр. Тхылъым щIэджыкIакIуэр щигъэгъуазэу езы Ахьмэд итхащ абы Къэрэшей-Черкесым щыпсэу лъэпкъ зэхуэмыдэхэм ящыщу ныбжьэгъу куэд зэриIэр. Ахэращ Шорэм и усэхэр адыгэбзэкIэ илъэс зэхуэмыдэхэм зытриухуауэ щытар. Иджы а усэхэр урысыбзэкIэ зэдзэкIауэ дунейм къытехьащ.
Фигу къэдгъэкIыжынщи, Шорэ Ахьмэд 1942 гъэм жэпуэгъуэм и 10-м АлиБэрдыкъуэ къуажэм къыщыхъуащ. Къэрэшей-Черкес къэрал пединститутыр къиухри, пенсэм кIуэху «Черкес хэку» газетым щылэжьащ, уеблэмэ и унафэщIым и къуэдзэуи щытащ. ИужькIэ республикэ тхылъ тедзапIэм и редактору лэжьащ, «Лэгъупыкъу» сабий журналым и къызэгъэпэщакIуэу, илъэс бжыгъэкIэ и редактор нэхъыщхьэу щытащ. Шорэ Ахьмэд и авторщ урысыбзэкIэ, адыгэбзэкIэ къыдэкIа тхылъ 20-м щIигъум. Абы и прозэр, усэхэр зытеухуар Ищхъэрэ Кавказым и IуэхущIакIуэ цIэрыIуэхэращ, къызыхэкIа лъэпкъымкIэ мыхьэнэ зиIэ темэхэращ, адыгэм къыхэкIа лIыхъужьхэращ, сабийхэм яхуитхари мащIэкъым. Дохъуэхъу авторым и тхылъыщIэмкIэ икIи узыншагъэ быдэ иIэу лъэпкъым хуэщхьэпэн куэд иджыри и Iэдакъэ къыщIэкIыну Тхьэм жиIэ!
ЧЫРБЫЖ Иринэ
Больше на Черкес хэку
Подпишитесь, чтобы получать последние записи по электронной почте.
