Хэкум и хъумакIуэм и Махуэм хуэкIуэу Къэрэшей-Черкесым и Iэтащхьэ Темрезов Рэшид республикэм щыпсэухэм яхъуэхъуащ, Хэку зауэшхуэм и ветеранхэр, зауэ операцэ хэхам хэтхэр, республикэм и хабзэхъумэ къулыкъухэм я лэжьакIуэхэр нагъыщэ зэхуэмыдэхэмкIэ къыхигъэщащ.
А гуфIэгъуэ махуэр и тегъэщIапIэу, УФ-м и Президент Путин Владимир игъэбелджыла Хэкум и хъумакIуэм и Илъэсыр ди республикэми къыщызэIуахащ. Хэкум и хъумакIуэм и Илъэсыр хуэгъэзащ Хэку зауэшхуэм и ветеранхэм зэрахьа лIыгъэр, тхыдэ мыхьэнэ зиIэ зауэ зэхуэмыдэхэм хэтахэм, хъумакIуэхэм я ехъулIэныгъэхэр, нобэрей зэманым и лIыхъужь — зауэ операцэ хэхам хэтхэм я лIыгъэр лъытэным.
УФ-м и Президент Путин Владимир къыбгъэдэкIыу КъЧР-м и Iэтащхьэмрэ республикэм щыпсэухэмрэ яхуэгъэза хъуэхъу тхылъым къеджа нэужь, Темрезов Рэшид махуэщIым къекIуэлIахэми, ди хэгъуэгум щыпсэу дэтхэнэми яхъуэхъуащ. — Нобэ щIыхь яхудощI зи гъащIэр Хэкур хъумэным езыта, къэралымрэ абы щыпсэу цIыхухэмрэ я мамыр гъащIэр, тыншыгъуэр лIыгъэрэ хахуагъэрэкIэ къэзылъэща дэтхэнэми. ЩIыхь зыхуэтщI ветеранхэ! ФIыщIэ мыухыж фхузощI зефхьа хахуагъэм, щIэблэм я гъащIэр зэрыфхъумэфам, Хэкум хуэфщIа лъагъуныгъэ мыухыжым папщIэ.
Хэку зауэшхуэр зэриухрэ Илъэс 80 текIыжа ми, зэи тщыгъупщэнукъым фи гъащIэм, фи узыншагъэм фыщымысхьу влэжьа гуащIэр, ТекIуэныгъэшхуэм щIэфта уасэр. Нобэ ди зауэлI хахуэхэми, ди адэжьхэм я щIыхьыр ягъэпэжу, къахуэува къалэнхэр щагъэзащIэ зауэ операцэ хэхам. ПщIэ зыхуэтщI ди зауэлIхэ, дэтхэнэми дывожьэ ТекIуэныгъэ фиIэу фыкъекIуэлIэжыну! — жиIащ Темрезов Рэшид.
А махуэм, УФ-м и Президентым и унафэкIэ, «1941- 1945 гъэхэм екIуэкIа Хэку зауэшхуэм и 80-нэ ТекIуэныгъэ» юбилей медалхэр республикэм и Iэтащхьэм яритащ тылым щылэжьахэм, балигъыпIэм нэмысауэ концлагерхэм гъэру исахэм, Ленинград блокадэм щыпсэуахэм. Куэш-Хьэблэ къуажэм щыщ, тылым щылэжьа Мамыжь Сэхьиди юбилей медаль зратахэм ящыщщ. Абы и сабиигъуэр зэман гуащIэм хиубыдащ, адрей псоми яхуэдэу, нэхущэм щыщIэдзауэ жэщыбг нэс губгъуэм щылэжьащ. Юбилей медалхэр ярита нэужь, республикэм и Iэтащхьэм къэрал, хэгъуэгу нагъыщэхэр яхуигъэфэщащ КъЧР-м щылажьэ къару, хабзэхъумэ къулыкъухэм я лэжьакIуэхэм, СВО-м хэтхэм, мы зэманым зауэм Iутхэм ядэIэпыкъуныр къызэзыгъэпэщхэм. ИужькIэ, пшыхьым къекIуэлIахэм я пащхьэ зыкъыщагъэлъэгъуащ республикэм и щэнхабзэм и лэжьакIуэхэм. Абыхэм хэкупсагъэ, зауэ уэрэдхэр ягъэзэщIащ. БОРЭНЫКЪУЭ Мадинэ
Больше на Черкес хэку
Подпишитесь, чтобы получать последние записи по электронной почте.
