ЩIыпIэ самоуправленэм и Махуэм

Къэрэшей-Черкес Жылагъуэ палатэм егъэщIылIауэ лажьэ Жылагъуэ советхэр район къэскIэ иIэщ. Сыт, атIэ, абыхэм я къалэныр, сыт хуэдэ сэбэп къыхуахьыр жылагъуэм, цIыхубэм? Абыхэми, нэгъуэщI ди упщIэхэми жэуапэгъу къыхуэтщIмэ ди гуапэу, мэлыжьыхьым и 21-р — щIыпIэ самоуправленэм и Махуэу зэрыщытри и щхьэусыгъуэу, зыхуэдгъэзащ Хьэбэз районым щылажьэ Жылагъуэ советым и секретарь, и IэщIагъэкIэ егъэджакIуэ ХЬЭМДЭХЪУ Зулифэ.

Иджыблагъэ КъЧР-м и Жылагъуэ палатэм щекIуэкIа «Iэнэ хъурей» зэIущIэм деж Зулифэ и IэщIагъэ зэфIэкI лъагэхэм, и лэжьэкIэфIым, Жылагъуэ палатэм диIыгъ зэдэлэжьэныгъэ гуащIафIэм къыпэкIуэу къыхуагъэфэщащ ФIыщIэ тхылъ.

— «Лучший Общественный совет муниципального района (городского округа) КЧР» зэхьэзэхуэр республикэм и Жылагъуэ палатэм къыщипщытэжым, Хьэбэз районым и советыр нэхъыфIу къыхигъэщащ ЩIыхь тхылъкIэ, япэ увыпIэри къыхуагъэфэщащ. Иджыри уэ уи щхьэкIэ уи цIэ ираIуэу, уи гуащIэр ФIыщIэ тхылъкIэ къыхагъэщащ. Сыт а псори къызыпэкIуар, Зулифэ? Сыт, езыр, Жылагъуэ советым и лэжьыгъэм и купщIэр?

— Псом япэу къыхэгъэщыпхъэщ советым и мыхьэнэр. Абы зэрепх властымрэ цIыхухэмрэ. Абы къикIыр аращи, цIыхубэр, жылагъуэр зыхуэныкъуэр, зыщыгугъыр нэхъыфIу къыдгурыIуэным и Iэмалщ советхэр. Властым и лэжьыгъэми жылагъуэр нэхъ наIуэу щегъэгъуазэ. Апхуэдэ зэпыщIэныгъэр, икIэм-икIэжым, щхьопэ лъэпощхьэпохэр зэфIэхыным, ныкъусаныгъэхэр гъэзэкIуэным, жылагъуэ гъащIэр, псэукIэр ефIэкIуэным, цIыхубэмрэ властымрэ яку зэпыщIэныгъэ дэлъыным, нэхъыфIу зэхахыным, зэгурыIуэным.

 — Хьэбэз районым и Жылагъуэ советым хэтхэм, влэжьым нэхъ нэIуасэ дахуэпщIатэмэ ди гуапэт.

— Хьэбэз районым и Жылагъуэ советым цIыху 47-м нэс хэтщ. Советым и тхьэмадэр Щымырзэ Щэмелщ. Советым хэтхэр я ныбжькIи, зыпэрыт къулыкъукIи, лэжьыгъэкIи зэхуэмыдэщ: егъэджакIуи, хьэрычэтыщIи, щэнхабзэ лэжьакIуи, динырылажьи советым холэжьыхь. Апхуэдэ щытыкIэр щхьопэ къалэн къытхуэувхэр нэхъыфIу, лъэныкъуэ зэхуэмыдэхэмкIэ дыбгъэдыхьэурэ зэфIэтхыным. ЖыIэпхъэщи, советым иIэ хабзэ хуитыныгъэхэр мащIэкъым икIи апхуэдэм лъэкIыныгъэ къыдет районым и администрацэм и Iэтащхьэми, къуажэ советхэм я Iэтащхьэхэми дадэлэжьэну. Ди зэдэлэжьэныгъэ, зэдэщтэныгъэм къриубыдэу СВО-м щыIэхэм дэIэпыкъуэгъу дахуохъу, цIыху щхьэхуэр, унагъуэ хэхар, къуажэ кIуэцIыр зыхуэныкъуэ-зыхуэкъуакIуэ дыщогъуазэ. Фэеплъ щIыпIэхэр, гуманитар дэIэпыкъуныгъэкIэ дызыпэджэжыпхъэр нэIэм щIыдогъэт… Ар ди къару закъуэкъым, псори власть утыкум идохьэ, дызэдолэжь.

— КъызэрызгурыIуэмкIэ, властымрэ жылагъуэмрэ яку дэлэлу фыдэтщ?

— Апхуэдэуи жыпIэ хъунущ. Жылагъуэм, цIыхубэм дритегъэщIапIэщ жыпIэкIи угъуэщэнукъым.

— Ауэ абы къикIкъым, псалъэм папщIэ, тхьэусыхэ гуэркIэ къывбгъэдыхьа цIыхум къифхыу ахъшэ-бохъшэкIэ советыр дэIэпыкъуэгъу фыхуэхъуу, аракъэ?

— Хьэуэ, дэ ахъшэ, мылъку ятткъым, ауэ цIыхум и упщIэр, зыхуэныкъуэр администрацэм и Iэтащхьэм нэтхьэсынущ, и Iуэху дгъэкIуэтэнущ. Нэхъри гурыIуэгъуэ хъун папщIэ: Хьэбэз район Жылагъуэ советыр къызэрагъэщIар район администрацэм и Iэтащхьэм и жэрдэмщ. Абы ипкъ иткIэрэ, дэ къыдахьэлIа Iуэхум ар, Iэмал имыIэу, щыдогъэгъуэзэж. Илъэс къалэнхэр зыхудогъэнаIуэ, къэпщытэжыныгъэхэр, «Iэнэ хъурейхэр», зэIущIэхэр, зэпсэлъэныгъэхэр идогъэкIуэкI, ди зэдэлэжьэныгъэм сэбэп нэхъыбэ къызэрихьыным хуэдэу. ЗэрыгурыIуэгъуэщи, дегъэщIылIащ республикэм и Жылагъуэ палатэми. Абы щIеплъыкI ди лэжьыгъэр, лэжьэкIэр. Гуапэ зэрыхъущи, ди гуащIэр лъагэу къалъытащ иужьрей зэманым. Къысхуагъэфэща ФIыщIэ тхылъри, зэхьэзэхуэм къыщытхьа япэ увыпIэри абыхэм я нагъыщэщ. Ауэ ахэракъым нэхъыщхьэр. Нэхъыщхьэу къызолъытэ цIыхум дащхьэпэфыныр, зэхэтхыныр.

— Зулифэ, уэри, советым хэт псоми фи гуащIэр лъагэу къалъытащи, ди гуапэщ лъэпкъ къэс иIэ мыпхуэдэ советхэм яблэIэбыкIыу фи цIэр утыкум зэрыщагъэIуар, факъызэрыхэжаныкIар. ЦIыхур, жылагъуэр къызэрыфщыгугъым фыхуэщыпкъэжу, IуэхуфI куэд яхузэфIэфхыфу фылэжьэну дывохъуэхъу фи IэщIагъэ Махуэм!

ТУАРШЫ Ирэ