Дэтхэнэ цIыхуми и ехъулIэныгъэр къызыхэкIа лъэпкъым, унагъуэм я щIыхьщ, я хэхъуэщ, я напщIэщ. Апхуэдэу, ИлъэсыщIэм ипэ къихуэу, СНГ-м хыхьэ къэралхэм щыщу Санкт-Петербург къалэм дэт ищхьэ еджапIэхэм щеджэ студент нэхъыфI дыдэхэр, лъэпкъ зэхуэмыдэхэм къахэкIахэр, къыхагъэщащ.
Апщыгъуэми къыхалъытащ щIэныгъэ куу зэгъэгъуэтынымкIэ абыхэм къагъэлъагъуэ хущIэкъуныгъэ лъагэхэр, егъэджэныгъэ лэжьыгъэм хуагъэтIылъ гуащIэмрэ жылагъуэ Iуэхухэм халъхьэ жыджэрагъымрэ. ЩIыхь нагъыщэкIэ зи цIэ къраIуа студентищым яхэхуащ Абхъаз Республикэм къыщыхъуа икIи щыпсэу, ауэ КъэрэшейЧеркес Республикэр, Хьэгъундыкъуей адыгэ къуажэжьыр зи лъапсэ къежьапIэ ЩОХЪУЖЬ Самед Альберт и къуэр. Къэралым и ищхъэрэ къалащхьэм щеджэ студент нэхъыфIхэм я гъэлъэпIэныгъэ пшыхьыр щекIуэкIащ Смольнэм. Гуапэ зэрыхъущи, блэкIа илъэсхэм къащхьэщыкIыу, ищхьэ еджапIэмрэ щIэныгъэмрэкIэ Комитетым и къыхэлъхьэныгъэкIэ, мы гъэм къапщыта студентхэм яхэхуащ къуэш Абхъазым щыщ студентхэри. Къапщтэмэ, внешнэ зэпыщIэныгъэхэмкIэ Комитетым къыбгъэдэкIа ФIыщIэ тхылъыр къулыкъущIапIэм и тхьэмадэ Григорьев Евгений студент жылагъуэхэм я пашэ ныбжьыщIэ 13-м, къалэм дэт университет пщыкIущым къабгъэдэкIахэм, яхуигъэфэщащ.
ИщхьэкIэ къызэрыхэдгъэщауэ, ягъэлъэпIахэр — нагъыщэфI защIэкIэ еджэ, щIэныгъэ къэхутакIуэ ныбжьыщIэхэщ, жыджэрагъ ин зыхэлъу гъащIэм хэлэжьыхь студентхэщ. ЯгъэлъэпIа, зи цIэр фIыкIэ къраIуа адыгэ щIалэ жыджэрыр, илъэс 20 зи ныбжь Щохъужь Самед — педиатрическэ медицинэ университетым и ещанэ курсым щоджэ. ДыхуогуфIэ икIи дрогушхуэ ди лъэпкъэгъу ныбжьыщIэм и ехъулIэныгъэхэм папщIэ! Тхьэм нэхъри иригъэфIакIуэ! Шэч хэмылъу, лъэпкъым зыщиужьынур къыщIэтаджэ щIэблэм щIэныгъэ куу зыбгъэдилъхьэмэщ. Самед и ехъулIэныгъэр щапхъэ яхурехъу егъэджэныгъэмрэ щIэныгъэмрэ хуэпабгъэу къэтэдж адыгэ щIалэгъуалэм!
ЩОХЪУЖЬ Люсанэ
Больше на Черкес хэку
Подпишитесь, чтобы получать последние записи по электронной почте.
