ЩIыхьыцIэ лъагэхэмкIэ

Черкесск къалэм щэнхабзэмкIэ и уардэ Унэм бзылъхугъэхэм я Лъэпкъыбэ Махуэр щагъэлъэпIащ.
ГуфIэгъуэ пшыхьым хэтащ Къэрэшей-Черкес Республикэм и ЦIыхубэ ЗэIущIэм (Парламентым) и тхьэмадэ Иванов Александр, хэгъуэгум и Правительствэм и лIыщхьэ Аргун Мурат, Урысей Федерацэм и сенатор Къэзэнокъуэ Кърым, Къэрал Думэм и депутат Узденов Солтан, КъЧР-м и федеральнэ инспектор нэхъыщхьэ Макоев Тимур, къалэхэм, районхэм я администрацэхэм я Iэтащхьэхэр, мы махуэм ягъэлъэпIа бзылъхугъэхэр, хьэщIэхэмрэ къалэдэсхэмрэ.

Республикэм и Iэтащхьэ Темрезов Рэшид къыбгъэдэкIа хъуэхъу — зыхуэгъэзэныгъэр пшыхьым щигъэIуащ Парламентым и спикерым. А къэпсэлъэныгъэм къыхэщащ гъащIэ къекIуэкIым бзылъхугъэхэм ялэжь Iуэхушхуэхэр, жылагъуэм сэбэп къызэрыхуахьыр, республикэм щыпсэу лъэпкъхэр бзылъхугъэхэм я гуащIэм зэрыригушхуэр.
— Ди щхьэр ину дагъэлъагъу Къэрэшей-Черкесым и беягъ нэхъыщхьэу тлъытэ ди бзылъхугъэ гуакIуэхэм, гурыхуэхэм, гъащIэм и лъэныкъуэу хъуам зи гуащIэ ин хэзылъхьэхэм, а псом къадэкIуэуи, унагъуэ жьэгум и хъумакIуэ нэхъыщхьэу къытхэтхэм, ди бынхэр хэкупсэ-лъэпкъыпсэу зыпIхэм, зыгъасэхэм.

ФIыщIэ ин фхудощI ди республикэм зиужьынымрэ ефIэкIуэнымрэ папщIэ хуэфщI хэлъхьэныгъэ иным и щIыхькIэ.
Къыхэгъэщыпхъэщи, ди хэгъуэгум деж гулъытэ хэха щагъуэт анагъэм, сабиигъуэр хъумэным, щыдогъэзащIэ материальнэ дэIэпыкъуныгъэ зэмылIэужьыгъуэхэр. Апхуэдэщ, хуэгъэкIуэтэныгъэхэр, пособэхэр, ахъшэ гуэдзэхэр, сабий куэд зыщIэс унагъуэхэм щIэгъэкъуэн яхуэхъуныр…
Шэч хэмылъу, а лэжьыгъэм дяпэкIи зиубгъунущ, ди пщэрылъ пажэхэм ящыщуи щытынущ. Абы и щIыхь-кIэщ мы илъэсыр демографие зыужьыныгъэм щIытедухуар, — къыхэщащ хъуэхъум.
КъыкIэлъыкIуэуи, Парламентым и тхьэмадэм къэрал щIыхьыцIэ лъагэхэр яхуигъэфэщащ зи гуащIэкIэ къыхэща, лъэныкъуэ зэхуэмыдэхэм телажьэ бзылъхугъэхэм.
Гуапэ зэрытщыхъуну, Урысей Федерацэм и Президентым и УнафэкIэ, «Заслуженный работник здравоохранения Российской Федерации» щIыхь нагъыщэ лъагэмкIэ и цIэр къраIуащ медицинэ лэжьакIуэ АШЫБОКЪУЭ Гуащэмыдэ (сурэтым щыволъагъу).
КъинэмыщIауэ, КъЧР-м и Iэтащхьэм и УнафэкIэ, мы махуэм ди хэгъуэгум щыщ бзылъхугъэ 19-м къэрал нагъыщэхэр къыхуагъэфэщащ.
МахуэщIыр ягъэдэхащ республикэм и уэрэджыIэхэмрэ къэфакIуэхэмрэ.
ЩОХЪУЖЬ Люсанэ