Куэдрэ къэхъукъым апхуэдэ: концерт Зал уардэм цIыхухэр щIэмыхуэу, тIысыпIэхэр яхуримыкъужу, сатыр зэхуакухэм шэнтхэр тIурытIу зэбгъэдэту щагъэув, ари иримыкъужу, екIуэкIыну Iуэхугъуэм щытуи еплъыным хуэхьэзыру щызэхуэс.
Апхуэдэт, атIэ, Черкесск къалэм щэнхабзэмкIэ и Унэм и пэшышхуэр: Черкесск къалэдэс, хьэщIэ щэ бжыгъэ къекIуэлIат зы цIыхум ехьэлIа юбилей зыбжанэ — «Кавказ» цIыхубэ хореографическэ ансамблыр илъэс 20, абы и художественнэ унафэщI Хугаев Эдуард илъэс 60, творческэ гуащIэм зэрыпэрытрэ илъэс 45-рэ зэрырикъур зэдагъэлъэпIэну.
Къалэм, хэгъуэгум и сыт хуэдэ щэнхабзэ къэхъукъащIэми хэту дызэса, зи цIэр ди бзэгупэм телъ «Кавказ» ансамблым и гуащIэдэкI илъэс 20-м къриубыдэу, егъэлеигъэншэу, къалэм и нагъыщэ, и дамыгъэ, и гъуэгуэгъу хъуауэ жыпIэ хъунущ. Гупым цIыхубэм и гур къызэрихьэхуам, и зэфIэкI лъагэхэм я щыхьэт ущIэлъыхъуэн щымыIэу, щэнхабзэмкIэ Унэм и щIыхьэпIэм къыщызэрагъэпэща гъэлъэгъуапIэхэм щынэрылъагъут абыхэм я нагъыщэ лъагэхэр. А псори къебжэкIыгъуафIэкъым, пэжыр жытIэнщи. Ирокъу жыпIэну лъэпкъыбэ, зэхьэзэхуэ, фестиваль зэхуэмыдэхэм я гран-прихэр къэфакIуэ
гупым 16-рэ къызэрыхуагъэфэщар!
Пшыхьым къыщыпсэлъахэм мызэ-мытIэу къызэрыхагъэщащи, апхуэдэ ехъулIэныгъэр, зэфIэкI лъагэр гупым хэт нэрыбгэ къэс и фIыщIэщ, ауэ псом я щхьэжыр «Кавказ»-м и художественнэ унафэщI Хугаев Эдуардрэ хореограф-балетмейстер Хугаевэ Аллэрэ гупым ирахьэлIэ я гуащIэращ. Ахэр зэрызэдэлажьэ илъэсхэм къриубыдэу артист мини 5-м щIигъу къафэм, гъуазджэм, щэнхабзэм и щэхухэм я бжэхэр хузэIуахащ, гъуазджэм хьэщыкъ хуащIащ. «Къалэм и щэнхабзэ зыужьыныгъэм хуэфщIа хэлъхьэныгъэр гъунэншэщ, уасэншэщ, цIыхубэ фIыщIэ зыхуэфащэщ», — щыжаIащ пшыхьым. Апхуэдэ псалъэ гуапэхэр жызыIэнрэ юбилярхэр зыIэтынрэ а пшыхьым къекIуэлIащ ди хэгъуэгум къыщымынэу, нэгъуэщI щIыналъэхэми къикIри. Фэеплъ тыгъэхэри, саугъэт гуапэхэри, ЩIыхь, ФIыщIэ тхылъхэри утыкум гъунэжу щызыIэпахащ.
Гъуазджэр — мамырщIэкъущ, гъуазджэр — лъэпкъзэпхщ, гъуазджэр — гукъыдэжщ, псэхугъуэщ! Гъуазджэр щыIэмэ — дунейри мамырщ! Ар иджыри зэ наIуэ щыхъуащ пшыхьым.
ТУАРШЫ Ирэ
Больше на Черкес хэку
Подпишитесь, чтобы получать последние записи по электронной почте.
